Ithuemacanyi e Cailo Fen Kowe La Kovasio Ne Distrik Hna Hape “Calemi Catre Hë La Iamele!”
Tro La Itretre Cainöj Ngöne La Nöjei Ekalesia Asë a Tro Fë La Pepa Ne Ithuemacanyi Ka Ketre Pengöne Kö
1 Kola troa nyiqaane ithuemacanyine la itre kovasio ne distrik ngöne la itre nöje calopi, me sisedrën itre ej ngöne la itre xaa götrane la fen asë, ala 155 lao nöj hna troa hnen la itre kovasio. Kola troa thuemacanyi, jëne la ketre pepa ka ketre pengöne kö, la itre kovasio ne distrik hna hnëkëne fe ngöne la itre nöj e Allemagne, Pologne, me République Tchèque, ngöne la treu Julai me wiike hnapane la treu Ogas 2006.
2 Ame la itre hnepe ijine tixenuë ne la itre drai hnapine celë, kola amamane catrën hnene la itre kovasio la hna thingehnaeane hnei Akötresie laka, troa thepe së qa ngöne la fene ka iangazo celë. Tro lai a ketr la itre atr ka hetre hni ne ajan. Tro la maca hne së hna tro fë a upi angatre troa pane lapa mekune la itre ewekë ka troa traqa elany. Kola thuecatre kowe la Itretre Anyipici Iehova e cailo fen ngöne la 98 000 lao ekalesia troa könëne la itre atr troa hane sine la kovasio i angatr, matre aijijëne la itre atr cili, itre thauzane la etrun, troa drenge la maca ne iakeukawanyi, me mejiun.
3 Loi e troa hnëkën hnene la itre ekalesia la etrune la itre pepa ne ithuemacany matre troa kapa la 30 hnei isa ala caas. Maine hetre munën, tre troa xome hnene la itre pionie ne la ekalesia. Troa nyiqaane lai huliwa ne ithuemacanyi köni wiik qëmekene la drai ne asabele hna amekötin kowe la nöjei ekalesia. Ijije hi ngöne la hnepe ijine cili tro la itre trejine a kuca asë la itre teritoare ne la ekalesia i angatr.
4 Kola thuecatre kowe la itre trejine troa isa hamëne la pepa kowe la itre atr isa ala caas. Ngo maine pëkö atrene la uma, loi e troa amë acone la pepa ngöne la qene qëhnelö. Loi e troa catr hamëne trongëne la itre pepa ne ihë ngöne la köni wiik hna amekötin.
5 Thaa luelue kö së laka ketre aqane anyipicin ka hlemu la tro sa ce xöl me caas troa hamëne la ithuemacanyi kowe la Kovasio Ne Distrik hna hape “Calemi Catre Hë La Iamele!” tune la hna qejepengöne e celë. Eahuni a thithi sai epuni matre tro Iehova a amanathithine la aqane isa catre epuni thele troa kuca la huliwa celë e cailo fen.