Ka Maca Kö La Alameke i Nyipunie?
1. Kola hapeue la troa ‘maca la alameke së’?
1 Hetre thangane la itre ewekë hne së hna goeën ngöne la aqane ujë së. Ka ihmeku hnyawa la mekune cili memine la trenge ewekë i Iesu celë, kola hape: “Qa ngöne lai e maca la alameke i ’ö, ame hna cengöne laipi la ngönetei i ’ö”! (Mat. 6:22) Maine ka “maca” la alameke së ngöne la götrane la ua, tro hë eje a amamane hnyawa la aja ka sisitria catr nyine tro sa eatrën, ene la troa kuca la aja i Akötresie. Easa amë panëne la Baselaia, nge loi e thaa tro kö a ajeanyi së qa ngön hnene la hna nyinyape thele mo maine hnene pena la itre huliwa ka troa sewe së troa cainöj.
2. Nemene la ka troa atriane la aqane waiewekë së, ngo nemene la ka troa xatua së?
2 Nyipi Ewekë Tro Sa Isa Wai Pengöne La Mele Së: Ijije troa atriane la aqane tro sa goeëne la itre ewekë ka nyipi ewekë kowe la mele së, hnene la itre ithuemacany hna hamën jëne televisio maine jëne pena la itre ewekë hna hetreny hnene la itre xan. Qëmekene troa nyinyape thele la ketre aja maine pena troa itöne la ketre ewekë ka troa xom atrune la itre hawa së me manie së me trenge catre së, tre, loi e tro sa pane “e la thupen” hnene la hna isa hnying, ka hape, ‘Hapeu, tro jë kö la ewekë celë a akökötrene la aqane tro ni a huliwa koi Iehova, maine sewe ni pena?’ (Luka 14:28; Fil. 1:9-11) Ketre, loi e tro sa wange lapaane la aqane tro sa ahmaloeëne la mele së, matre tro sa akökötrene la aqane cainöje së.—2 Kor. 13:5; Efe. 5:10.
3. Nemene la ini hne së hna xom qa ngöne la tulu ne la ketre trejine föe ka ahmaloeëne la mele i eahlo?
3 Ame ngöne la kola nyiqaane pionie lapaa hnene la ketre trejine föe, tre, hnei eahlo hna mekune troa huliwa pala hi ngöne la drai ka pexej, ngacama ijije hi tro eahlo a huliwa ngöne la sine la drai me sajuëne la itre aja i eahlo. Öni eahlo ka hape: “Thatreine kö la ketre atr troa nyihluene la lue maseta. Hnenge hna nue la itre ewekë hnenge hna ajan matre troa sajuëne la itre aja ka nyipi ewekë kowe la meleng. Hnenge hna wanga atrehmekune laka ka troa ae la itre mo ne fen, nge tro hë ni a kucakuca hnene la hna nyinyape thele itre ej.” Hnene la itre jole cili hna upi eahlo troa ahmaloeëne la mele i eahlo me hane saze huliwa, ene pe aijijë eahlo troa xome pala hi la huliwa ne pionie.
4. Pine nemene matre nyipi ewekë enehila troa maca pala hi la alameke së?
4 Hnene laka easa melëne la itre hneijin ne la pun, nyipi ewekë catr troa maca pala hi la alameke së. Kola tro la itre drai nge easa easenyi catre kowe la pune la fene ka ngazo celë me xejë kowe la fene ka hnyipixe i Akötresie. (1 Kor. 7:29, 31) Maine tro pala hi sa catre cainöj, eje hi lai laka, tro hë sa amele së kö memine fe la itre atr ka drei së.—1 Tim. 4:16.