Ini Tusi Ngöne La Itus Adorez Dieu
Adorez le seul vrai Dieu, celë hi itusi lai hne së hna ce wang memine la itre hnainin, maine fenesi hë angatr lo itus Atrehmekune. Maine tro sa wangatrune hnyawa la itusi cili ngöne la itre ijine Ini Tus Ne La Ekalesia, haawe, tro ha xatua së troa xome la jiane huliwa cili ngöne la hne së hna cainöj, nge tro fe a hane xatua së troa akökötrene e kuhu itre hni së la ihnim memine la hni ne ole së koi Iehova me kowe la organizasio i Nyidrë. Tro sa kepe thangane tune kaa la itre ini hne së hna troa kapa jëne la itus Adorez Dieu ?
Elemekene Jë Së La Etid: Pine laka easë a troa kuca asë la caa mekene la itus ngöne la nöjei wiik, loi e tro pala hi la itre qatre thup ka xomiujine la itre Ini Tusi a thupëne hnyawa göi traem. Thaa tro kö a hmitre menu ngöne la itre pane paragaraf matre troa nue ijine troa ithanatane atrun la itre mekune ka nyipi ewekë catr, a hna hnene pala hi ngöne la itre paragarafe tixenuë ne la mekene lai itus. Troa amexeje hmaca ngöne la pune la etid lo itre mekune ka tru, matre troa xatuane la itre ka sine la Ini Tus troa hnehene la itre mekune kii cili.
Hetrenyi la itre hnying nyine troa lapa mekun me troa ce ithanatan, itre eje a lapan la sin la itre mekene la itus Adorez Dieu. Tro sa öhne la itre hnyinge ka tune lai ngöne la itre götrane 48-9. Thaa nyipi ewekë kö troa e la itre hnyinge cili cememine la itre paragaraf. [1]Ame ngöne la kola ce wange itre eje memine la gurup, loi e tro la qatre thup a e la itre xötre ne la Tusi Hmitrötr me ce ithanatan maine ijije la traem.
Loi e Troa Canga Hnëkë: Ame la troa hnëkë hnyawa tre, thaa ene hmekuje kö la troa siji hatren la itre mekune ka sa la itre hnying. Nyipi ewekë troa thele ewekë hnyawa ngöne la itre xötre, tre kola troa hnëkë së, thaa göi troa hamë mekune hmekuje kö ngo ame la ka nyipi ewekë catr tre troa hnëkëne la itre hni së. (Ezera 7:10) Ijiji së asë hi troa ithuecatrekeu hnene la troa hane hamë mekun.—Rom. 1:11, 12.
Troa xatua së hnene la itre ini hne së hna troa kapa qa ngöne la itus Adorez Dieu, matre troa easenyi Iehova, nge ketre jiane huliwa ka lolo catre fe nyine tro xome matre troa xatuane la itre atr ka hni ka menyik matre tro angatr a hane caasi me easë troa hmi koi Iehova. (Sal. 95:6; Iako. 4:8) Epi tro asë hi së a kepe manathithi atraqatr qa ngöne la itre hna hnëkëne thatraqane la mele së ngöne la ua.