Kola Sa La Itre Hnyinge i Nyipunie
◼ Troa xecie hnyawa tune kaa koi së laka pexeje la traeme hna isa sa kowe la hnëqa göne la itre icasikeu ne la ekalesia?
Ame ngöne la easë a ce thawa la itre mekune ka lolo memine la itre enehmu së, thaa öhne kö së la kola tro la traem. Celë hi la kepin matre, ketre jole ka tru la troa eatrëne hnyawa la itre traeme hna sa kowe la itre hnëqa hna troa cile fë ngöne la ijine icasikeu. Nemene la ka troa xatua së troa kuca hnyawa la hnëqa thenge la traeme hna sa?
Troa nyiqaan ngöne la traeme hna sa. Ame ngöne la kola icasikeu hnene la ekalesia, maine jë ka loi e troa pane isa lapa göhnen qëmekene troa nyiqaan la porogaram, nge thupene lai, kola xejë la icasikeu ngöne la traeme hna sa. (Ate Cai. 3:1) Ame ngöne la kola icasikeu hnene la itre gurup ka co, tune lo icasikeu qëmekene troa cainöje trootro, thaa tro kö a treqene la itre ka traqa hmitr.
Loi e troa hnëkë hnyawa. Ame la ketre aqane troa kuca matre thaa tro kö a sasaithe la traem, tre ene la troa canga hnëkë hnyawa la itre götrane qa. Loi e troa nualai hnyawa ngöne la he së la aliene la hnëqa hne së hna troa cile fë. Wangatrehmekune ju la itre mekune ka tru, nge amamane hnyawa jë la enyipiewekëne itre ej. Thaa tro pi kö a nue la itre hnepe mekune ka co troa ajeanyi së qa ngöne la itre mekune ka tru. Thele jë troa ahmaloeëne la aqane trotrohnine la itre mekun nyine nyitrepen. Maine hetrenyi la itre iamacany maine kola troa hnyinge kowe la ketre, loi e troa canga anyimua amacane pala hi itre ej. Maine ijij, tre pane amacane jë la hnëqa i epun matre troa wange göi traem, nge e catrëne jë.
Loi e troa thawa nyimutren la itre mekun hna troa eköth. Maine epuni a troa kuca la ketre cainöj, maine troa ce ithanatan la itre mekun, loi e troa thawa nyimutren la itre mekun matre troa isa eköthe itre ej. Mekune hnyawa jë la etrune la traeme hna troa xom thatraqane la isa götrane cili, nge sija ju ezin. Thupene lai, thupëne hnyawa ju la aqane eatrëne la traeme hna sa ngöne la epuni a cile fë la hnëqa. Ame ngöne la kola ce ithanatane la itre mekun ngöne la ketre ijine icasikeu, thaa tro kö a hmitre menu ngöne la itre pane mekun ne la hnëqa me ithanatan atrune pala ha itre ej, wanga troa nyimenyimëne la itre mekune ka tru hna troa ce wange thupen. Loi e tro la itretre xomiujine la ini ne la zonal La Tour de Garde, a nue ijine troa ce wang la itre mekune hna eköhagen ngöne la pune la ini. Loi e tro mina fe angatr a thupën matre thaa tro kö xome la traeme hna hnëkëne thatraqane la nyima ne nyipun me thith.
Loi e troa nyipun ngöne la traeme hna sa. Maine nyimu hnëqa hna troa kuca, tune la Icasikeu Ne La Huliwa, loi e tro la itre ka troa kuca la itre hnëqa a isa goeëne hnyawa la ijine angatr a nyiqaan me nyipune la hnëqa i angatr. Nemene la nyine troa kuca maine kola öhne laka ase hë sasaithe la hawa? Maine jë atreine hi tro la caas maine nyimu ka cile fë hnëqa a pane nuetrije pë hë lo itre mekune ka co, ngo tro hi a amexeje la itre mekune ka tru, pine laka thaa ijije hë la traem. Ame la atre kuca tune lai, tre atre hamë ini ka maca angeic.
Ame la aqane tro sa xatuane la trejin ka xomiujine la ketre hnëqa, tre ene la troa ahopatren la itre mekun hne së hna qaja nge thaa tro pi kö a ananyine la topik hna ithanatan. Qa ngöne lai, loi e tro asë hi së a thele troa ce eköthe la itre icasikeu së matre troa “kuca alolone me amekötin” itre ej.—1 Kor. 14:40.