Loi e Pëkö Jole Troa Nyihlue i Iehova

¹ “Manathithi la nöj’e Iehova la Akötresi angatr!” (Sal. 144:15) Hapeu la itre hna ithahnata celë i Davita ka mele palakö itr’eje ngöne la itre hne ijine së enehila itre drai ne la ngazo (Efe. 5:16)? Nyipici! Tru palahi la madrine ne la itre keresiano troa nyihlue i Iehova. Tha ewekë kö lai ka hmaloi palahi koi së. Ame enehila, ke, satana a aciane la itre jole koi së, nge “itre drai ne akötr” a anyipicine hmaca ka hape sasaqe catre hë la ijine tro la Baselaia i Akötresie a apatrene trije la fene celë hna tithe hnene la ngazo matre nyihnane hnene la fene hnengödrai ka hnyipixe, nge ka lolo. (2 Pet. 3:13) Tha tro kö la melöhleme ne la fene celë a apijongene maine thaapine pena la ukahlokine ka palulu ne la mejiune ka hamëne la manathith; nyipi pëkö, loi pe ame la mejiune së kowe la Baselaia, ke, eje palahi a hudrume trootro. Hapeu, hetre madrine së kö troa nyihlue i Iehova ngöne la fene zine la melöhleme? — Fil. 2:15.

² Loi e tro së isa alacasi a wange hnyawa palahi la aqane tro së a nyihlue i Iehova. Pine nemen? Pine laka ame Satana tixene hë angeice la nöjei pengöne aqane iajolë. Hnene la tusi ka qeje pengöne la itre hna ithahnata, ene lo dikisionere hna hamëne la aliene la “iajolë” kola hape: “hna amenune la mekune ne la atr qangöne la gojenyi hnei angeice hna ajane troa xötrën, hnene hmaca la itre xaa jol.” Qane lo ijine waja ukapië Satana kowe la fen, hnei angeice palahi hna amenune la atr. Hnei angeice hna kuca la nöjei pengöne aqane nyinyithina matre atriane la atr qangöne la itre mekune ka nyipiewekë catre ngöne la hne ijine së. (Hna Ama. 12:9) Nyipici, itre hadredre lao macatre ne cainöjëne hnyawa la maca ka loi ne la Baselaia hnene la angetre anyipici Iehova, ngo alaije la ka trotrohniine la enyipiewekëne la troa ahmitrötrëne la atresiwa i akötresie memine fe la troa trotrohniine ka hape cilë hë la hna nyijoxu i nyidrë jëne la Baselaia? Alaxalaithe catre hi. (1 Ioane 5:19) Maine easë a wange laka itre miliare lao atr hnei Satana hna ajolëne e celë fen, hawe loi e tro se a thupëne wanga tro fe la itre nyinyithina i angeice a atriane la mekune së matre cile ju së troa nyihlue i Iehova. Ngazo pe alanyimu la itre trejine me easë ka jötre hnine la ihnö, ene la itre iajolë i Satana. Hna atrianyi angatre hnene la itre mekune i angatre ka hnyipixe. Nyimutre catre enehila la nöjei pengöne qeqene iajolë. Hanawang, tro së a ce wange la itre xan.

³ Itre ejolene göi aqane mele me hni kowe la itre mo: Ame ngöne la itre nöje ka nyimutre, hna angazone la hnine la itre atr hnene la pë huliwa me elë la itre thupene nöjei ewekë thatraqane la mel. Nyipici tro së a thele troa hetrenyi la itre nyine xen, me nyine hetrëne me troa hetre hnalapa, thatraqa së me fami së. Ame pe e kukehnine catrëne hë së la itre ewekë celë tro hë itr’ej’a lapane la götrane ga sisitria ne la mekune së. Nge tro hë lai a thipatrëne la huliwa së kowe la Baselaia hnene la itre mo hne së hna ajane kowe la mele së. Hna hamëne hnei Paulo la eamo celë ngöne la tusi Heberu 13:5, 6. Hnei Iesu hna qaja fe ka hape tha tro kö a kukehnine hnei angetre pane thele la Baselaia; ke, tro Iehova a hamëne la hne së hna ajane ka ijije thatraqane la mele së. (Mata. 6:25-34) Kola öhne hne së la enyipicine ngöne la mele ne la itre ka nyihlue i Iehova lapa me itre pionie.

