Troa Anyipicine Thaup
1 Hnene la itre hnei Iehova hna xup hna fe amamane la itre thiina i Nyidrë ka sihngödr, ngo pëkö hne së hna dreng. (Sal. 19:1-3; Rom. 1:20) Ceitune hi lai memine la aqane ujë së ka loi, me itre thiina i Keresiano, me aqane heetr me isej ka qahmihmi, laka itre ej a anyipicin ngo thaa hnei trenge ewekë kö. (1 Pet. 2:12; 3:1-4) Aja së asë hi troa “alolone hnei angatre ngöne la nöjei ewekë asëjëihë la ini i Akötresie Atre amele shë,” hnene la isa aqane ujë së.—Tito 2:10.
2 Ijijë kö troa hane amingömingön la itre ini ne la Tusi Hmitrötr hnene la itre atr ka ngazo? Ijije hi ngo jëne hmekuje hi la Wesi Ula i Akötresie memine la mene ne la uati Nyidrë. (Sal. 119:105; 143:10) Ka “mele la wesi ula i Akötesie, me men, me ka idei hune la taua ka lue qenön.” (Heb. 4:12) Kola ketr la gaa sihngödri ne la itre hni së me aijijë së troa ketre atr ka hnyipixe. (Kol. 3:9, 10) Hetrenyi la itre wene ne la uati hmitrötr the së, ene la itre thiina ka loi tune la metrötr, thiina ka loi, me thiina ka menyik, me xömehnöth. (Gal. 5:22, 23) Easë kö a aijijën la wesi ula i Akötresie memine la ua i Nyidrë troa ketr la mele së?—Efe. 4:30; 1 Thes. 2:13.
3 Tro Itre Xan a Wanga Atrunyi Së: Ame la easë a melën la itre hna amekötin me itre thiina i Iehova, kola öhne lai hnene la itre atr. Tro sa ce wang la ceitune ne la ketre trahmanyi hna thaipiën hnene la itre sine huliwa, ke ka hopatre angeic. Ngo hna metrötrë angeice pe kö hnene la trejine föe ka ce biero me angeic. Celë hi matre hna hnyingë kepine lai hnei angeic. Ene pe eahlo a qaja jë ka hape ame la eahlo a metrötr, tre, hnene laka eahlo a trongëne la itre trepene meköti ne la Tusi Hmitrötr ngöne la mele i eahlo. Eahlo a ce thawa ju me angeic la mejiune ne la Baselaia ka lolo. Hna nyiqaane etid la trahmany me kökötr uti hë la bapataiso. Ame la angeic a bëeke kowe la nöje i angeic, kola hain hnene la itre sinee i angeic la aqane ujë i angeic; haawe, nyimutre fe hë la itre ka kapa la nyipici.
4 Epi tro la aqane ujë së ka loi ngöne hna ini, me hna huliwa maine ngöne la easë me itre sinee, me itre ka lapa easenyi së memine la hne së hna cainöj a upe la itre xan troa atrunyi Akötresie.—Mat. 5:16.