Loi e Tro Sa Akökötren La Aja Ne La Itre Atr Hnene La Itre Gojenyi Ne Zonal
1. Tune kaa la aqane tro sa nyi jëne la itre gojenyi ne zonal matre troa akökötrene la aja ne la itre atr?
1 Nyimutre la itre atr hne së hna iöhnyi memin ngöne la hna cainöje trootro, ka kepe së me madrine troa xome la itre itusi së ngo luelue pe troa hane etid. Ame la ketre aqane troa akökötren la aja i angatr, tre, ene la troa tro fë zonale lapaa koi angatr. Ame ngöne la epuni a hamën la itre zonal, makëne ju la ëje me hnalapa i angeic, me ijine epuni a xötrei ithanata me angeic, memine la itre zonale hna kapa, memine la xötr hna ithanatan, ene fe lo nöjei ewekë asë ka amamane la aja ka eje thene la atr. Ame la kola traqa la itre zonal ka hnyipixe, thele jë la itre mekun hna pi ithanatan hnene la itre atr hnei epuni hna lapaa hamë zonale kow, nge amamane hnyawa jë koi angatr ngöne la epuni a wai angatre hmaca. (1 Kor. 9:19-23) Maine jë tro hë la ketre ewekë hnei angatr hna e hnine la itre zonale së a aciane la aja thei angatr troa pi atre la itre xaa ewekë.
2. Pine nemen matre nyipi ewekë troa canga thele Iehova enehila hnene la itre atr, nge nemene la nyine tro fe sa catre kuca matre troa xatua angatr?
2 Eje hi lai laka, thaa itre atr asë kö a troa nyihlue i Iehova hnene la hna ketre e ju hi la itre zonal. Pine laka nyipi ewekë tro la itre atr a canga thele Iehova enehila, nemene la nyine tro fe sa kuca matre troa xatua angatr? (Zef. 2:2, 3; Hna ama. 14:6, 7) Atreine hi tro sa akökötren la aja i angatr, hnene la hna amamane la ketre xötr ne la Tusi Hmitrötr hna iëne hnyawa, ngöne la nöjei easë a hamën la itre zonal.
3. (a) Tune kaa la aqane tro sa isa hnëkëne la caa xötr thatraqane la itre atr hne së hna troa ithanata kow? (b) Nemene la itre topik hna pi ithanatan hnene la itre atr ka ala nyimu ne la teritoare i epun?
3 Troa Xome Pala Hi La Caa Xötr Ngöne La Itre Mekun Hna Ithanatan: Mekune ju lo itre atr hnei epuni hna lapaa hamë zonale kow, nge hnëkëne jë la caa xötr kowe la itre atr isa ala caas, thenge la isa aja i angatr me itre mekune hna ca ithanatan. (Fil. 2:4) Hanawang la ketre ceitun, maine epuni a troa wang la ketre atr ka meci sinen, maine jë tro epuni a nyi jëne la itre vizit matre troa ithanatan la hnei Tusi Hmitrötr hna qaja göne la pengöne la itre ka mec memine la mejiune ne la melehmaca. Hetrenyi la itre mekun hnine la itus Comment raisonner ngöne la itre taan ne topik hna hape “ Mort ” (Mec) me “ Résurrection ” (Melehmaca) hna troa xom matre troa isa hnëkëne la caa xötr ngöne la kola ithanatane itre ej. Hetrenyi la itre xaa nyine troa ithanatan ka itretrengekeu memine la itre topike celë, tune la aqane troa apaatrene elanyi la itre sine mec, memine laka thaa tro hmaca kö a qatr me mec; itre mekune lai ka thaa jole menu kö troa ithanatan. Ame la ka nyipi ewekë tre, ene la troa öhne la ketre topik ka ihmeku memine la aja ne lai atr, nge troa amamane trongëne koi angeic la mekune i Tusi Hmitrötr.
4. Pine nemen matre nyipi ewekë troa xatuane la itre xan troa trotrohnin ngöne la easë a xome la itre xötr ne la Tusi Hmitrötr, nge tune kaa la aqane tro sa kuca?
4 Loi e Troa Trotrohnine La Itre Atr: Ngacama hna majemine ithuecatre koi së troa ahopatren me ahmaloeën la aqane tro sa ithanata memine la itre atr, ngo thaa tro hmekuje kö së a e ju hi la xötr ne la Tusi Hmitrötr. Hnei Satana hna atimekën la itre hni ne la itre atr, matre thaa tro kö angatr a trotrohnine la maca ka loi. (2 Kor. 4:3, 4) Ame mina fe la itre atr ka majemi troa e la Tusi Hmitrötr, nyipi ewekë troa hane xatua angatr troa trotrohnine ej. (Ite hu. 8:30, 31) Qa ngöne lai, tune la epuni a kuca la ketre cainöj ngöne la Ini Ne Cainöj Qaathei Akötresie, thele jë troa qeje pengöne la xötr me hamë ceitune ngön, matre troa trotrohnine hnyawa hnene la itre atr. (Ite hu. 17:3) Loi e troa xecie hnyawa koi së laka, öhne hnyawa ha hnene la atr la eloine la Wesi Ula i Akötresie kowe la mele i angeic.
5. Tune kaa la aqane troa hane inine la Tusi Hmitrötr elanyi la itre atr hne së hna lapaa tro fë zonale kow?
5 Maine kola madrine hnene la ketre atr la hnei angeic hna inin, nango aqeane ju la porotrik me hamëne la luetre maine köni xötr ne la Tusi Hmitrötr ngöne la nöjei kola iwai hmaca. Thele ijine jë troa hane amamane me ce wang la boroshür Thele, maine itus Atrehmekune. Nge eje hi lai laka, maine jë tro hë la itre atr hne së hna lapaa tro fë la itre zonale kow a hane inine la Tusi Hmitrötr me easë.