Itre Thöth—Eköthe Jë La Ketre Trepene Ka Lolo Thatraqan Elany
1. Pine nemen matre nyipi ewekë troa akökötren hnene la itre Keresiano thöth la lapaune i angatr?
1 Nemene la ka ka nyipi ewekë koi Nyipunie? Nemene ewekë ka lapan la mekune i epun? Tune kaa la itre aja i epun, hna nyitrepene itre eje ngöne la itre ewekë enehila, maine epuni kö a ajan la itre ewekë elany, lo itre hna thingehnaean hnei Akötresie? (Mat. 6:24, 31-33; Luka 8:14) Nyipi ewekë troa catr la lapaune i nyipunie matre troa huliwa kowe la itre hnei Akötresie hna thingehnaean, tui Aberahama me Mose. (Heb. 11:8-10, 24-26) Tune kaa la aqane tro nyipunie a akökötrene la lapaune cili me amë la “tepene ka loi nyine thatraqan’ epin”?—1 Tim. 6:19.
2. Nemene la ini hne së hna xome qa ngöne la tulu i Iosea Joxu?
2 Thele Iehova Jë: Maine hetre ewekë ngöne la ua hnei epuni hna majemine kuca memine la fami i epun, ewekë ka lolo catre lai. Ngo thaa tro kö a mekune ka hape tro hë la ewekë cili a acatren a lapaune i epun. Maine epuni a ajan troa “ate Akötesie,” loi e tro epuni a inin troa ketre sipu thele Iehova. (Ite edomë 2:3-5; 1 A. l. ite jo. 28:9) Celë hi ewekë lai hna kuca hnene la ketre thöthi ka Joxu ene Iosea. Ngacama hna hetru angeic hnine la ketre hnalapa ka thaa nyipi loi kö ngöne la götrane la ua, ngo ame pe, “hnei [angeic hna] nyi qan troa thele Akötesi Davita qaqa i [angeic]” ngöne lo angeic a 15 lao macatre.—2 A. l. ite jo. 34:3.
3. Troa thele Iehova tune kaa hnene la itre thöth Keresiano enehila?
3 Tro nyipunieti a thele Iehova tune kaa? Troa wange hnyawa la itre hnei epuni hna mejiune kow, me ‘thele troa isa atre’ laka nyipunieti hnyawa hi ngöne la nyipici. (Rom. 12:2) Hanawang la ketre ceitun, atreine kö nyipunie troa qejepengön la hnei Tusi Hmitrötr hna qaja göi madra maine amaman la enyipicin laka nyiqaane musi hë la Baselaia i Akötresie e koho hnengödrai qaane hë lo 1914? Ame la troa hetrenyi la “wangate hmekune la nyipici,” tre celë hi ketre ewekë lai ka sisitria matre troa eköthe hnyawa la ketre trepen thatraqane la mele elany.—1 Tim. 2:3, 4.
4. Nemene la aqane tro la ketre atr ka cainöje hë ngo thaa hna bapataisone petre kö a amamane ka hape angeic a kökötr ngöne la ua?
4 Nyimu thangane catr la hnei Iosea hna thele Akötresie. Qëmekene tro angeic a 20 lao macatre, hnei angeic hna catre troa apaatren qa ngöne la nöj la hmi ka thoi. (2 A. l. ite jo. 34:3-7) Ketre tune mina fe, troa mama hnene la itre hnei epuni hna kuca ka hape epuni a kökötr ngöne la götrane la ua. (1 Tim. 4:15) Maine thaa hna bapataiso epuni pala kö, tupathe jë troa amacane la aqane cainöje i epun. The tro hmekuje kö a tro fë itusi trootro. Loi e troa xome pala hi la Tusi Hmitrötr matre troa acatren la itre mekune hnei epuni hna troa ce thawa memine la itre atr, me troa akökötrene la aja ka eje thei angatr. (Rom. 12:7) Celë hi ewekë ka troa xatua epuni troa kökötr ngöne la götrane la ua.
5. Nemene la itre jëne troa akökötrene la huliwa ne cainöje i epun, huliwa ka ijije hmekuje kowe la itre ka xome hë la bapataiso?
5 Hamë Iehova Jë La Ka Sisitria Koi Nyipunie: Ame ngöne la epuni a amamane koi Iehova hnene la bapataiso laka hnei epuni hna sa xepu koi Nyidrë, ene pe kolo hi lai a acili nyipunie nyine hlue i Iehova. (2 Kor. 3:5, 6) Kolo fe lai a fe koi epuni la itre jëne tro epuni a nyihlue i Iehova ngöne drai ka pexej. Kola qaja la huliwa ne pionie maine troa huliwa hnine Bethela, maine mesinare, maine ka troa huliwa pena e cailo fen. Ame la itre xaa aqane troa akökötrene la huliwa ne cainöje i epun, tre ene la troa inin la ketre qene hlapa maine troa tro pena troa cainöj ngöne la ketre götran gaa aja ixatua.
6. Tune kaa la aqane tro së asë a eköth la ketre trepene ka loi thatraqane la itre drai elany?
6 Eje hi lai laka thaa ijiji së asë kö troa hane xome la itre hnëqa cili, ngo atreine tro së isa ala caas a hamëne koi Iehova la ewekë ka sisitria hne së hna atreine troa kuca. (Mat. 22:37) Ngacama isa pengöne la itre ewekë hnei epuni hna melën, ngo loi e ame ngöne la mele i nyipunie tro pala hi nyipunie a catre nyihlue i Iehova. (Sal. 16:5) Maine tro nyipunie a kuca tune lai, eje hi lai laka tro hë nyipunie a eköth thatraqai nyipunie la ketre trepene ka loi nyine thatraqane la itre drai elany.