Manathith e Troa Ketre Nue La Mele Së Kowe La Ketre Huliwa
1. Tune kaa la aqane amamane Davita me Nehemia la aja ka eje thei nyidroti troa sipu nue la mele i nyidro kowe la huliwa i Akötresie?
1 Ame ngöne la Goliatha a thele isi memine la trongene isi angetre Isaraela, pë pi kö sooc ka sipu tro troa isi me angeic. Ngo hetrenyi la ketre nekönatre trahmanyi ka thupë mamoe; ka thaa hane kö nyëne hnëkë troa isi, ngo ame pe hnei nyën hna xemine me sa la hë isi Goliatha. (1 Sam. 17:32) Ame ngöne lo kola bëeke hmaca lo itretre Iudra ka po a tro Ierusalema, thaa hnei angatre kö hna xupe hmaca lo itraetë, matre hnene la ka kepe trepe ime ne la Joxu ne Peresia hna nue la hnëqa i angeic hnine la uma me tro Ierusalema matre troa elemekene me cilëne la huliwa. (Neh. 2:5) Hnei Iehova hna amanathithine la lue thupëtresiji cili, ene Davita me Nehemia, pine la lue aqane ujë i nyidro.—1 Sam. 17:45, 50; Neh. 6:15, 16.
2. Pine nemen matre loi e tro la itre Keresiano a amamane la hni ka ajan troa nue xanën la mele i angatr?
2 Ame enehila, tre kola ae trootro la hni ne ajane la itre atr troa hamë ixatua. Ame ngöne la itre “drai hnapine” celë, tru catre la jole ne la itre atr, nge nyimutre la itre ka “hnimi angate kö.” (2 Tim. 3:1, 2) Canga tro hi a hule la mele ne la atr hnene la itre sipu aja i angeic, nge e cili troa thinge la hni angeic troa hane nue xanëne la mele i angeic troa xatuane la itre xan. Ngo ame së itre Keresiano, tre, thaa ka tune kö së lai; easa ajan troa nyitipu Iesu, lo atre nue la mele i nyidrë troa xatuane la itre xan. (Ioane 5:5-9; 13:12-15; 1 Pet. 2:21) Tune kaa la aqane tro sa amamane laka, hetre ajane së troa nue xanën la mele së troa ixatua, nge nemene la itre manathith hne së hna troa kapa?
3. Tune kaa la aqane tro la ajan troa nue xanën la mele së a hetre thangane ka loi kowe la itre icasikeu ne la ekalesia?
3 Nyine Loi Kowe La Itre Trejine Me Easë: Ijije hi tro sa hamëne la ketre “ihnimi ne [“ua,” MN]” kowe la itre xan hnene la hna hane hamë mekun ngöne la itre ijine icasikeu ngöne lo kola ce ithanatane la itre mekun. (Rom. 1:11) Ame la easa hamë mekun, tre, easë hi lai a atrunyi Iehova, me acatrene hnyawa la nyipici ngöne la itre mekuna së me itre hni së, me akökötrene la madrine së troa sin la itre icasikeu. (Sal. 26:12) Ijije mina fe tro sa nue xanëne la mele së troa kuca la ketre xötreqa ngöne la Ini Ne Cainöj Qaathei Akötresie ngöne la kola paatr la ketre trejin nge kola aja ixatua. Tro lai a xatua së troa maca me atreine troa inine hnyawa la itre atr.
4. Nemene la itre xaa aqane tro sa amamane la aja së troa nue xanëne la mele së?
4 Ijije hi tro la itre trejine a amamane la aja troa nue la mele i angatr, hnene la hna xome hnyawa la itre hnëqa e hnine la ekalesia. (Is. 32:2; 1 Tim. 3:1) Atreine hi tro së asë a ixatua matre troa tro loi hnyawa la itre asabele memine la itre kovasio, hnene la hna nue xanë së troa hane xome la itre xaa huliwa ngöne la itre ijine cili. Ame ngöne la easa nue xanë së troa ce cainöj memine la atre thup ka wange trongëne la itre ekalesia maine troa ce xeni pena me nyidrë, e cili kola “ce akeukawanyi [së me nyidrë].” (Rom. 1:12) Ame ngöne la easa hane xatuane la itre nekönatr trahmanyi ka pëkö kemen, me itre sine föe, me itre ka wezipo me sine atr, me itre thin trene haa kuku, me itre xane ju e hnine la ekalesia, e cili easë hi a kapa ju la ketre madrin, nge Iehova a kepe së fe.—Ite edomë 19:17; Ite hu. 20:35.