⁴ Ame la fene i Satana, ke, ka aciane the së la hni koi mo. Nge aliene la mele ne la itre milio lao atr enehila la troa thele xane palahi la itre loi i angatre me thele la nyine thupë angatr. Hna hetrenyi ngöne la ijine i Iesu la itre qeqene la itre iajolë ka tune lai. Hna hnyingë Iesu hnene la ketre tane lapa thupëtresiji trenamo la nyine kuca matre ijiji nyidrë troa hetrenyi la mele ka thase palua kö. Öni Iesu sa koi angeic: “Maine aja i ö troa meköt, troja itöne la ite ewekë i’ö, me hamëne kowe la ange pë ewekë, nge tro eö a hete tenga mo e hnengödrai; nge trojë fe ma xöte thenge ni.” (Mata. 19:16-23) Nyine amamane hi lai laka hnene la itre mo hna thingi jëne la thupëtresiji troa nyihlue i Iehova ngöne la hni angeice ka pexej. Itre trenga mo la aliene la hni angeic. Atre hnyawa Iesu laka tro angeice a hune e troa nuetrije la itre qeqene iajolë. Nge itr’eje hi la ka ajolëne matre tha nue asë kö angeice la mele i angeice koi Iehova. Hawe tune ka fe së? Huliwa catre palahi së kowe la mele ka tru ejolen? Tha hna ketr jë kö hnen’eje la huliwa së koi Iehova? Hapeu, tha hna thingi jë së kö troa catre fë la maca ka loi hnene la itre mo? (Mata. 6:24) Hapeu matre tha xome hi së la ka ijije thatraqane la mele së troa atrune pe la itre huliwa ne ua?

⁵ Itre ka ajolë së ngöne la nöjei drai: Maine tha tro kö së a hmekën, ke, tro la itre jole së ngöne la nöjei drai a apë ijinë së troa kuca la itre huliwa ne la ua. The thëthëhmine kö së lo ijine i Noa, kola sikusikune hnene la itre atr la itre ewekë thatraqane la mele ne la ngönetrei, ene la nyine xen, me nyine ij, memine fe la troa faipoipo, me troa thele föene la itre nekö i angatr, nge tha nyipiewekëne hë angatre la itre ithuemacanyi hna cainöjëne hnei Noa, ene la troa apatrene la fene hnene la iwë. Nge thatre kö angatre utihë la traqa la iwë, me cengöne tro thei angatr’asë. Hnene la itre qeqene i iajolë hna xomi angatre kowe la meci palua. Hnei Iesu hna qaja ka hape: “Troa traqa hmaca la Neköi ate, tune lo ijine i Noa.” (Mata. 24:37-39) Hna wangatrehmekune enehila thene la nöjei atr asë laka hna xome la mele i angatre ka pexeje hnene la nöjei ajane la mele matre pë hmaca kö ijine i angatre troa drenge la itre ithuemacanyi hne së hna trofë trongën. Paatre hnyawa ha thei angatre la mekune kowe la itre ewekë ne la ua.

