Loi e Tro Asë Hi Së a Ce Catre Huliwa Matre Troa Ihë Kowe La Kovasio Ne Distrik, “Xötrethenge Keriso Jë!”
Tro Hmaca La Itretre Cainöj a Thewe Pepa Ne Ihë Trootro
1 Ame lo macatre hnapan hna ithuemacanyi e cailo fen göi Kovasio Ne Distrik hna hape, “Calemi Catre Hë La Iamele!” Hetrenyi la itre atr hna ketr hnene la maca cili. Ame koi itre ka hane kapa la ihë, nge ka xötrei ce hane pui ne xeni ngöne la götrane la ua memine la Itretre Anyipici Iehova. (Is. 65:13) Madrine catre angatr la aqane keukawa me caasi ne la itre trejin. (Sal. 133:1) Haawe, kola troa xatuane hmaca la itre atr ka nyimutre troa hane sine la Kovasio Ne Distrik, hna hape, “Xötrethenge Keriso Jë!” Easë hmaca a troa tro fë la ketre pepa ne ihë ka ketrepengöne kö e cailo fen.
2 Itre Thangane Lo Macatre Ka Ase Hë: Kola mama jëne la itre ithuemacanyi hne së hna kapa qa ngöne la nöjei götrane ne la fen, laka, lolo catre la itre thangane la hne së hna ihë kowe lo Kovasio Ne Distrik hna hape “Calemi Catre Hë La Iamele!” Ame ngöne la itre götrane ka nyimutre, lolo catre la aqane qeje së hnene la itre atr. Hanawange la ketre ceitun, ame ngöne la ketre traon, tre, hna qaja atrune hnene la ketre zonal göne lo lai tro fë pepa ne ihë, ka hape: “Qëmekene troa kovasio, ke, hnene la Itretre Anyipici Iehova hna pane catre wange la itre atr ka easenyi angatr—itre hawa ne huliwa, me trongëne la itre gojenyi gaa nany, me ithanata nyimenyim.” Hna ahlëne mina fe la aja ne la ketre zonal ngöne la ketre traon, ene pe kola canga hane ithuemacanyine la maca hnene ej. Matre kösë köni zonale fe ka hane qaja la huliwa së qëmekene troa kovasio. Hnene fe la ketre atr ka xomi foto, hna cinyihane la lue götrane nge sin hnine la ketre zonal hna hnëkën göi sabath. Ej a qaja atrune la itre ini së, memine la ihnimi ne la itre trejin e cailo fen, memine lai huliwa ne tro fë pepa ne ihë, memine la kovasio. Ame ngöne la kola tro fë la pepa hnene la ketre trejine föe ngöne la ketre hnalapa, önine la föe ka hape: “Eje hi. Eni hi la a e lai hnine la zonal!” Hna qaja hnene la ketre, ka hape: “Atre hë ni la tronge i epun, nge ame enehila, tre, epuni hë la! Hapeu, pepange hë lai?” Öni eahlo fe ka hape, “Ka lolo catre la ewekë hnei epuni hna kuca itretre Anyipici Iehova.”
3 Nyimutre la itre atr ka traqa kowe la hna kovasio cememine la itre pepa ne ihë i angatr. Hetrenyi la itre xan, angatr a traqa ala nyim qa ngöne la itre traone gaa nanyi matre troa hane sin la kovasio. Kola elë la etrune la itre atr ka sine la kovasio, hnene laka, lolo la aqane catre së troa könë angatr; hna e la 27 koi 100 lao atr ka traqa troa hane sin la kovasio, tru catre kö hune lo macatre hnapan.
4 Hna Haöth Asë La Teritoar: Maine jë tro sa nyiqaane tro fë la itre pepa, köni wiike qëmekene troa nyiqaane la kovasio. Loi e troa catre kuca asë la teritoar ne la ekalesia. Ame ngöne la itre ekalesia ka tru teritoaren, maine jë tro la itretre cainöj a amë acone la itre pepa ngöne la itre hnalapa ka pë atren, ngöne la wiike tixenuë qëmekene la kovasio. Loi e troa catre hnene la itre ekalesia troa tro fë la etrune la itre pepa hnei angatr hna kapa, nge troa thele troa kuca la itre teritoar ka nyimutre. Maine hetrenyi la itre munën, tre, troa hamëne kowe la itre pionie.
5 Nemene La Nyine Troa Qaja: Maine jë tro epuni a qaja ka hape: “Eahuni a thele troa könën la itre atr e cailo fen kowe la ketre ijine ka nyipi ewekë catr laka calemi hë. Hane fe la pepa i epun. Hane kö cahu itre xaa ithuemacanyi hnine la pepa.” Maine tro sa ahopatren la aqane tro sa nyiqaane ithanata, haawe, tro ha tru catre hnei pepa hne së hna troa hamën e cailo fen. Eje hi laka, maine troa hnying la atr, sa ju lai hnyinge i angatr. Cinyihane ju la itre ithuemacanyi göne lai atr, matre troa wai angeice hmaca e hetre aja thei angeic.
6 Drei la enyipiewekën la tro sa catre xötrethenge Keriso! (Ioane 3:36) Ame hi lai easë a troa sin la kovasio, tre, kolo hi lai a troa xatua së thatraqane lai. Atreine hi tro sa nyiqaane mekune la etrune elanyi la aqane tro sa anyipicin, memine la thangane la hne së hna ce huliwa matre ihë troa sin la kovasio hna hape “Xötrethenge Keriso Jë!” Qa ngöne lai, catre pi së troa könëne la itre atr ka ala nyim troa hane sin la kovasio. Epi tro Iehova a amanathithine la isa aqane catre së troa ce huliwa me caas memine la itre trejine me easë e cailo fen.