Loi e Troa Wanga Atrune La Itre Xaa Atr—Hnene La Hna Hane Qaja Aloinyi Angatr
1 Ketre ixatua ka tru kowe la itre atr la easë a hane qaja aloinyi angatr, ke kola upi angatr troa kuca la loi, nge kola ithue madrine i angatre fe. Nyimutre la itre trejine ka öhne laka, ame la angatr a qaja aloine la ketre atr hna cainöje kow, ene pe canga drei angatre hi hnene la itre atr ngöne la hna cainöje trootro. Nemene la aqane tro sa qaja aloine la itre atr ngöne la easa thele troa ce thawa me angatr la maca ka loi?
2 Loi e Troa Atreine Atreine Waiewekë: Ame hë lo Iesu e koho hnengödrai, hnei nyidrëti hna öhne me madrine la itre huliwa ka lolo hna kuca hnene la sevene lao ekalesia ne Asia. (Hna ama. 2:2, 3, 13, 19; 3:8) Ketre tune mina fe la easë a cainöje kowe la itre atr, laka, maine troa hetrenyi the së la hni ne ajan troa xatua angatr, haawe, tro ha upi së troa thele la itre jëne troa qaja aloinyi angatr. Maine jë troa qaja aloine la itre atr pine la hna nyidrawane la xötreithe la hnalapa, maine keme maine thine pena a amamane la ihnimi angatr kowe la itre nekönatr, maine ketre tane lapa pena ka hnyimahnyima me ibozu me nöjei itre atr. Hapeu, epuni kö a hane öhne me thele troa kepe thangane ka loi qa ngöne la itre ewekë cili matre troa cainöj?
3 Loi e Tro Së a Itre Ka Drenge Hnyawa: Ame ngöne la easa cainöje kowe la itre xaa atr, xome jë la itre hnyinge ka lolo matre troa upi angatr troa hane qaja la itre sipu mekuna i angatr. Atrunyi angatre jë hnene la hna hane drenge hnyawa la itre hnei angatr hna qaja. (Rom. 12:10) Ma tro fe hë së e cili a qaja aloinyi angatr pine la ketre mekune hnei angatr hna hamën, nge thaa tro kö a jole tro sa eköthe la porotrike së hmekune la itre mekune hnei angatre hna hamën.
4 Loi e Troa Atreine Thele Ewekë: Nemene la nyine tro sa kuca e qaja jë hnene la ketre atr la ketre mekune ka thaa ihmeku kö memine la nyipici e hnine la Tusi Hmitrötr? Thaa loi kö e troa canga lepe trije la mekun ka tria; loi pe troa pane olene kowe lai atr la itre trenge ewekë hnei angeic hna qaja, nge sisedrëne jë ka hape, “Eni a öhne laka nyipi ewekë koi epuni la mekune celë.” (Kol. 4:6) Nge maine kola catre fë mekun hnene la ketre atr, ngo tro pala hi sa catre troa qaja aloinyi angeic, pine laka hetre hni ne ajane i angeic troa ithanatane lai mekun. Maine tro sa ithanata amenyiken kowe la ketre atr ka catre icilekeu memine la maca ka loi, maine jë tro ha apujene la hni angeic.—Ite edomë 25:15.
5 Troa nyipi ewekë la aqane ixatua së, e qaa kuhu hni së la easa qaja aloine la itre atr. Celë hi aqane ithanata lai ka lolo nge ka atrunyi Iehova, nge maine jë ka troa hane hule la itre xaa atr troa drenge la maca ne Baselaia.