⁶ Tuneka la mele së, hna ajolëne kö eje hnene la nöjei huliwa së ngöne la drai, matre co pe hi la ijine tro së a kuca la itre ewekë ne la ua? Ame ngöne la ketre ijin, hna kepe Iesu hnei Maretha me Maria ngöne la hnalapa i nyidro. Maria pe a drenge hnyawane la wesi ula i nyidrë, nge Maretha a “ngazo hnehene la itre huliwa i nyidro ka kösau.” Angeic’a sikusikune la aqane troa kapa hnyawa la trehnyiwa. Nge tha öhne hë angeice laka ka sisitria catre pala kö la troa drei Iesu. Celëhi matre hnei nyidrëti hna qaja menyikëne koi angeice ka hape tha loi kö troa nyi xaa jol; ngo loi pe hetre ijine troa drenge la itre mekune qangöne la ua. Hapeu, tha thatraqa së fe kö la hna eamo celë? (Luka 10:38-42) Hna qaja mina fe hnei Iesu ka hape, wange kö së la aqane troa xeni atrunyi me iji atruny, wanga hace jë la hni së troa ajane catrëne la itre ewekë celë. Ame la itre hneijine enehila ka jole kowe la atr, loi e tro palahi së a wange la aqane tro së a mel. — Luka 21:34-36.

⁷ Aqane thele la itre nyine amadrinën: Ame la ketre qeqene iajolë i Satana ka amenu së qangöne la itre ewekë ne la Baselaia, ke, ene la aqane thele la itre nyine amadrinën. Hnene la itre milio lao atr qathene la itre hmi ka qaja ka hape keresiano fe angatre hna nyihazene la itre nyine amadrinën. Hnei angatre hna ajane troa kuci madrine hune la troa qatixenyëne hnyawa la wesi ula i Akötresie. (2 Tim. 3:4) Ejehi, ame la itre nyine amadrinëne ka pë engazon, ke, itre ewekë ka loi. Ngo ame pe, e tru hë la itre traeme hne së hna xome kowe la itre ewekë cili ngöne la nöjei wiik, ceitune memine la wai televizio me sinema me video me kuci elo me e tusi me itre xaa nyine aluzi traeme ju kö, ke, tro itr’ej’a eköthe the së la hni ka iaö me iananyi së me Iehova. (Ier. 17:9; Heb. 3:12) Troa traqa tuneka la itre ewekë celë? Ame ngöne la itre ijine icasikeu, ke, patre fe kö la mekune së, nge ease hi a lapa treqene la traeme ne fenes, matre bëeke jë së troa thele la nyine amadrinën. Saqe së hi thele kepine troa lapa hnalapa matre tha sine së la icasikeu maine tha cainöje trootro. Ijine tro hi së lai a canga wange hnyawa matre tha tro kö la itre nyine amadrinën’a ajolëne la mele së. (Luka 8:14) Hapeu matre tha nyihnane pe së lo itre ijine kuci madrine hnene la itre ewekë ka troa xatua së troa kökötre ngöne la ua?

⁸ Itre mekune hnapine ka xome la traeme së: Hnene la itre xane hna löhnine la itre mejene qa thene la atr göi troa apatrene la itre jole qa la fen. Tro la itre keresiano a ananyine la itre kuci ithahnata cili ka pë pune, ene la troa ithahnataane la itre ejolene la mele maine, ene la kola isi gufa troa hetrenyi la meköt. (Ioane 17:16) Ame la nöje pengöne ewekë celë, ke, aqane huliwa i Satana troa amenune la atr matre trotrije pi angeice la itre hna eamo hnene la Tusi Hmitrötre memine fe la nyin la itre akötre ka troa cile huti, ene la Baselaia i Akötresie. Maine kola qaja angazo së, maine kolo pena a atë la thoi koi së, tro së a thupëne tha tro kö a thele troa iatëkeune, wanga thixötre pi së, nge thëthëhmine pi ka hape atre anyipici Iehova së. Qangöne lai, easë a troa adronyi Iehova, ngo tro pe lo a ahmitrötrene la atresiewa i Nyidrë. — Isa. 43:10-12; Mata. 6:9.

