Loi e Maca La Alameke Së

1. Nemene la aliene la hna hape troa maca la alameke së, nge pine nemen matre nyipi ewekë catre lai?

¹ Ame ngöne la Cainöje i Iesu hune la Wetr, hnei nyidrëti hna amamane hnyawa la thangane la alameke së ngöne la götrane la ua, kowe la mele së ka pexej. Öni nyidrëti ka hape: “Qa ngöne lai, e maca la alameke i ’ö, ame hna ce ngöne lai pi la ngönetrei i ’ö. Ngo e ngazo la alameke i ’ö, ame hna cengöne jidi la ngönetei i ’ö.” (Mat. 6:​22, 23) Ame la troa maca la alameke së, tre ene la troa caa hna goeëne hmekuje hi, ene la troa kuca la aja i Akötresie, ngo thaa tro kö a thepe së hnene la hna hnehengazone menune pala ha la itre mo ne ngönetrei. (Mat. 6:​19-​21, 24-​33) Nemene la ka troa xatua së troa catr maca la alameke së?

2. Nemene la aqane waiewekë göne la itre ewekë ne ngönetrei hna upi së hnei Tusi Hmitrötr troa xom?

² Loi e Troa Mejihnine La Hna Hetreny: Hna amekötine hnei Tusi Hmitrötr, laka loi e troa thele la itre ka nyipi ewekë thatraqane la itre atrene la hnepe lapa. (1 Tim. 5⁠:⁠8) Ngo thaa kolo kö lai a hape troa thele ju pë hë la itre ewekë ka tru menu pala ha memine la itre ewekë ka xötrei traqa ngöne la nöj. (Ite edomë 27⁠:20; 30:​8, 9) Kolo pe a upi së hnei Tusi Hmitrötr troa mejihnin la itre ewekë, ene la troa hetrenyi la “xeni me ixete,” celë hi itre ka nyipi ewekë lai thatraqane la mel. (1 Tim. 6⁠:8; Heb. 13:​5, 6) Maine tro sa wangatrun la eamo cili, ijije hi troa xatua së troa maca hnyawa pala hi la alameke së.

3. Nemene la ka xatua së troa neën matre thaa tro kö sa ketre sipu thue ehnefe së kö?

³ Loi e Hetrenyi së la inamacan matre troa neën troa nyi ehacen la mele së hnene la hna xomi gufa menu, me itö menu, maine troa lö hnine la itre ewekë ka troa xome la traeme me mele së. (1 Tim. 6:​9, 10) Tune kaa la aqane tro sa neëne lai? Ame ngöne la easë a axeciën la ketre mekun, nyipi ewekë tro sa mekune hnyawa lai ngöne la thith me thele maine thaa tro jë kö elanyi la ewekë cili a sewe së troa eatrën la itre aja së ngöne la götrane la ua. Loi e tro sa catre troa amë panën ngöne la mele së la itre ewekë ngöne la götrane la ua.​—Fil. 1:​10; 4:​6, 7.

4. Pine nemen matre nyipi ewekë tro sa ahmaloeën la aqane mele së?

⁴ Loi e Troa Ahmaloeën La Aqane Mele Së: Ame la ketre ewekë ka xatua së troa cile kowe la aja mo, tre, ene la troa thele troa ahmaloeën la aqane mele së. Kola öhne hnene la ketre trejine trahmany laka lolo la aqane mele ne la fami, qa ngöne laka thaa hna thele menune kö la itre mo ne ngönetrei; öni angeic ka hape: “Tru hë enehila hnei ijinenge troa xatuan la itre trejine me eni hnine la ekalesia. Eni a mejiune laka Iehova a amanathithin la itre hlue i Nyidrë, ngöne la angatr a amë panën la nyipi hmi qëmekene la itre sipu aja i angatr.” Hapeu, ijije kö tro nyipunieti a kapa la itre manathithi ka tru qa ngöne la hnei nyipunieti hna ahmaloeën la mele i nyipunie?

5. Pine nemen matre nyipi ewekë troa catre maca hnyawa pala hi la alameke së?

⁵ Loi e tro pala hi së a catre troa cile kowe la itre iajojezi Satana, ene la fene i angeic ka aja mo, memine laka itre atr ka ngazo së. Thaa tro pi kö sa nue la itre lue meke së troa goe menu, ngo loi e tro pe së a thele troa kuca la aja i Akötresie me ati mekëne pala hi la mejiune ka sisitria, ene la mele ka thaa ase palua kö.​—Ite edomë 4:​25; 2 Kor. 4:​18.