“Lapa Maca Jë Nyipunie”
1 Ame ngöne lo ketre ewekë ka tru hna perofetan hnei Iesu göne la fene hnengödrai celë, hnei nyidrëti hna hmekë së wanga troa thepe së hnene la itre ewekë hne së hna kukehnine ngöne la mel. (Mat. 24:36-39; Luka 21:34, 35) Pine laka thatre kö së la ijine troa nyiqaane la akötre atraqatr, haawe, nyipi ewekë catr tro sa wangatrun la hna qaja hnei Iesu kola hape: “Lapa maca jë nyipunie, ke ngöne la ijine hnei nyipunie hna tha mekune kö, te, tro ha traqa la Nekö i at.” (Mat. 24:44) Nemene la ka troa xatua së kowe lai?
2 Loi e Troa Cile Kowe La Itre Hne Së Hnehengazon Memine La Itre Nyine Madrin Ka Troa Athixötrë Së: Ame la ketre hnö ngöne la götrane la ua nyine tro sa thupën, tre, ene la troa “kuke hnine kowe la mele celë.” (Luka 21:34, ith. e cahu fen, MN) Ame ngöne la itre xaa nöj, jole catr troa kapa la itre ka nyipi ewekë thatraqane la mel, qa ngöne laka ijin pëkö huliwa, nge tru catre la itre thupene mo. Ame pena ngöne la itre xaa nöj, tre hna majemin troa thele troa hetrenyi la itre mo. Maine easë a hnehengazon la itre mo ne fen nge kola nyiqaan troa musinën la mekuna së hnene itre ej, canga tro hi a luuzi lo itre lolo ne la Baselaia hne së hna mejiune kow. (Mat. 6:19-24, 31-33) Kola xatua së hnene la itre icasikeu troa lapa mekune hnyawa pala hi la itre eloine ne la Baselaia. Hapeu, eje kö thei epuni la sipu aja, ene la troa sin la nöjei icasikeu asë?—Heb. 10:24, 25.
3 Tru catr enehila la itre nyine madrin e celë fen ka canga troa xome la itre traeme së ka sisitria. Troa ketre hnö la ordinatör e tro la ketre atr a xome la itre hawa i angeic ka nyimutre matre troa goeë ëternet, maine troa e me iupi fë la itre tus jëne ej, maine troa elon la itre elo hnine lai ordinatör. Nyimutre mina fe la itre hawa hna troa aluuzin hna wai televizio, me sinema, me ae drai ngöne la ketre huliwa ka thue madrin, me e la itre zonale me itre xaa ewekë ju kö, me kuci elo, matre kösë co pë hë hnei traeme së maine trenge catre së troa kuca la itre aja ngöne la götrane la ua. Maine hetre thangane ka loi ngo thaa qea pe la itre hnepe ijine mano maine itre hnepe ijine nango madrin, ngo sisitria catre kö la itre manathith hna troa kapa qa ngöne la hna inine la Tusi Hmitrötr hne së isa ala caas me hnine la hnepe lapa, ngöne laka ka cile huti itre ej. (1 Tim. 4:7, 8) Hapeu, nyipunieti kö a thele ijine troa thele me mekune ngön la Wesi Ula i Akötresie ngöne nöjei drai?—Efe. 5:15-17.
4 Easë a olene atraqatr la hna hnëkëne hnene la organizasio i Iehova la ketre porogaram ne ini ngöne la götrane la ua, matre troa xatua së troa “ateine [hne së] troa kötene la nöjei ewekë asë celë ka tro ha traqa me troa icilenyi qëmeke ne la Nekö i ate”! (Luka 21:36) Epi tro së asë a kepe thangane la itre hna amekötine cili me ‘amamane laka ka lapa maca së,’ ene pe tro la lapaune së a “qaja aloine me atrune me alolon, e mamapi Iesu Keriso.”—1 Pet. 1:7.