⁹ Nyipici, aja së isa alacasi troa hetrenyi la mele ka pë ethane, ngo ame pe e tro së a drenge menune me thele menune la nöjei aqane nyinyine la itre meci hna lapa ahnithe koi së, ke, tro la itre ewekë celë a lapane la göhnë ka sisitria ne la mekune së. Ngacama alanyimu catre la ka ithahnataane atrune la itre pengöne aqane rezime me nöjei pengöne drösinoe nyine xom, ngo e tro pe së a drenge la kola ahnithe la itre nyin la nöjei meci cili, ke isazikeu. Isa qanyi së troa iëne la aqane nyinyine la itre kucakuca së, ngo tha tro kö la itre ewekë cili a ahnuthe la huliwa së ka tru, ene la tro së a catre cainöjëne trongëne la Baselaia i Akötresie, lo sipu nyin kowe itre atr ne la fene hnengödrai ka kucakuca. — Isa. 33:24; Hna Ama. 21:3, 4.

¹⁰ Cile huti ju, nge the enienije kö: Drai ne la pune a saqe trootro, nge ketre catrecatre Satana ajolëne la atr troa nyihlue koi Iehova. “Thipe tiji nyëne pi, nge cile huti ju nyipunie ngöne la lapaun” (1 Pet. 5:9) Nemene la nyine tro së a kuca? Tro së a xeni la itre trenge ewekë i Akötresie. (Mata. 4:4) Tha tro pi kö së a nue la itre jole ne la fene celë troa xome la göhnene la itre traeme tro së a hamëne kowe la fami së, nge ka ijiji së troa thele hnyawa la itre mekune matre lapa mekune la wesi ula i Akötresie. Ame ngöne la itre traeme ne ce xeni memine la fami, ke, ijine tro lai a porotrikëne la itre hna kuca ka loi hnene la itre xaa trejine maine itre isitoare ka ithuecatr. Loi e troa hetre porogarame ne ini tusi së hna troa eatrëne palahi me troa hnëkëne hnyawane la itre icasikeu.

¹¹ Loi e tro së a thithi fë koi Iehova matre tha tro kö la ite ewekë hne së hna kukehnine a ethe trije la itre mekune së ka loi me ka tingetinge. Nge ejehi laka, tha tro kö a lueluëne laka tro Iehova a thupë së hnyawa. (1 Pet. 5:7) Nge epi tro la tingetinge i nyidrë a thupëne la itre hni së me itre mekune së (Fil. 4:6, 7) The nue kö la nöjei qeqene iajolë troa ahnuthe la itre ewekë ne la ua hne së hna goeën. Loi e tro palahi së a ami Iehova qëmeke së tune lo tulu hna amamane hnei Iesu. (Ite Hul. 2:25) Goeëne meköti jë la ewekë hne së hna thele troa traqa kow, tune la hna qaja ngöne la tusi Itre Edromë 4:25-27 kola upi së troa: “Goe meköti ju la lue meke i ö, nge tro la lue inemeke i ‘ö a cile meköti qëmeke i ‘ö, mate cile huti la nöjei goje i ‘ö asë. The jea kö kowe la götrane maca me mi.”

¹² Loi e tro së a sine lapaane la itre icasikeu, nge inine jë troa drenge la ini qangöne la wesi ula i Akötresie. (Heb. 2:1; 10:24, 25) The thele kö la itre nyine amadrinëne qathene la fene ka ngazo, loi pe xeci qa kuhu hni la troa kuca la huliwa ka hetre alien, nge ka hetre thangane ka loi. Nge tro ej’a hamëne koi së la nyipi manathithi memine la madrin. (1 Thes. 2:19, 20) Celëhi matre tha tro kö a nue la ketre ewekë maine ketre atr troa ajolëne la huliwa ka hmitrötre hne së hna lapa fë. “Cile huti ju nyipunie the enienije kö, nge catrejë troa huliwa i Joxu palahi, ke ate hë nyipunie laka tha gufa kö la huliwa i nyipunie kowe la Joxu.” — 1 Kor. 15:58.