Loi e Tro Sa Treqe Iehova
1. Nemene la taan la kovasio, nge pine nemen matre ka nyipi ewekë catre la taane cili?
1 Hna cinyihane hnei Isaia ka hape: “Akötesie ka meköti Iehova. Manathith angate asëjëihë angete teqe anganyidë.” (Is. 30:18b) Nyimutre la itre hna qaja hnei Tusi Hmitrötr ngöne la aqane apaatrene Akötresieti la itre ithupëjia me Nyidrë, nge amelene ju pë hë la itre hlue i Nyidrë ka mele nyipici. Nemene la itre ini hna xome qa ngöne la itre ewekë cili hna kapa hnene la itretre thili koi Iehova enehila? Nemene la nyine tro sa kuca enehila matre troa hnëkë kowe la “drai ataqate me hna qouen”? (Ioela 2:31, 32) Kola troa upi së hnene la Kovasio Ne Distrik “Calemi Catre Hë La Iamele!” troa mekune hnyawa la itre hnyinge celë me troa isa thele ewekë ngöne la itre sipu aqane mele së. Kola troa xatua së troa treqe Iehova.
2. Tro sa amamane tune kaa la hni ne ole së kowe la kovasio ne distrik?
2 Hne së kö hna hane hnëkë matre troa kepe thangane hnyawa qa ngöne lai köni drai ne la kovasio? Drei la ketre ceitun, hane kö së easenyine la maseta së matre troa hane sipo ijine mano? Thaa tro kö sa wangesixane la ewekë cili. Loi e tro pe a thithi thatraqane lai. Thupene lai, tro jë troa sipo. (Neh. 2:4, 5) Ketre, thaa tro pi kö sa uthe la itre drai ne troa hnëkë göi gojeny, me göi uma, me itre xaa ewekë ju kö. Kola amamane hnene la aqane hnëkë celë, la ejuine la hni ne ole së kowe la porogaram ne thue xeni ne la ua i Iehova. Loi e troa thele pala hi hnene la itre qatre thup troa xatuane la itre ka aja ixatua göi itre hnei angatr hna amekötine thatraqane la kovasio, tune la itre qatre trahmanyi me qatre föe e hnine la ekalesia.—Gal. 6:10.
3. Nemene la itre thiina nyine troa amamane hnene la nöje i Iehova ngöne la traon hnë kovasio ngön?
3 Kola Atrunyi Akötresie Hnene La Aqane Ujë Ka Loi: Ame la easa traqa ala nyimu kowe la itre ijine kovasio, tre, celë hi itre ijine tro sa amamai thiina ka loi kowe la itre atr. Nemene la nyine tro sa kuca? Ame ngöne la easa tro kowe la hna kovasio, tre, loi e troa akeukawane la hni ne la itre atr hnene la itre thiina së ka lolo, tune la troa xomihni ahoean, me hni ka menyik, me xomihni, me atreine ce mel. (Gal. 5:22, 23; Fil. 4:5) Loi e troa eje the së asë la ihnimi ka “tha thina ka qali kö, tha ate thele ewekë i nyëne kö, tha ate canga elëhni kö.” Ngacama troa traqa la itre jol maine itre ngazo, ngo ame la aja së tre, ene la troa “kuca asë [la] nyine atrunyi Akötresie.”—1 Kor. 10:31; 13:5.
4. Troa xatuane tune kaa hnene la itre keme me thin la itre nekö i angatr, matre tro nyudreni a xome la itre aqane ujë ka troa atrunyi Iehova?
4 Thupene la ketre kovasio, hnene la ketre ka cilë otel hna haine la aqane ujë memine la pengöne la ketre thöthi ka hmi, ene pe nyidrëti a qaja jë la aja i nyidrë troa kapa me könëne “pala hi la Itretre Anyipici Iehova hnine la otele i nyidrë.” Drei la ketre madrine ka tru! Kolo hi lai a amamane hnyawa la eloine la aqane inine me hiane la itre nekönatr hnei nyipunie, itre keme me thin. Thaa ka loi kö tro la itre keme me thin a nue la itre nekö i angatr troa lapa hnine la itre otel nge pëkö ka thupë angatr. Loi e troa thupëne hnyawa pala hi la itre nekönatr. (Ite edomë 29:15) Epi tro la itre aqane ujë i angatr a atrunyi Iehova me amadrinëne la hni Nyidrë!—Ite edomë 27:11.
5. Tro sa atrunyi Iehova tune kaa hnene la aqane heetre së me iseji së?
5 Loi e Troa Heetre Me Iseji Hnyawa: Loi e tro sa thupën la aqane heetr me iseji së ngöne la ijine kovasio matre pëkö nyine troa qaja ka ngazo hnene la itre atr. Thaa tro kö a kuci thiina, me sasaithi tulu, me pi mama ngöne aqane heetr me isej. Troa thupëne la itre ewekë cili ngöne la kola tro me bëeke qa ngöne la traon hna kovasio ngön, me ngöne fe la kola ixatua troa hnëkëne la hnë kovasio, me ngöne la itre ijine kola icasikeu. Pine laka itre hlue i Akötresieti së, ame la pane hne së hna troa hnehengazon, tre, ëje i Iehova memine la hlemu loi i Nyidrë, ngo thaa itre sipu aja së kö maine pengön aqane mele së. Hnëqa ne la itre hene ne la fami troa thupëne hnyawa matre tro la itre atrene la lapa a hetrenyi la qahmihmi, me atreine tulu ewekë ngöne la aqane heetr me isej e nöjei ijin.—1 Tim. 2:9.
