Porogaram Ne Asabele Ne Sirkoskripsio Ka Hnyipixe
Ame ngöne la “nöjei ijine ka aköte” enehila, nyipi ewekë troa hetrenyi hne së la inamacan qaathei Akötresie, matre troa kepe së hnei Nyidrë. (2 Tim. 3:1) Tro la porogaram ne la asabele ne sirkoskripsio 2005 a hamë së la itre eamo ka lolo memine la itre ithuecatr; eje a troa ithanatan la itre mekun ne la taan hna hape “Loi e Troa Köja Gojenyi Së Hnene ‘La Inamacan Qa Koho.’ ”—Iako. 3:17.
Ame la pane cainöj hna thawa nyimutren tre hna hape, “Loi e Mama ‘La Inamacan Qa Koho’ Ngöne La Mele Së,” kola troa xatua së troa trotrohnine la itre mekun, ene la troa wië la thiina së, me tingeting, atreine tulu ewekë, me canga drengethenge. Thupene lai, tro la atre thupëne la sirkoskripsio a qaja hnyawa la köni xaa götran ne la inamacane qaathei Akötresie. Tro la atre thupëne la distrik a nyipune la pane drai ne icasikeu, me amamane la aqane inine la itre Keresiano matre troa qaja la inamacane qaathei Akötresie; ngacama angatre hi lo hna hëne hnene la itre xaa atr ka hape itre ka “tha ’te tus, me tha hna inin.”—Ite hu. 4:13.
Ame ngöne la hnaaluene drai, troa kuca la ketre cainöj hna thawa nyimutren hna hape “Catre Jë Kuca La Itre Ewekë Nyine Troa Acatren La Lapaune Së,” kola troa xatua së troa wangatrehmekun me neën la itre ewekë ka ananazijë së ngöne la götrane la ua. Kolo mina fe a amamane koi së la aqane tro sa ithuecatr kowe la itre xaa atr ngöne la itre ijine icasikeu ne la ekalesia, ngöne la hna cainöje trootro, me e hnine la fami. Ame la taan la cainöj kowe la ka ala nyim, tre hna hape, “Tune Kaa La Aqane Tro Sa Kepe Thangane Ka Loi Qa Ngöne La Inamacane i Akötresie,” kola troa akökötrene hnyawa la ole së kowe la itre manathith hne së hna kapa, ngöne la easë a trongëne ngöne la mele së la itre trepene meköti qa hnine la Tusi Hmitrötr. Ame la taan la cainöj ka nyipune la icasikeu, tre hna hape, “Troa Thupë Së e Hne Së Hna Huliwa Thenge La Inamacane Qaathei Akötresie,” kola troa acatren la aja ka eje the së troa ujë koi Iehova matre troa sipo Nyidrëti la inamacane i Nyidrë ngöne la itre drai tixenuë enehila.
Ame la ketre ewekë ka tru ngöne la itre ijine asabele, tre ene laka kola xome la bapataiso hnene la itre atr. Kola troa ce wang ngöne la porogaram ne asabele lo Ini Ne Cainöj Qaathei Akötresie memine la Ini ne La Tour de Garde thatraqane la wiik. Iehova a ajane tro asë hi së a kepe thangane ka loi qa ngöne la inamacan hna hamën hnei Nyidrë. Troa akökötrene hnyawa la mele së ngöne la götrane la ua, hnene la itre eamo memine la itre ithuecatr hne së hna troa kapa ngöne la ijine asabele ne sirkoskripsio.—Ite edomë 3:13-18.