Hna Ahnithe Koi Së La Ketre Trenga Mo
1 Hnei Paulo aposetolo hna nyipine la hnëqa i nyidrëti qaathei Akötresie, me aceitunëne la hnëqa cili memine la ketre “trenga mo.” (2 Kor. 4:7) Hnei nyidrëti hna xome la huliwa cili hnine la iakötrë me icilekeu. Thaa hnei nyidrëti kö hna mano hna cainöje kowe la nöjei atr hnei nyidrëti hna iöhnyi memin. Nyimutre la itre jol hnei nyidrëti hna ixelë memin, nge xönë hi tro nyidrëti a mec ngöne la itre gojenyi nyidrë, e caha helep me e kuhu hnagejë. Nemene la aqane tro sa xötrethenge la tulu i Paulo me amamane laka easa nyipine la huliwa ne cainöj? (Rom. 11:13) Nemene la ka aketrepengönëne la huliwa ne cainöje së matre aceitunëne jë me ketre trenga mo?
2 Ketre Trenga Mo Ka Sisitria: Ame e itre xaa ijin, tre, kolo hmaca pena ha hleuhleu me akötr qa ngöne la itre trenga mo ne la fen, ketre, hna nyifegone hi nge hna sa tulune hi la itre manathithi hna kapa qa ngön. Ngo ame pi kö la huliwa ne cainöje së, tre, ka cile huti la itre manathithi hne së hna kapa qa ngön, koi së me kowe la itre xaa atr. (1 Tim. 4:16) Ej a xatuane la itre atr ka catre thele troa atre Iehova, troa saze la itre aqane mele i angatr, me hane kapa la nyipi mejiun kowe la mele ka thaa ase palua kö. (Rom. 10:13-15) Maine tro sa xome la huliwa ne cainöje së ceitune me ketre huliwa ka sisitria catr, haawe, tro hë së a hetrenyi la ketre nyine troa kuca ka lolo catr ngöne la mele së, ene ketre huliwa ka cile hut, nge ketre mejiune ka lolo thatraqane la itre drai elany.—1 Kor. 15:58.
3 Amamane Jë Laka Easa Nyipine La Trenga Mo Së: Kola mama la aqane nyipine së la ketre ewekë, hnene la aqane nue së la trenge catre së me traeme së troa eatrëne ej. Drei la ketre madrine ka tru, e tro sa nue la traeme së me trenge catre së, matre troa atrunyi Iehova? (Efe. 5:16, 17) Troa amamane hnene la aqane xome së la traeme së laka, easa nyipine catrëne la itre ewekë ngöne la götrane la ua hune la itre mo ne fen. Pine laka easa tro fë la ketre ewekë ka sisitria catr, haawe, loi e troa hetre ajan the së troa cainöj cememine la hni ka madrin, me lapa hlëhmeke matre troa qaja la maca ka loi ngöne la nöjei ijin.
4 Ame la itre trenga mo ka tru alamekene catr, tre, thaa hna juetrëne kö, ngo hna amë amamane matre troa hane goeëne hnene la itre xan. Maine tro sa xome la huliwa ne cainöje së ceitune me ketre trenga mo, haawe, tro ha mama hnyawa la enyipiewekëne ej ngöne la mele së. (Mat. 5:14-16) Epi eje pala hi the së la hni ne ole, nge catre pi së troa xötrethenge la tulu i Paulo aposetolo me xome la nöjei ijine troa amamane laka, easa nyipi ewekëne la huliwa ne cainöje së, me nyipine ej ceitune me ketre trenga mo.