Xupi Uma Ne Baselaia—Ketre Götrane Ka Hmitrötr Ne La Huliwa Së
1. Nemene la hna eatrëne hë ngöne la hna xupi Uma Ne Baselaia, ngo nemene pala kö la itre nyine troa kuca?
1 Ame ngöne lo faifi lao macatre ka ase hë, hna xupe la 4 lao Uma Ne Baselaia, luetre hna ahnyipixen nge 4 hna nyihnyawane hmaca ngöne la teritoare ne la filiale së. Tru la huliwa hna kuca fene la musi ne la Kometr Ne Xupi Uma Ngöne La Nöj. Easë a olene atraqatre la huliwa ka tru hna kuca hnene la Kometre cili, memine la nöjei trejine asë ka sajuëne ej. Ngacama atraqatre hë la hna kuca ngöne la götrane cili, ngo ame pe, tre, tru catre pala kö la nyine troa kuca. Tune kaa la aqane tro sa sajuëne la huliwa cili, ketre götrane ka nyipi ewekë catr ngöne la huliwa ka hmitrötr hne së hna troa kuca koi Iehova?—Hna ama. 7:15.
2. Tune kaa la aqane tro sa sajuëne la huliwa ne xupi Uma Ne Baselaia?
2 Loi e Troa Saen Toa Hane Huliwa: Maine ase hë epuni xome la bapataiso, eahuni a könë nyipunie troa hane saene matre troa ce huliwa memine la Kometr Ne Xupi Uma Ngöne La Nöj; troa nyialiene la pepa ne sipo hna hape, Construction des Salles du Royaume — Questionnaire pour les volontaires. (Sal. 110:3) Loi e tro asë hi la itre ka voloter a hetre hni ne ajan troa huliwa me ixatua. (Sal. 133:1) Ngacama pëkö hnei epuni hna atreine ngöne la xupi uma, ngo ijije hi troa epuni a hane ixatua ngöne la huliwa cili. Hnene laka epuni a troa ce huliwa me itre ka xupi uma, haawe, tro fe hë epuni a atreine kuca la itre xaa hnepe huliwa nge ka lolo catre kowe la itre xaa ijine kuci uma elany.
3. Nemene la itre xaa aqane tro sa amamane la ixatua së kowe la ewekë hna amekötine cili?
3 Maine thatreine kö tro epuni troa hane voloter, ijije hi tro epuni a hane sajuëne la mekun, ene la troa xatuane fe la itre xan ka ijije troa hane xome la huliwa cili. Ijije hi tro epuni a ixatua, hnene la hna hane kuca la itre huliwa e hnine la ekalesia ne la itre ka saene troa xupi uma. Loi e troa canga wange hnene la itre qatre thup matre troa xecie hnyawa koi angatr laka, hna thupëne hnyawa la ekalesia ngacama itre xan a tro troa hane sajuëne la huliwa ne xupi uma. Thaa luelue kö së laka, madrine catre Iehova la easë a caasi me ce huliwa thatraqane la itre aja ne la Baselaia.—Heb. 13:16.
4. Nemene la aqane tro sa ithuecatre kowe la itre ka hane huliwa ngöne la hna xupi Uma Ne Baselaia?
4 Loi e Tro Sa Ithuecatr: Thaa ewekë ka hmaloi kö la troa xupe la itre hnë tro sa hmi, kola aja traeme nge tru catre la huliwa. Kösë kolo hi lai a hape, troa nanyi e itre xaa ijin, la itre ka saen troa hane ixatua xupi uma qa ngöne la itre ekalesia i angatr. Celë hi matre thaa tro kö sa cile troa qaja aloine la itre voloter me ithuecatre koi angatr, pine laka, angatr a catre thele troa kuca la “huliwa” ka nyipi ewekë catr.—Ite hu. 6:3; Rom. 14:19.
5. Tune kaa la aqane tro la itre voloter a atreine tulu ewekë ngöne la itre hnëqa i angatr?
5 Loi e Tro Sa Atreine Tulu Ewekë: Ame la troa huliwa thatraqane la Baselaia i Akötresie, tre, celë hi pane nyine tro së lai a kuca ngöne la easë a hmi koi Nyidrë. (Mar. 13:10) Kola thele hnene la Kometr Ne Xupi Uma Ngöne La Nöj, troa kuca matre thaa tro kö a nanyi menu la itre voloter qa ngöne la itre ekalesia i angatr. Ketre, loi e tro la itre voloter a thele troa atreine tulu ewekë ngöne la aqane tro angatr a xome la itre hnëqa i angatr ka nyimutre. Angatr a hnëkë thenge matre thaa tro pi kö a hetre hnepe jole pe göne la itre hnëqa e hnine la ekalesia, qa ngöne laka angatr a troa ananyin ej.
6. Nemene la hna eatrën ngöne la kola ce huliwa hnene la itre trejine asë hnine la ekalesia troa akökötrene pala hi la nyipi hmi?
6 Hnei Paulo aposetolo hna qaja la itre atren la ekalesia ka hape, angatr a caas me ce huliwa “nge kola tru jë la ngönetei matre adraiëne ngöne la ihnim.” (Efe. 4:16) Kola upi së hnene la ihnimi së koi Iehova me kowe la nyipi hmi, troa ce huliwa matre troa sajuëne la huliwa ne cainöj memine la huliwa ne xupi Uma Ne Baselaia.