Loi e Tro Sa Akökötrene Hnyawa La Aqane Imelekeu Së Me Iehova
1. Nemene la hna trotrohnine hnyawa hnene la ketre trejine föe ngöne la pengöne la itre hna majemine ngöne la götrane la ua hnei angeic hna trongëne pala hi?
1 Hna qaja hnene la ketre trejine föe ka hape: “Eni a wangatrehmekune hnyawa enehila laka kolo hë la a troa 20 lao macatre ne eni ngöne la nyipici, ngo kösë eni hi a tro troa icasikeu me cainöje trootro.” Nge eahlo mina fe a qaja ka hape: “Ngo eni a öhne hnyawa laka, maine nyipici laka ka nyipi ewekë catr la itre hna amekötine cili, ngo thaa ijije hmekuje kö itre eje troa xatua ni ngöne la itre jol hnei eni hna cile kow. . . . Eni a trotrohnine hnyawa enehila laka loi e tro ni a wenë amekötin la aqane waiewekë i eni me eköth la ketre porogaram ne troa ketre inin la Tusi Hmitrötr, nge eje hi lai laka tro hë ni a inine troa atre Iehova hnyawa me hnimi Nyidrë, me kapa madrin la ewekë hna hamën hnene la Hupuna i Nyidrë.”
2. Pine nemen matre nyipi ewekë troa akökötrene la aqane imelekeu së me Iehova?
2 Maine easë a ajan troa eköth la aqane imelekeu së me Iehova, nyipi ewekë tro sa catr. Thaa ene hmekuje kö la troa majemine kuca la itre huliwa hna amekötin kowe la Keresiano. Maine tro sa sixan la troa ithanata pala hi koi Iehova, eje hi lai laka ame hë la pun, kösë ame pë hë Nyidrëti koi së tre ketre enehmu hne së hna thaa iöhnyi me porotrik memin. (Hna ama. 2:4) Tro sa ce wange la aqane troa isa inine la Tusi Hmitrötr me troa thith, lue ewekë ka troa xatua së troa akökötrene la aqane imelekeu së me Iehova.—Sal. 25:14.
3. Nemene la aqane troa wang la isa ini tus ka troa xatua së troa easenyi catre koi Akötresie?
3 Jëne Iamele La Troa Thith Me Thele Mekun: Kola ithuecatr koi së troa isa inin la Tusi Hmitrötr, ke jëne tro hi lai a akökötren la lapaun ngöne la itre hni së; ngo thaa kolo lai a hape tro hi a siji hatren la itre mekune kii, me goeën la itre xötr ne la Tusi Hmitrötr. Ame la troa isa inin la Tusi Hmitrötr, tre ene la troa mekune ngöne la itre ithuemacany ka amaman la itre jë i Iehova, me itre hna amekötin, me thiina i Nyidrë. (Eso. 33:13) Maine tro sa thele troa trotrohnin la itre ewekë ngöne la götrane la ua, eje hi lai laka, tro ha ketr la itre aliene hni së me upi së troa mekune hnyawa la itre sipu aqane mele së. (Sal. 119:35, 111) Ame la hna thel jëne la easë a isa inine la Tusi Hmitrötr, tre, ene la troa easenyi catre koi Iehova. (Iako. 4:8) Maine easë a ajan troa hetre thangane ka loi la sipu ini tusi së, loi e tro së a thele ijin thatraqane ej me göi hnë troa ini, nge troa thele troa eatrëne pala hi la hna mekune troa kuca. (Dan. 6:10) Ngacama tru catre hnei jole së, ngo hapeu, hane kö së ami ijine ngöne la nöjei drai troa thele mekune ngöne la itre thiina ka lolo catre i Iehova?—Sal. 119:147, 148; 143:5.
4. Tune kaa la aqane tro la thithi hna kuca qëmekene la sipu etidi së a xatua së troa acatrene hnyawa la aqane imelekeu së me Iehova?
4 Ka nyipi ewekë catr la thith maine easë a ajan troa hetre thangane la sipu ini tusi së. Nyipi ewekë tro sa hetrenyi la uati hmitrötre i Akötresie, pine laka eje a troa ahlën la itre aliene hni së, me upi së troa “nyi hlue madi Akötesie memine la metöte me qou.” (Heb. 12:28) Qa ngöne lai, loi e tro pala hi së a sipo Iehova la uati hmitrötre i Nyidrë, qëmekene la nöjei ijine easë a troa isa inine la Tusi Hmitrötr. (Mat. 5:3) Ame ngöne la easë la thele mekune ngöne la itre xötr ne la Tusi Hmitrötr me xome la itre itus nyine ixatua hna hamën hnene la organizasio i Iehova, easë hi lai a fe la itre hni së koi Iehova. (Sal. 62:8) Ame la troa xome tune lai la etidi së, celë hi ketre aqane tro lai a thili koi Iehova; ketre easë hi lai a amamane la hni ne ajane së troa nyihlue i Nyidrë me acatrene hnyawa la aqane imelekeu së me Nyidrë.—Iuda 20, 21.
5. Pine nemen matre nyipi ewekë koi së troa thele mekune o drai ngöne la Wesi Ula i Akötresie?
5 E hune la nöjei aqane imelekeu asë, nyipi ewekë tro pala hi së a akökötren la aqane imelekeu së me Iehova, matre troa mama hnyawa lai ngöne la mele së. Qa ngöne lai, epi tro pala hi së a thele ijine ngöne la nöjei drai troa easenyi koi Akötresie, me atre hnyawa laka, tro fe hë Nyidrëti a easenyi catre koi së.—Sal. 1:2, 3; Efe. 5:15, 16.