Kola Sa La Itre Hnyinge i nyipunie
◼ Nemene la itre trepene meköti ne la Tusi Hmitrötr ka xatua së troa huliwane hnyawane la mobilis ngöne la hnë icasikeu me ngöne la hna cainöje trootro?
“Hete Pui Ne La Nöjei Ewekë Asë.” (Ate Cai. 3:1): Easa madrine troa hetre mobilis, ke kola aijijë së troa icinyanyikeu, maine ihë ngöne la nöjei ijin. Ngo hetre itre ijin, tha ajane kö la itre Keresiano troa ajolë angatre hnene la mobilis. Ka tune ngöne la hnë icasikeu, ke ijine easa hmi koi Iehova, me kapa la itre ini ngöne la götrane ua, nge easë fe a madrine troa itö ithuecatr. (Deu. 31:12; Sal. 22:22; Rom. 1:11, 12) Celë hi matre kola sipone koi easë asë troa isa apinyi mobilis, me treqene troa pane ase la icasikeu matre e jë pë hë e thupene la itre maca hna iupi fë koi së. Ngo maine easë kö a ajane troa nue la mobilisi së troa mel, ke hetre maca ka sisitria hne së hna lapa treqen, haawe, epi tro sa kuca matre tha tro kö la mobilisi së a ajolëne la itre xan.
“Kuca [Jë] La Ewekë Celë Pine La Maca Ka Loi.” (1 Kor. 9:23): Ame ngöne la hna cainöje trootro, hetre ijine easa öhne la enyipiewekëne la mobilis. Ame göne lo trejine trahmanyi ka elemekene la icasikeu thatraqane la huliwa ne cainöj, tre ma tro angeic a ajane troa atre ka hape, tune kaa lo itre hna upe kowe la götrane hnë cainöje ngön? Ame pena la itre ka cainöj, maine nanyi la hnalapa ne la atr hnei angatre hna troa wange hmaca, maine ini Tusi memin pena, tre angatr a pane hë jë. Ngo maine hne së hna xome trongëne la mobilis, loi e tro sa kuca matre tha tro kö a ajojezi së ngöne la easa porotrike memine la atrene la ketre hnalapa. (2 Kor. 6:3) Maine easa treqene la itre xa ka ce cainöje me easë, kola sipone matre tha tro kö sa telefon maine cinyany pena, ngo epi tro sa nyipi ewekëne la huliwa ne cainöje së, memine la itre sine tronge së ngöne la hna cainöj.
Tro Sa Wang Atrunyi Itre Xan. (1 Kor. 10:24; Fil. 2:4): Hetre itre xan ka majemine traqa hmiitr, ke kola mekune ka hape, tro pë hë angatr a hëne la itre xa trejin, matre hnyingë angatre la hnë troa cainöje ngön, me tro meköt pi hë e cili. Ame la easa traqa hmiitr, tre itre xötre menetre ne troa pane wange hmaca ka hape, troa ami drei me drei. Nyipici laka, ame itre xa ijin, tre hetre itre ewekë ka traqa matre easa traqa hmiitr. Ngo, maine pëkö, loi e tro sa majemine traqa ngöne la hawa hna sa, ke easa hi lai amamane ka hape, easa wang atrune la itre hna amekötine hnei Iehova, memine la trejine ka elemekene la icasikeu thatraqane la huliwa ne cainöj, memine fe la itre xa ka traqa troa hane cainöj.