Easë Kö a Hane Huliwa Nyipici Göi Rapor Ne Hna Cainöj?
1 Nyimu edromë hnine la Tusi Hmitrötr ka qatreng la itre ewekë hna e wengën, nyine troa xatua së troa atreine nyi iatrën me trotrohnine hnyawa la itre ewekë ka traqa ekö. Hanawang la ketre ceitun, hnei Gideona memine la ala 300 lao sooc, hna ngaan la gejë i angetre Midiana. (A. ame. 7:7) Hnene la angela i Iehova hna humuthe la 185 000 lao sooc ne Asuria. (2 Ite jo. 19:35) Ala 3000 lao ka xome la bapataiso ngöne lo Penetekos 33 M.K., nge thupene lai, kola elë koi ala 5000 la etrun la itretre nyihlue i Akötresie. (Ite Huliwa 2:41; 4:4) Kola mama hnyawa jëne la edromë celë, laka, hna thele pala hi hnene la itre hlue i Akötresie troa hamën la itre rapor ka pexej, nge ka nyipici.
2 Kola ini së hnene la organizasio i Iehova troa hamën ngöne la nöjei treu, la rapor ne hna cainöj. Troa thupëne hnyawa la huliwa ne cainöj, e hne së hna ce huliwa me thele troa eatrëne hnyawa lai hna amekötine cili. Troa mama jën la itre rapor, la götran ne la huliwa ne cainöj nyine tro sa thel troa akökötren, maine pena ketre götran gaa aja ka cainöj. Ame hnine la ekalesia, kola aijijën la itre qatre thup hnene la itre rapor ne cainöj, troa wanga atrehmekune la itre trejin ka ijij troa akökötren la huliwa ne cainöje i angatr, nge tune mina fe la itre ka aja ixatua. Ketre, kola ithuecatr kowe la itre Keresiano e cailo fen, ngöne la angatr a e me öhne jën la itre rapor, la aqane kökötre la huliwa ne cainöjën la Baselaia. Hapeu, hane kö së thel troa hamëne hnyawa la rapor ne cainöje së?
3 Sipu Hnëqa Së Isa Ala caas: Tune kaa ngöne la pune la treu, jole kö e tro sa mekune hmaca la itre hne së hna kuca ngöne la huliwa ne cainöj? Maine jol, tune kaa matre thaa cinyihane pe la itre hne së hna kuca ngöne la nöjei ijin easë a cainöje trootro? Ame itre xan, angatr a xom la ketre idrai, maine pena ketre karene hnë troa fejan ngöne la nöjei drai la itre hna troa kuca. Ame itre xan, tre, angatr a xome trongën la itre pepa ne rapore i angatr. Ame hë ngöne la pune la treu, loi e tro së a canga hamën la rapore së kowe la atre thupën la ini tusi së. Maine pena, kuiëne ju pena hnine la kees göi rapor, hnine la Uma Ne Baselaia. Maine thëthëhmine pë hë së troa hamën la rapore së, canga wange ju la atre thupën la ini tusi së, ngo thaa tro kö a treqen tro nyidrëti a wai së. Maine tro së a hamëne hnyawa la itre hne së hna kuca ngöne la huliwa ne cainöj, easë hi lai a amaman la metrötre së kowe la hnei Iehova hna amekötin, nge hatrene ihnimi së mina fe lai kowe la itre trejin ka troa hlem la itre rapor, me kowe la itre ka troa e la etrune la hawa hna kuca hnene la itre trejin asë, qëmeken troa iupi fë koi sasaiatri.—Luka 16:10.
4 Hnëqa Ne La Atre Thupën La Ini Tus: Pine laka, kola thupën me wange hnyawa hnene la qatre thup atre thupën la itre atren la ini tusi nyidrë, haawe, nyidrëti a thel troa wanga atrun la hna huliwa hnei angatr ngöne la nöjei treu. (Ite edomë 27:23) Thaa jole kö koi nyidrë troa atre maine ka cainöje pala hi nge hetre thangan la hna huliwa hnene la nöjei trejin, nge hetre madrine i angatr, nge canga atreine hi tro nyidrë a ixatua ngöne la nyidrëti a öhne ka hape, hetrenyi la ketre e angatr ka thaa hane kö cainöje ngöne la treu ka pexej. Ame ngöne la itre xaa ijin, tre, maine tro hi a hamë ithuecatr, maine ketre mekune pena nyine ixatua, maine tro pena a ce cainöje me angeic.
5 Ame hë ngöne la pune la treu, loi e xecie hnyawa kowe la atre thupën la ini tus ka hape, ase asë hë la itre atren la gurup kuca la hnëqa i angatr, ene la troa hamën la rapor ne cainöj, matre ijije kowe la seketere troa iupi fë la rapor ne la ekalesia koi sasaiatri, qëmekene e sikis ne la treu ka troa xulu. Ame la kola easenyi trootro la pune la treu, ka loi e tro la atre thupën la ini tus a amekunën la gurup göi itre rapor ne cainöj, nge loi e troa traqa fë hnei nyidrë lo itre pepa ne rapor matre troa nyialien ngöne la hnë ini tus. Maine kola thëthëhmin hnene la itre xan troa hamën la rapore i angatr, haawe, tro nyidrë a amekunë angatre hnyawa me ithuecatr.
6 Maine tro së a canga hamën la itre rapore së, easë hi lai a hane ixatua troa xeene hnyawa la ketre rapor ka nyipici, nge ka troa amamane hnyawa la hna kuca ngöne la hna cainöje trootro. Matre tune kaa, tro kö së a hane kuca la hne së hna atrein, troa canga hane hamën la rapor ne cainöje së ngöne la nöjei treu?