5. Nemene la itre ewekë göi Uma Ne Baselaia hna thele thene la itre trejin ka ajan troa nue xanë angatre kö?
5 Ame la ketre aqane tro sa nue la traeme së me trenge catre së, tre, ene la troa ixatua nyihnyawane la Uma Ne Baselaia. Ketre, pine laka nyimutre la itre atr ka atre la nyipici, haawe, kolo mina fe a aja Uma Ne Baselaia ka hnyipixe me itre trejine ka troa xupe itre ej. Hnene la lue trefën hna ajane troa hane xatuane la Kometr Ne Xupi Uma Ngöne La Nöj, ngacama pëkö pepa ne xupi uma i nyidro. Kola tro la itre drai nge hnei nyidroti hna kapa la itre ini, ame hë enehila, nyidroti fe hë a hane ixatua troa ati aglo. Kola qaja hnene la föe ka hape: “Ame la easa ce huliwa memine la itre xan, ene pe kola acatrene hnyawa la aqane imelekeu së me angatr. Ame hë ngöne la pune la drai, ngacama kucakuca së ngöne la ngönetrei, ngo ame pe keukawa la mele së ngöne la ua.”
6. Pine nemen matre ame la huliwa ne cainöj, tre, celë hi ketre huliwa ka nyipi ewekë catr nyine tro sa nue xanëne kow la mele së?
6 Ene La Troa Cainöj: Ame la huliwa ka nyipi ewekë nyine tro sa nue la mele së kow enehila, tre, ene la troa cainöjëne la maca ka loi. Pine laka hna xatuane la itre atr troa trotrohnine me trongëne la itre eamo qa hnine la Tusi Hmitrötr, haawe, hetrenyi fe hë angatr la ketre mejiune thatraqane la mel, memine la trenge catr troa trije la itre hna majemine ka ngazo. Angatr a atre jëne la Tusi Hmitrötr la mejiune ka sisitria thatraqane la itre drai elany. Hnene la hne së hna hamën la ini qa hnine la Tusi Hmitrötr, easë hi lai a madrine troa kuca la ketre huliwa ka troa hamëne la itre manathithi ka epine palua kowe la itre xan. (Ioane 17:3; 1 Tim. 4:16) Maine jë troa aijijë së hnene la aqane mele së, troa hane akökötrene la aqane tro sa cainöj; maine troa hane pionie ka ixatua maine pionie lapaa, maine troa tro kowe la ketre götrane gaa aja ixatua, maine troa inine pena la ketre qene hlapa.
7. Pine nemen matre ka nyipi ewekë catre la tro sa isa nue xanë së kö enehila?
7 Hna perofetane hnei Davita Joxu ka hape, ame la ijine kola troa nyiqaane musi hnene la Mesia, ke, tro la nöje i Akötresie a “hujë angate xane kö.” (Sal. 110: 3, ith. e cahu fen, MN) Pine laka Iehova a anyimenyimëne la huliwa ne menue ngöne la götrane la ua, haawe, tru catre hnei nyine troa kuca hnene la itre trejine ka ajan troa nue xanë angatre kö. (Is. 60:22) Hane kö nyipunieti qaja ka hape: “Inieti la, upengë nieti jë”? (Is. 6:8) Eje hi lai laka, tro hë së a amadrinë Iehova me kapa la itre manathithi ka tru, e hne së hna amamane la aja ka eje the së, ene la troa nue xanë së kö kowe la itre huliwa i Nyidrë.