Bëeke Hmaca Jë Troa Wange La Itre Ka Drei Së
1 Nyimutre the së la itre ka hane atre hë la nyipici enehila, ngo pine hi laka, hnene la ketre trejine hna wangatrehmekun la aqane kapa së la maca ne Baselaia matre hnei angeice hna anyimua traqa troa eën la aja cili the së. Ketre tu së mina fe, loi e tro sa hane hnehengazon troa wange hmaca lo itre atr ka hetre hni ne aja. Nyipici, ame la iwaihmaca tre, sine trongene pala hi la hnëqa së troa “inine la nöjei nöj.”—Mat. 28: 19, 20.
2 Atrehmekune Jë La Aja Thene La Atr: Ngacama thaa kapa kö la itre sine itusi së hnene la ketre atr, ngo kola mama hnene la iqëmeke i angeic, me nine ithanata me hnëewekë i angeice laka, hetre hni ne ajai angeic kowe la maca ne Baselaia. Celë hi kepine lai ka troa upi së troa iwai hmaca. Tha thëthëhmine kö la ketre trahmanyi hnene la ketre trejine la hnei nyidrë hna pane xele ma kapa la sine itus ngöne la faifi lao wiik ne vizitë nyidrë, ngo ame ju hi la hna asikisine wiik; angeice ha kapa la itus, nge thupene lai, kola kapa troa ini tus.
3 Öhne hi epun laka, e hetre hni aja thene la atr, canga bëeke jë ngo, tha nyimu drai kö thupen. The nue kö la “ate ka ngazo” troa thapa la hna traan ngöne la hni ne la atr. (Mat. 13:19) Loi e xecie hnyawa koi së laka, tro sa eatrëne la hna isa pui e hape hna ce axecië ijinë hë.—Mat. 5:37.
4 Cainöj e Cahu Gojeny: Akötrehnine kö nyipunie troa canga akökötren la aja ne la itre atr hnei epuni hna öhne e cahu gojenyi maine ngöne la epuni a cainöje e nöjei ijine ka ijij? Ngöne la epuni a nyipune la porotrik, qaja ju ka hape: “Madri catre ni la porotrike so. Ekaa la hnë tro ni a iöhnyi hmaca me epuni matre troa ce sisedrëne la porotrike celë?” Hnei itre xaa ka cainöje hna hamën maine isazen, e ijij, la itre numero ne telefone i angatr memine lai atr ka hetre hni ne ajan. Maine majemi hë la itre atr öhnyi epuni e cahu gojenyi ngöne la göhnë ka caas, maine jë tro ha hmala la hni angatr troa hamë nyipunie la numero ne telefon maine hnalapa i angeic. Ngo maine thipëne kö angatr troa hamë epuni la itre ithuemacanyi celë, tre tupathe jë troa akökötren la aja i angatr e iöhnyi hmaca me angatr e cahu gojeny.
5 Madrine së la easa goeëne la kola cia hlöeë la itre feja hne së hna fie me nyihnyawan. Ketre tune mina fe, troa hetre madrine së e tro sa pune iwai hmaca me xatuane la itre atr troa kökötre ngöne la ua. (1 Kor 3:6) Isine jë së troa wange hmaca lo itre ka hane drei së.