Loi e Kepe Thangane Nyipunie La Ini Tus Approchez-vous de Jéhovah
1 Atraqatre pi hë la madrine së ngöne lo ijine Kovasio Ne Distrik, hna hape “Itretre Catr Cainöjën La Baselaia,” ngöne lo easë a kapa la itus, Approchez-vous de Jéhovah. Nyimutre la itre ka canga e lai itus. Nyimutre mina fe lo itre hna upe troa e lai itusi cili hnene la topike ne la macatre 2003, kola hape: “Eashenyijë koi Akötesie, nge tro nyidëti a eashenyi koi nyipunie.”—Iako. 4:8.
2 Ame ngöne la treu Maac, easë a troa nyiqaan troa ce wang la itus Approchez-vous de Jéhovah ngöne la itre Ini Tus. Tro sa kepe thangane hnyawa tune kaa qa ngöne la Ini Tus? Nyipi ewekë troa hnëkë hnyawa. Troa xome la caa meken matre troa inine ngöne la lue wiik; matre kösë thaa tro kö a tru menu hnei paragaraf hna troa kuca ngöne la nöjei wiik. Kola aijijë së lai troa tru hnei ijin ne troa hnëkën la itre paragaraf me sine thel la itre mekun hne së hna troa hamën ngöne la ijine icasikeu. Ketre, thaa tru menu kö hnei paragarafe hna troa xome ngöne lo itre wiik hmekune lo kola troa ce wange hmaca la itre mekune ka nyipune lai mekene hna ce ithanatan; kösë hna hnëkën tune lai matre troa nue ijin troa pane qaja la itre xaa mekune ka ketrepengöne ne la itus.
3 Qaane la mekene 2, hetrenyi la itre mekune hna eköhagen hna hape, “ Éléments de méditation ” hna hamën ngöne la pune la isa mekene la itus. Thupene la hna xome la paragarafe tixenuë ne la mekene la itus, tro la atre thupëne la Ini Tus a ce ithanatane memine la gurup la itre mekune hna eköhagen. Tro nyidrëti a xatuane la itre atren la gurup troa qaja amamane la itre mekune ka lolo hnei angatr hna xome qa ngöne la hnei angatr hna sine thel la Tusi Hmitrötr. (Ite edomë 20:5) The hamëne hmekuje kö la itre mekune hna eköhagen, ijije fe e itre xaa ijin troa qaja la itre xaa hnying ka tune la, hna hape: “Nemene la pengöi Iehova hna qaja koi nyipunie hnene la ithuemacanyi celë? Tune kaa la aqane ketr la mele i nyipunie hnene la ithuemacanyi cili? Tune kaa la aqane tro nyipunie a xome la ithuemacanyi cili matre troa xatuane la itre xaa atr?” Ame la kepin matre kola xome la itre hnyinge cili, tre göne la troa thele thene la itre trejin tro angatr a hane qaja la itre mekune qa kuhu itre hni angatr, ngo thaa kolo hmaca kö a troa thele troa ithanatane atrune pala ha la itre mekun.
4 Thaa ceitune kö la aqane troa ini ngöne la itus Approchez-vous de Jéhovah memine lo itre xaa itus. Ngacama kola atrunyi Iehova hnene la itre itusi asë hna hamëne hnene la “hlue ka nyipici me ka inamacan,” ngo ame kö la itusi celë tre, eje a troa ithanatane apexejene hnyawa la itre thiina i Iehova. (Mat. 24:45-47) Drei la ijine ka lolo catr elanyi la easë a troa ini ngöne lai itusi cili! Tro ha atraqatre la thangane hne së hna troa kapa qa ngöne la ejuine la ini hna hamën ngöne la thiina i Akötresie. Epi troa xatua së hnene la ini cili, troa easenyine catr la Tretretro së e koho hnengödrai, me aijiji së troa maca ngöne la aqane troa xatuan la itre xaa atr troa hane tu së.