Ka Iakeukawany La Troa Qaja Aloine La Itre Xaa Atr
1 Kola latresi la nekö jajiny qëmekene tro nyëne a meköl me thele ka hape: “Hapeu thaa ka loi kö la thinang ngöne la drai celë?” Ketre ewekë lai hna hnehengazon hnene la thine i nyën. Ngacama öhne hi eahlo la ejolen kowe la nekön troa thiina ka loi ngöne la drai, ngo hnei eahlo hna sixane troa qaja aloinyi nyën, maine hnepe ka co hi hna troa qaja. Ame lai hace ne la nekönatr jajiny, tre, nyine tro hi lai a amekunë së asë laka, maine thöth me qatr, ngo nyipi ewekë catr troa iqaja aloiny. Hapeu easë kö a hane akeukawan la itre xaa atr hnene la aqane wangatrune së la loi hnei angatr hna kuca?—Ite edomë 25:11.
2 Nyimu kepin ka upi së troa qaja aloine la itre trejine me easë Keresiano. Kola catre huliwa hnene la itre qatre thup memine la itre drikona, memine la itre pionie, matre troa eatrën la itre hnëqa i angatr. (1 Tim. 4:10; 5:17) Kola catre hiane hnene la itre keme me thin ka xoue Iehova la itre nekö i angatr la itre jë i Iehova. (Efe. 6:4) Kola isine hnene la itre thöth Keresiano matre troa thipetrij la “[“ua,” MN] ne fen.” (1 Kor. 2:12; Efe. 2:1-3) Ame itre xan tre angatr a nyipici ngöne la aqane nyihlue i Iehova, ngacama qatre hë, me tru la mec, maine itre xaa itupathi ju kö. (2 Kor. 12:7) Loi e tro fe a qaja aloinyi angatre asë. Öhne fe kö së la trengecatr hnei angatr hna kuca troa nyihlue i Akötresie?
3 Loi e Qaja Aloinyi Së Hnyawa Isa Ala Caas: Easë asë hi a madrine hnyawa la kola qaja aloine la ekalesia asë. Ngo ketre ka iakeukawanyi catre kö la troa qaja aloinyi së isa ala caas. Hanawang la ketre ceitun, ame ngöne la mekene 16 ne la tusi Paulo koi angetre Roma, tre hnei nyidrëti hna qaja aloinyi Fibi, me Perisila me Akula, Perisila me Akula, Trufaina me Trufosa, me Peresi me itre xane ju kö. (Rom. 16:1-4, 12) Drei la madrin me ithuecatr hna kapa hnene la itre hlue cili ka mele nyipici koi Akötresie! Itre aqane iatrunyi lai ka amamane hnyawa kowe la itre trejine me easë trahmanyi me föe laka, ka nyipi ewekë angatr koi së nge ketre kola aiasenyi së catr itre hlue i Iehova. Hapeu, hane kö epuni qaja aloine la ketre atr ngöne la itre hnepe drai ka ase hë?—Efe. 4:29.
4 Qa Kuhu Hni: Maine easë a ajan troa hetre thangan la aqane iaqaja aloinyi së, haawe, loi e qa kuhu hni së la itre hne së hna troa qaja. Canga atreine hi troa trotrohnin hnene la atr maine qa kuhu itre hni së la hne së hna qaja, maine kolo pena a ‘ihnyimasai.’ (Ite edomë 28:23) Maine tro sa inine troa goeën la itre thiina ka loi thene la itre xan, haawe tro ha eje e kuhu hni së la ajan troa hane qaja aloinyi angatr. Epi tro pala hi së a hetre ajan e kuhu hni së troa qaja aloine la itre xaa atr, me atrehmekune hnyawa laka “ame la tenge ewekë ngöne la ijin’ eje, te nyipi loi!”—Ite edomë 15:23.