6. Pine nemen matre loi e troa ceitu la pengö së ngöne lo thupene itre ijine kovasio memine lo itre ijine icasikeu, laka nyipi ewekë troa hetrenyi la metrötr?
6 Ketre nyipi ewekë fe troa hetrenyi la metrötr ngöne la aqane heetr me isej ngöne la itre otel, me itre setroa, me itre hnë xen. Ijije hi tro sa tro troa xeni fë lo hna heetr ne kovasio së. Atreine hi tro sa hane cainöje kowe la itre atr ngöne la nöjei ijin, jëne lo badge ne kovasio së.—2 Kor. 6:3, 4.
7. Tune kaa la aqane tro sa kuca matre troa hetrenyi la caas memine la madrin ngöne la ijine kovasio? (Wange ju la “Nyine Amekunë Së Göi Kovasio Ne Distrik.”)
7 Hnei Isaia hna ahnithe hë ka hape: “Iehova a teqene mate hnimi nyipunie ; nge qa ngöne lai tro nyidëti a mejë mate utipi nyipunie.” (Is. 30:18a) Tro la hni ne ole së kowe la aqane utipine i Iehova memine la ihnimi gufa i Nyidrë, a upi së troa atrunyi Nyidrë hnene la aqane ujë së memine la aqane heetre së me iseji së ngöne la easa ce traqa itronyi kowe la hna kovasio. Epi tro la Kovasio Ne Distrik “Calemi Catre Hë La Iamele!” a atrune la Akötresi së me xatua së troa treqe Nyidrë!
[Hna eköhagen götran 4]
Nyine Amekunë Së Göi Kovasio Ne Distrik
◼ Traem Ne Icasikeu: Troa nyiqaane la porogaram e 9 h 30, ngöne la köni drai. Troa fe la itre qëhnelö e 8 h e hmakany. Itre hnepe menetr qëmekene troa nyiqaan la icasikeu, tro la perezida a nyiqaane lapa nge kola elone lo miuzik ne la Baselaia. Loi e tro asë hi së a ilapany, ene pe easa metrötrën la kola nyiqaan la icasikeu. Troa fenesi la icasikeu e 17 h 15 e Drai Ka Tru, 17 h 05 e Mecixen, nge 16 h 10 e Sabath.
◼ Hna Acili Loto: Pine laka hna nyifegone hi la itre hnë acili loto, haawe, thaa tru kö e itre xaa ijin la itre hnë acile itre ej. Celë hi matre, loi e troa nyialiene hnyawa la itre loto, ngo thaa ala caasi kö maine luetre e caa loto.
◼ Göi Göhnë Hnine Iuma Ne Drai: Tro hmekuje hi a ami göhnene la itre ka ce tro me easë hnine la loto ka caas, maine ka ce mele pena me easë.
◼ Xeni Hnaipajö: Ka lolo catr troa xeni la itre göxeni hna hnëkën ngöne la hnë kovasio maine troa traqa fë pena, hune la troa tro trije la hnë drai troa xomi xen ngöne la ijine mano e hnaipajö. Ijije troa amë la ketre neköi ka lepany fene la icea. Thaa hna nue kö troa traqa fë ngöne la hnë asabele la itre glasiere ka tru, me itre ver ka kaqakaqa, me kahaitr.
◼ Itre Ahnahna: Tru catr la manie hna xom matre nyi jiane la kovasio ne distrik. Ijije hi tro sa amamane la madrine së troa hane hamë ahnahna thatraqane la huliwa e cailo fen, hnine la Uma Ne Baselaia maine ngöne la hna kovasio. Maine kola hamë chèque, loi e troa sija la hna hape “A.S.T.J.”
◼ Itre Eatr Me Itre Sine Mec: Kola eetr la itre ka cilën la hnëqa hna hape Pane Ixatua, hnene laka, kola hë angatr troa wang la itre jole ka pëkö pengön. Maine kola traqa la ketre ewekë ngöne la ijine kovasio, canga wange ju lai ketre trene hnëqa easenyi së matre tro angeic a hëne nyimenyimën lo Pane Ixatua troa wai së. Maine ijij, tro pë hë a thuemacane lo numero i pital göi itre eatre ka tru.
◼ Göi Itre Atren La Icasikeu: Itre keme me thin, thaa tro pi kö a nue menune la itre nekö i epun, ngo loi e troa thupë angatre hnyawa, nge loi e troa xecie koi epuni laka nyudren a ujë thenge la aja i Akötresie.—Ite edomë 29:15.
◼ Ikaho: Thaa tro kö a saan la itre ikaho maine ketre ewekë pena ngöne la tirisite me ikaho ne la iuma ne kovasio, nge thaa tro kö a ajolën la itre atren la icasikeu hnene la itre ewekë cili.
◼ Xomi Foto: Maine kola foto ngöne la ijine icasikeu, kola sipone matre thaa tro kö a mel ngöne la kola xome la itre foto.
◼ Mobilis: Troa thinge itre ej.