‘Hudrume Jë Tune La Itre Lai Ne La Fen’
1 Ngöne la 234 lao nöje ka tru e cailo fen, kola ‘hudume tune la ite lai ne la fen’ hnene la ala sikisi milio la etrun la itre atr ka nyihlue ne la nyipi Akötresie, nge angatr e nyipine la fene hnengödrai ka etheng ngöne la götrane la ua me ka thiina ka ngazo. (Fil. 2:15) Ewekë lai ka upi së troa ketre pengön. Tune kaa la aqane tro sa ahudrumen la lai ne la nyipici ka xulu qaathei Iehova?—2 Kor. 3:18.
2 Itre Huliwa Së: Ame kowe la itre atr, ame la ka canga mama koi angatr, tre, ene la itre aqane ujë së. (1 Pet. 2:12) Hna öhn hnene la ketre föe laka ka loi thiina nge ka ixatua la sine huliwa i angeic, ketre temoë trahmany, nge thaa ka hane fe kö nyidrë qeje kasis maine ihnyima angazonyi pena. Hnene la itre xan hna thel troa porotrike angazony matre troa elëhni hnene la temoë, ngo hnei nyidrëti pe hna lapa thaup ke kola ajan troa kuca la meköt. Nemene hë la thangane lai thene la föe? Eahlo a mekune hmaca ka hape: “Qa ngöne laka lolo pala ha la aqane ujë i angeic, ene pe hnenge hna hane nyiqaane hnyingë pengöne la Tusi Hmitrötr. Haawe hnenge hna hane nyiqaane inin la Wesi Ula i Akötresie me hane xome la Bapataiso.” Öni eahlo fe ka hape: “Ame la ka upi ni troa hane wange la itre ini ne la Itretre Anyipici Iehova, tre, hnene hi la elolon la aqane ujë i angeic.”
3 Ame la aqane ujë së kowe la itre mus, memine la aqane goeëne së la itre thiina ne la fen, memine la elolon la aqane ithanata së Itretre Anyipici Iehova, tre, kolo hi lai a amamane hnyawa kowe la itre atr ka hape easë la ka melëne hnyawa la itre hna amekötin ka draië qa hnine Tusi Hmitrötr. Tro la itre huliwa ka lolo celë a atrunyi Iehova me eatrongëne la itre xaa atr kowe la hmi i Nyidrë.
4 Itre Trenge Ewekë Së: Maine jë ame la itre ka öhne la elolon la aqane ujë së, ma thatre fe kö angatr la kepin matre isapengö së kö me angatr, ngo eje hi lai laka loi e tro sa hane qaja koi angatr la itre ini hne së hna mejiune kow. Hapeue la itre hnei epuni hna ce huliwa memin, maine ce ini pena memin, atre hi angatr ka hape Temoë i Iehova epun? Epuni kö a thele la itre ijin troa hane porotrike me angatr? Tune kaa la aja i nyipunie troa hane “ahudrumene la lai nyipunie qëmeke ne la nöjei at” ngöne la nöjei ijin?—Mat. 5:14-16.
5 Maine easë a ajan troa eatrën la hnëqa së ene la troa itretre tro fë la lai, haawe, nyipi ewekë tro sa hujën la mele së kowe la huliwa cili. Tro la thiina së ka lolo me ka pexej a upi së troa nue la itre ewekë ka thaa nyipi kö kowe la mele së, matre troa tru catre pala hi la itre hne së hna troa kuca ngöne la huliwa ne iamele, ene la troa cainöj me inine la itre atr.—2 Kor. 12:15.
6 Epi tro pala hi së a ahudrumen la lai së, hnene la aqane ujë së me aqane ithanata së. Maine tro sa kuca tune lai, eje hi lai laka tro fe hë la itre xaa atr a thele troa caasi me easë troa atrunyi Iehova.