Porogaram Ne Asabele Ne Sirkoskripsio Ka Hnyipixe

Ngöne la itre drai hnapine ne la fene ka ngazo celë, nyipi ewekë tro sa thupën tro pala hi a lolo la aqane heetre së ngöne la ua me hmekën la pengö së itre Keresiano. (Hna ama. 16⁠:15) Celë hi matre ame la taan la asabele ne sirkoskripsio ne la macatre ne huliwa 2006, tre, “Xetrëne Jë La Ate Ka Hnyipixe.”​—Kol. 3:​10.

Pane Drai: Pane cainöj hna troa ce thawa, “Eëne Jë La Itre Götrane Ne La Atr Ka Hnyipixe,” troa amamane la itre manathith hne së hna troa kapa ngöne la nöjei götrane la mele së, e hna eën la atr ka hnyipixe. Nemene la aqane tro sa eën la atr ka hnyipixe? Kola troa ce ithanatane lai ngöne la lue cainöj tixenuë ne la drai, hna hape, “Isa Inine Jë Troa Meköti La Aqane Sine Thel” me “Ini Ka Eköth La Atr Ka Hnyipixe.”

Hnaaluene Drai: Aqane troa hetre thangane la atr ka hnyipixe ngöne la aqane tro sa ithanata; celë hi hnaaluene cainöj hna troa ce thawa, “Xome Jë La Aqane Ithanata Ne La Itre atr Ka Inamacan.” Ame la taan la cainöj kowe la ka ala nyim, tre, “Tro Kö Epuni a Ngaan La Atre Ka Ngazo?”; troa amaman la enyipiewekën la troa hmekën la itre nyinyithiina i Satana. Ame la lue cainöj tixenuë ne la asabele, tre, “Thupëne Nyipunieti Kö Wanga Nyi Ethanyi Epuni Jë Hnene La Fen” me “Loi e Ahmadradrane Pala Hi La Atr e Kuhu Hnin”; troa xatua së troa neën la itre thiina me itre aqane ujë ka icilekeu memine la itre jë ka meköti Akötresie, me cile catr troa hmi koi Iehova.

Drei la madrine së troa traqa itronyi elanyi troa kapa la ithuecatre cili, matre tro sa catre eën la atr ka hnyipixe!