“Nemene La Nyine Tro Ni a Kuca?”
1 Tune la ketre thöthi a easenyi troa thupëtresij, maine jë hnei epuni hë hna hane ketre hnyinge ka hape, ‘Nemene jë la nyine tro ni a kuca thatraqane la meleng?’ Kola ajane hnene la itre thöthi troa akökötrene la aqane xome angatre la huliwa i Iehova, ene la troa cainöj. Ngo pine laka, macatre ne tro hë epuni a isa huliwa thatraqane la mele i epun, haawe, nemene la aqane tro epuni a xome la hnëqa cili, ene la troa cainöjëne la maca ka loi? Maine jë thaa ka hmaloi kö troa sa la hnyinge cili.
2 Ame koi itre xaa thöth, ke angatre a qouene la itre ejolene la mele enehila, me lueluëne la itre drai elany. Maine jë tro angatre a isa hnyinge ka hape: ‘Loi jë kö e tro ni a sisedrëne la itre ini i eni? Hapeu, ka loi kö tro ni a canga hane nue asë la melenge ka pexeje kowe la huliwa ne cainöj?’ Maine kola ajane hnene la ketre atr troa axeciëne hnyawa la nyine tro angeice a kuca, haawe, nyipi ewekë tro angeice a nyipici ngöne la kola sa la hnyinge celë ka hape, ‘Nemene la ka nyipi ewekë koi ni?’ Loi e tro angeice a waipengöne hnyawa la itre aja ne la hni angeic.
3 Nemene la hnei epuni hna hnehengazone ngöne la epuni a thöth? Hapeu, epuni a thele mani, maine epuni a thele hnene la hni ka ajane troa nue la mele i epuni thatraqane la itre huliwa ne la Baselaia? Ame ngöne la hnedrai së, ke, thaa hnene kö laka, ka qa hna ini ngöne université ke, tro ha hetre huliwa. Ame itre xane ke, angatre a thele troa kuca la ketre porogarame ne ini hmekune la itre huliwa hna sipone catrëne enehila; maine ngöne lo götrane hna hape École professionnelle maine École technique, maine pena troa xome la hnepe ijine ka xoxopatre hi troa pane ini ngöne université.
4 Lapaune Jë Kowe La Itre Hnei Iehova Hna Thingehnaean: Ame la ketre ewekë ka sisitria catre nyine troa wangatrune hnyawa, ke, ene la mekune ka eje thei Iehova Akötresie, laka, tro hë Nyidrëti a xatuane pala hi la itre atr ka amë panëne la itre huliwa ne la Baselaia ngöne la mele i angatr. (Mat. 6:33) Thaa ka gufa kö la hna thingehnaeane celë. Nyimutre la itre trejine ka sine la Ini Thatraqane la itre Drikona, itre trene pepa; enehila atre hë angatre la nyipici, ngo nemene la mekune i angatre kowe la troa huliwa i maseta? Ala xalaithe hi angatr, angetre huliwane ngöne la mele i angatre lo itre pepa hna kapa qa ngöne la hna ini. Ala nyimu pe la itre ka thele huliwa hnine la itre entreprises, tune la troa thelë maine xupi uma, matre atreine troa pionie, nge kolo mina fe a xome hnyawa la itre hnëqa thatraqane la mel. Pine laka, angatre a akökötrene la huliwa i angatre ngöne la hna cainöje trootro, haawe, angatre fe a kapa la itre manathithi ka sisitria catre kö hune la mani.
5 Ame ngöne la epuni a troa axeciëne la hnei epuni hna troa kuca thupene la hna kapa la itre pepa, pane mekune ju me waipengöne hnyawa la itre aja ka eje e kuhu hni epun. Maine epuni a ajane troa atreine iëne hnyawa la nyine tro epuni a kuca, haawe, wange ju la ithuemacanyi celë, hnine la zonal, Réveillez-vous ! ne 8 maac 1998, götrane 19-21. Ce ithahnatane ju la mekune cili, memine la itre keme me thine i epun, me itre qatre thup, memine la atre thupëne la sirkoskripsio, me itre pionie ka huliwa hnyawa ngöne la götrane i epun. Celë hi ka troa xatua epuni lai, troa hetrenyi la inamacane matre troa axeciëne hnyawa la hnei epuni hna troa kuca ngöne la mele i epun.—Ate cai. 12:1, 13.