Ixatua Ngöne La Ijin Ka Ijij
1 Ame ngöne la kola öhne hnei Peteru ketre aposetolo, la enyipiewekën la troa acatren la lapaune ne la itre sine ce hmi me nyidrë, ene pe nyidrëti a hnehengazone ju troa hane amekunë angatr la itre ithuecatr qaathei Akötresie. (2 Pet. 1:12, 13; 3:1) Hnei nyidrëti hna upe lo ‘itre lapaune hë’ troa akökötrene pala hi la aqane troa eën la itre thiina ngöne la ua, matre thaa tro kö a “hminyaj, me tha ite ka tha wa kö, uti hë la ate hmekune la Joxu shë Iesu Keriso.” (2 Pet. 1:1, 5-8) Ame la aja i Peteru, tre ene la troa xatua angatr troa aejën la hna hë memine la hna ië angatr hnei Iehova, matre “öhnyi [angatr] ngöne la tingeting, ka pë ethan, me pë engazon xajawai i nyidë.” (2 Pet. 1:10, 11; 3:14) Ame kowe la itre sine ce hmi me Paulo, tre kola traqa hnyawa la ithuecatre i angeic, ngöne la ijine ka ijij.
2 Ame enehila, kolo mina fe a hane hnehengazon hnene la itretre thup Keresiano la nöje i Akötresie. Ame ngöne la itre “ijine ka aköte” celë, troa qëmek kowe la itre jol ka tru, hnene la itre hlue i Iehova. (2 Tim. 3:1) Pine laka angatr a melën la itre jol göi mani, me göi hnepe lapa, maine itre sipu ejolen la mel, haawe, maine jë hnei itre xan hna mekune tui Davita ka hape: “Hna ölithi ni hnene la nöjei ngazo uti hë e tha nune e kö; hna xome cilë ni hnene la ite ngazong, nge tha ’teine kö ni goeën, nyimute it’ eje hune la ite pene heng, ame hna pate la ung.” (Sal. 40:12) Hnene laka catrehnine pala ha la itre itupath, matre kolo ha wangacon hnene la itre xan la itre hnëqa i angatr ngöne la götrane la ua, nge thaa hane hë angatre hane cainöjën la maca ka loi. Ngo ngacama tru la itre jol ka eje thei angatr, ‘thaa thëthëhmine kö angatr la itre hnei Iehova hna sipu amekötin.’ (Sal. 119:176) Ijine tro hi la a hamën hnene la itre qatre thup la ixatua ka nyipi ewekë koi angatr.—Is. 32:1, 2.
3 Celë hi matre kola ithuecatre kowe la itre qatre thup troa xatuan la itre ka nanazij, a ka thaa hane hmaca kö cainöj. Kola catre eatrëne lai enehila, uti hë e treu Maac. Troa sipone fe kowe la itretre thupëne la itre ini tus, matre tro angatr a wang la itre ka thaa cainöje hmaca kö, nge troa hane xatua angatr troa ce nyiqaane cainöje hmaca memine la ekalesia. Maine hetre aja i angatr troa pane etid hmaca, haawe, wange ju matre troa ini Tusi Hmitrötr me angatr. Atreine hi troa sipon kowe la itre xaa trejin troa ixatua. Maine kola sipo epuni troa ixatua, troa hetre thangan ka loi la itre ixatua hnei epuni hna hamën, e hna ithuecatr cememine la hni ka menyik, me thele troa itrotrohni.
4 Troa atraqatr la madrine së asë ngöne la kola hane ce cainöje hmaca hnene la ketre trejin, memine la ekalesia. (Luka 15:6) Eje hi lai laka, ame la trenge catr hne së hna xom matre troa xatuan la itre ka thaa cainöje hmaca kö, tre, thaa ka gufa kö, ngöne laka, ketre “tenge ewekë hna qaja ngöne la ijin’ ej.”—Ite edomë 25:11.