Porogaram Ne La Fami—Huliwa Ne Cainöj
1 Iehova a madrin troa goeën la itre thöthi e atrune la ëje i Nyidrë. (Sal. 148:12, 13) Ame ngöne lo hneijine i Iesu, tre, ‘itre medreng me itre nekönatr a hane atrunyi’ Akötresieti fe. (Mat. 21:15, 16) Ceitune hi lai me enehila. Itre keme me thine fe, tune kaa la aqane tro epuni a xatuan la itre nekö i epun troa hane catre atrunyi Iehova jëne la huliwa ne cainöj ne la Keresiano? Tune la hna qaja fe ngöne la hna cinyihane e caha hun göne la itre icasikeu ne la ekalesia, ame la ka nyipi ewekë catr, tre, ene la tulu së. Hna qaja hnene la ketre kem la hna melën hnene la itre keme me thin ka ala nyim, ka hape: “Ame la itre nekönatr, tre, sisitria kö koi angatr la hne së hna kuca, hune la itre hne së hna troa qaja!”
2 Hnene la ketre trejine föe hna hetrun hnene la itre keme me thin ka lapaun, hna qaja ka hape: “Ame ngöne la eahuni a hlë ngöne la hmakanyi ne mecixen, thaa hne huni kö hna hnying maine tro huni a tro maine thaa tro pena huni a tro troa cainöj. Atre hnyawa hi huni la nyine tro huni a kuca.” Ketre tu së mina fe, laka, atreine hi tro sa inine la itre nekö së la enyipiewekën la troa cainöje trootro, hnene la troa eköthe la ketre porogaram ne cainöj ngöne la wiik, thatraqane la fami së. Thaa göne kö matre tro la itre nekönatr a inine troa tui epun, ngo göne matre troa aijijë epuni troa goeën la aqane ujë i angatr, me thiina, me aqane kökötre angatr ngöne la aqane tro angatr a cainöj.
3 Troa Ini Angatre Trootro: Loi e troa hnëkëne hnyawa la itre nekönatr matre lolo la thangane hna kapa hnei angatr ngöne la hna cainöje trootro, nge matre tro fe angatre a hetrenyi la madrin qa ngöne la huliwa cili. Hna qaja hnene lo trejine föe hna amexeje e caha lo hun, ka hape: “Thaa eahuni hmekuje kö a xötrethenge la itre keme me thine huni ngöne la huliwa i angatr. Atre hi huni laka, hetre huliwa huni fe, maine kolo hi a troa fenafena la qëhnelö me hamën la ketre pepa ne ihë. Qa ngöne laka, hne huni hna canga hnëkë hnyawa pala hi troa cainöj e mecixeni me sabath, atre hi eahuni la nyine troa qaja.” Ijije mina fe tro sa inine la itre nekö së, hnene la troa xome la itre hnepe menetr ngöne la nöjei wiik matre troa hnëkë angatr thatraqane la huliwa ne cainöj, maine ngöne lo ijine kola ini tusi ne la fami maine ngöne ketre ijine pena.
4 Ame la easë a ce cainöj memine la fami së, celë hi ketre ijine fe tro së lai a acatren la nyipici thene la itre nekö së. Hnene la ketre kem Keresiano hna majemine ce tro memine la nekö i nyidrë jajinyi, ngöne la nyidrëti a trongëne la itre gojenyi ka nany 10 km, matre troa tro fë la itre tarak kowe la itre atren la itre tribu ngöne la ketre götrane pena ha. Kola mekune hmaca lo itre ijine cili hnene la jajiny, öni angeic ka hape: “Itre ijine cili ne tro nyiho, la kakaa a eköthe la nyipici e kuhu hning.” (Deu. 6:7) Epi troa hetre thangane ka loi fe la hnei epuni hna ami ijine ngöne la porogarame ne la fami i epun, troa hane cainöje trootro ngöne la wiik.