Loi e Troa Wanga Atrune La Itre Xaa Atr, Ene Laka Thaa Tro Kö a Iwangatrehmekunyi Atr Ngöne La Kola Cainöj
1 Hnei Ioane Aposetolo hna meköle goeëne la kola sesë la ketre angela e nyipine la hnengödrai, me qaja la maca ka loi ka thaa ase palua kö, kowe la itre atr ne la “nöjei nöj’ asëjëihë, me nöjei tribu, me ite qene hlapa, me nöjei ate.” (Hna ama. 14:6) Easë kö a hane xötrethenge la tulu ne la angela, ene laka thaa tro kö a iwangatrehmekunyi atr ngöne la kola cainöj? Maine thaa thupëne kö së, atreine hi troa mama hnene la itre aqane ujë së laka, ka iwangatrehmekunyi atr së, nge troa hetre ethanyin. Tro la aqane ujë së kowe la itre atr hne së hna iöhnyi memin a hetre thangane kowe la aqane tro sa tro fë la maca ka loi koi angatr. Celë hi matre, nyipi ewekë tro sa amamane hnyawa la ihnimi ka tru e kuhu hni, ngöne la easa cainöje kowe la itre atr ka isa pengön aqane mele kö.
2 Wange Jë La Teritoare Së: Hapeu, hetrenyi kö la itre atr ka saze nöj maine ka kötrene la itre isi me ketre ewekë ju kö, nge ka mele ngöne la teritoare së? Ka loi e tro sa pane hane meku nyudren. Loi e troa thele troa pane hane wai angatr me tupathe troa hane atrepengöi angatre hnyawa. Nemene la itre hnei angatr hna nyipiewekën, itre hnei angatr hna ajan me xelen, itre hnei angatr hna hnehengazon me itre ethanyine la mele i angatr? Thele jë troa xome la ketre aqane troa tro fë la maca ne Baselaia, hmekune la itre hna ajan hnene lai itre atr. (1 Kor. 9:19-23) Loi e tro sa tui Paulo aposetolo, laka, qa së troa ce thawa la maca ka loi memine la nöjei atr ngöne la teritoare së, ene mina fe lo itre ka traqa qa ngöne la ketre nöj, ka isapengöne aqane mele kö, nge ka qaja la ketre qene hlapa, maine itre ka trene manie pena.—Rom. 1:14, ith. e cahu fen.
3 Haawe, tro epuni a cainöje tune kaa kowe la ketre atr ka ketre qene hlapa kö? Xome jë lo sine tus hna hape Une bonne nouvelle pour des gens de toutes nations. Loi e tro mina fe a xome la itre xaa tarak maine itre boroshür ngöne la itre qene hlapa hna ithanatane ngöne la teritoare së. (Wange ju la Huliwa Ne Baselaia ne Julai 2003, g. 4, par. 2-3.) Ketre, hnene la itre xaa ka cainöj hna catre thele troa hane inine la itre aqane troa ibozu me nyiqaane ithanata ngöne la itre xaa qene hlapa. Ame ngöne la itre xaa ijin, kola hai hnene la itre atr troa dreng la kola thele hnene la ketre atr troa ithanata me angatr ngöne la sipu qene hlapa i angatr, ngacama co hi la hna qaja; nge maine jë ketre aqane ujë lai ka ee angatr kowe la maca ka loi.
4 Xome Jë La Tulu i Iehova: Maine tro sa thele troa ketr la itre atr ka isapengöne aqane mel, easë hi lai a xötrethenge la tulu i Iehova, Akötresi së ka thaa iwangatrehmekunyi atr kö, Nyidrë “lo ate ajane la nöjei ate asëjëihë troa mele me wangate hmekune la nyipici.”—1 Tim. 2:3, 4.