Xeni Ne La Ua Ngöne La Ijin Ka Ijij
1. Tune kaa la aqane eatr la tusi Ezekiela 36:29 ngöne la hneijine së?
1 Kola qaja hnei Iehova Joxu Ka Pucatin Asë ka hape: “Tro ni a . . . hëne la qite me amaman’ ej, nge tha tro kö ni a upe koi nyipunie la jin.” (Ezek. 36:29) Kola eatr enehila la itre trenge ewekë celë hna perofetan hune la nöje i Akötresie. Kösë hna hamëne hnyawa hnei Iehova la itre feja ka nyimutre nyine ithuecatr me mel kowe la nöje i Nyidrë. Kola mama hnyawa lai ngöne la itre ijine kovasio ne distrik, laka easë a kapa la göxeni ne la ua hna hamëne koi së ngöne la ijine ka ijij.
2. Nemene la aqane xome Iehova la itre kovasio ne distrik matre troa hamën la xeni ne la ua ngöne la ijine ka ijij?
2 Ame ngöne lo kola kovasio ekö ngöne lo macatre 1931, e Columbus, Ohio ketre traon e Amerika, tre, hnei Iehova hna eatrongën la itre hlue i Nyidrë, matre hnei angatr hna xome la ketre ëje ka hnyipixe, kola hape, Itretre Anyipici Iehova. (Is. 43:10-12) Ame ngöne lo macatre 1935, tre hna wangatrehmekune hnyawa lo ka ala nyimu atraqatr hna qaja ngöne Hna Amamane 7:9-17. Ame lo 1942, hnei Knorr ketre trejine trahmany, hna cile fë la ketre cainöj hna hape “Tro Kö a Cile Huti La Tingeting?” Celë hi cainöje lai ka ithuecatr troa kuca la huliwa ne cainöj me troa acian la ajane troa eköth la ini ne Gileada. Ngacama hetrenyi kö la itre kovasio hne së hna thaa thëthëhmin, ngo ame pe tre, hna hamëne pala hi ngöne la ijine ka ijij la göxeni ka lolo catr nge ka mana ngöne la götrane la ua, jëne la itre kovasio asë.—Sal. 23:5; Mat. 24:45.
3. Nemene la nyine tro sa kuca matre tro sa kepe thangane ka loi qa ngöne la pui ne xen hna hnëkëne koi së jëne kovasio ne distrik?
3 Tune Kaa La Aqane Xeni Së? Maine thaa hne së kö hna thele troa xen ngacama tru la xen, eje hi lai laka, tro sa ceitune me itre atr hna thaa ithuane hnyawa. (Ite edomë 26:15) Ceitune hi lai memine la xeni ngöne la götrane la ua. Hna wangatrehmekun ngöne lo itre xaa ijine kovasio, laka, ala nyimu la itre ka cil agö me porotrik ngöne la itre hnë tro. Maine nyipici laka ka lolo catr la tro sa iöhnyi me porotrik ngöne la itre ijine kovasio, ngo ame pe tre hetre ijine kö kowe la itre ewekë cili, ene lo qëmeken me thupene la itre icasikeu. (Ate Cai. 3:1, 7) Maine thaa lapa drenge kö së la itre cainöj ngöne la itre göhnë së, tro sa trian la itre mekune ka sisitria. Loi e tro la itre atren la fami a ce lapa, ngo thaa tro kö angatr a nue la itre nekö i angatr memine la itre thöth troa ce lapa ananyi angatr. Maine hetre nyine troa ithanatane göne la itre ewekë ne la kovasio hnene la itre qatre thup memine la trene hnëqa ngöne la kovasio, thaa nyipi ewekë kö troa ithanatane menune pala ha ngöne la itre ijine kola icasikeu. Ngo maine thaa nyipi ewekë kö, tre loi e tro pe angatr a amamai tulu ngöne la aqane hane drenge hnyawa angatr la itre cainöj. Loi e troa apine la itre mobilis me itre xaa ewekë ka tune lai, wanga tro itre eje a ajolëne la itre atr troa drenge la itre hna qaja. Loi e tro sa thele troa kapa asë la itre göxeni ngöne la götrane la ua, hna hamëne jëne la kovasio.—1 Kor. 10:12; Fil. 2:12.
4. Tune kaa la aqane tro sa isa amaman la ole së kowe la itre göxen ne la ua ka mana hna hamëne koi së hnei Iehova?
4 Drei la madrine së troa kapa qaathei Iehova la itre ini ka sisitria catr, thaa tune kö lo itre ini ka thoi nge ka wahla hna hamën hnine la hmi ka thoi! (Is. 65:13, 14) Ame la ketre aqane tro sa ‘isa amaman la ole së,’ tre, ene la troa xome la kovasio ceitune me ketre ijine Iehova a ini së. (Kol. 3:15) Catre pi së troa qatixenyëne la maca hna hamën hnene la trejin, me kapa lai maca ceitune me ithuemacany qaathene la ‘Atre Ini Ka Tru.’ (Is. 30:20, 21; 54:13) Loi e tro sa drenge hnyawa. Xome jë la itre mekune ka tru nge cinyihane ju itre ej. Wange hmaca ju itre eje ngöne la isa hnalapa së e nöjei hej. Trongëne jë la hne së hna inin.
5. Nemene la itre kepin nyine troa amadrinë së hne së hna kapa jëne la itre kovasio ne distrik?
5 Ame la itre kovasio asë hna kuca qëmekene e Amagedo, ngacama hna hnene ju hë ngöne la ketre hna kötre matre troa zae hnene la itre atr, maine ngöne la ketre götrane gaa isi, maine ngöne ketre götrane gaa tingeting, ngo nyine amamane hi lai laka thaa hune kö Satana! Qa ngöne la ihnimi ka eje the së itre trejin, haawe, easë a madrine atraqatr troa ce tro ala nyimu troa sin la itre kovasio ne distrik. (Ezek. 36:38) Easë a mejiune laka tro hmaca Iehova a hamën cememine la ihnim “la xen, edö [së] ngöne la ijin.”—Luka 12:42.
[Hna eköhagen götran 4]
Amamane Jë La Aqane Nyipine Së La Treipele i Iehova
◼ Troa drenge hnyawa
◼ Troa xom me cinyihan la itre mekune ka tru
◼ Wange hmaca ju ngöne la itre hnalapa së la itre mekune ka tru e nöjei hej
◼ Trongëne jë la itre hne së hna inin