Loi e Tro Sa Amaman Laka Easë a Sajuën La Mekun Troa Pionie
1. Nemene la aqane tro nyipunieti a qejepengöne la mekun ne troa pionie?
1 Maine thaa ijiji së asë kö troa xome la huliwa ne pionie, ngo ame pe ijiji së asë hi itretre cainöjën la Baselaia troa hane sajuën la mekun ne troa pionie. Ame asë hi la itretre cainöj, tre angatre asë hi a catre thele troa trongën la hna amekötin, ene la troa cainöj me inine la itre atr. (Mat. 28:19, 20; Ite hu. 18:5) Angatr a kukehnine la itre atr me kuca asë la hnei angatr hna atrein troa cainöjën la maca ka loi. (Mat. 9:36; Ite hu. 20:24) Hetre hni ne ajan la itre hlue i Iehova troa kuca la ka nyipi ewekë, matre troa xatuan la itre xaa atr troa atre la nyipici. (1 Kor. 9:19-23) Tro sa pane ce wange la tulu ne la ketre atr ka amamane la hni ne ajan cili, ene Filipo ketre atre tro fë evangelia.
2. Tune kaa la aqane troa xötrethenge hnene la itre qatre thup memine la itre drikona la aqane catre xome Filipo la huliwa ne cainöje trootro?
2 Kola Cainöj Me Hamë Ini: Hna xome hnyawa hnei Filipo la itre hnëqa i angeic ka tru e hnine la ekalesia ngöne lo hneijine i Iesu. (Ite hu. 6:1-6) Ngo ame la pane ewekë, tre, angeic la ketre atre catre cainöjëne la maca ka loi. (Ite hu. 8:40) Haawe, ame ngöne la kola xom enehila hnene la itre qatre thup memine la itre drikona la itre hnëqa i angatr, ijije hi tro angatr a amaman laka angatr a sajuën la mekun troa pionie, hnene la aqane madrine angatr troa elemeken la huliwa ne cainöj. Drei la ketre ithuecatre ka tru kowe la ekalesia!—Rom. 12:11.
3. Tune kaa la aqane tro sa xome la mekun ne troa pionie ngöne la easë a qëmeke kowe la itre itupathi ka tru?
3 Thupene la hna humuthi Setefano, kola elë la icilekeu matre jole catr la mele ne la itretre dreng. Ngo hnei Filipo pala hi hna catre cainöj, nge hna jëne angeic matre kola hane nyiqaane cainöje koi angetre Samaria. (Ite hu. 8:1, 4-6, 12, 14-17) Ijije hi tro sa hane xötrethenge la tulu cili, ene la troa catre cainöjën la maca ka loi ngöne la easë a qëmeke kowe la itre itupathi ka tru, nge thaa tro kö a ië hna hnim ngöne la easë a cainöje trootro.—Ioane 4:9.
4. Nemene la tulu ne atre hamë ini hna amë pe hnei Filipo?
4 Kola mama ngöne lo kola kapa hnene la eunuka ne Aithiope la nyipici, laka ka atreine Filipo troa inine la itre atr la Wesi Ula i Akötresie. (Ite hu. 8:26-38) Ame la ketre aqane tro sa amamane ka hape, easë a sajuën la mekune troa pionie, tre, ene la troa akökötrene la atreine së troa xome la Tusi Hmitrötr me troa ‘thele ewekë hnine ej.’ (Ite hu. 17:2, 3) Loi e tro sa tui Filipo, troa thele troa hane cainöjën la maca ka loi kowe la itre atr ngöne la itre götran easë a öhnyi angatr, me ngöne la nöjei ijin.
5. Nemene la ka troa xatuan la itre keme me thin Keresiano troa eköth la mekun ne troa pionie thene la itre nekö i angatr ka co?
5 Hnepe Lapa Me Ekalesia: Lolo catr la thangane la aqane ujë me tulu i Filipo kowe la itre nekö i angeic jajiny. (Ite hu. 21:9) Ketre tune mina fe enehila, ame la itre keme me thin Keresiano ka catre kuca la itre aja ne la Baselaia ngöne la mele i angatr, angatre hi lai a ithuecatr kowe la itre nekö i angatr troa hane kuca tune mina fe. Maine troa kucakuca hnene la keme me thin ngöne la pune la wiik, ngo nyidroti a thele troa cainöje kowe la itre xaa atr, ijije hi tro la aqane ujë cili a ketr la hni ne la nekö i nyidro, nge ka lapa hut la tulu cili thei nyën.—Ite edomë 22:6.
6. Tune kaa la aqane tro sa amamane la hni ne ole së kowe la itre pionie ne la ekalesia së?
6 Hnei Filipo hna hane kepe Paulo me Luka lue Keresiano ka catre nue la mele i nyidro kowe la huliwa i Iehova. (Ite hu. 21:8, 10) Tune kaa la aqane tro sa amamane la ole së, memine la aqane xatuane së la itre trejine ka catre cainöj ngöne la hneijine së enehila? Maine jë ijije hi tro sa sipone troa ce huliwa memine la itre pionie e hmakany maine hnaipajö ngöne lo itre ijine thaa tru menu kö hnei ka cainöj. (Fil. 2:4) Tro mina fe së a hë angatr kowe la itre hnalapa së matre troa nango ce porotrike me angatr. Ngacama isa pengöne la itre aqane mele së, loi e tro asë hi së a thele troa sajuëne la mekun ne troa pionie.