Nyipine Jë La Hnëqa i Nyipunie, Ene La Troa Cainöj
1. Tune ka la aqane goeëne la huliwa ne cainöje së hnene la itre atr?
1 Ame kowe la itre atr ne la fene i Satana, tre, “qene hmo” la troa xome la huliwa ne cainöj. (1 Kor. 1:18-21) Maine tha hmeke kö së, canga tro hi a ajojezi së hnene la aqane waiewekë ka ngazo cili, nge tro hë sa kucakuca me nanazij. (Ite edomë 24:10; Is. 5:20) Nemene la itre kepin ka upi së troa nyipine la hnëqa së, ene la troa Itretre Anyipicine i Iehova?—Is. 43:10.
2. Pine nemene matre ketre “qâ” ka hmitrötre la huliwa ne cainöj?
2 Ketre “Qâ” Ka Hmitrötr: Hnei Paulo aposetolo hna aceitunëne la huliwa ne cainöje me ketre “qâ” ka hmitrötr. (Rom. 15:15, 16) Kola mama tune ka laka ketre “qâ” ka hmitrötre la huliwa ne cainöj? Maine tro sa catre xome la huliwa cili, hawe, tro hë sa itre ka “ce huliwa tro” me Iehova, Akötresieti ka “hmitöt,” me hane ahmitrötrëne fe la atresiwa i Nyidrë. (1 Kor. 3:9; 1 Pet. 1:15) Iehova a xome la huliwa ne cainöje ceitu me ketre “huje ne [i]atruny;” celë hi matre, ka sisitria catre la huliwa cili ngöne la aqane hmi së koi Akötresie.—Heb. 13:15.
3. Nemene la ka amamane laka, ketre hnëqa ka tru la troa cainöjëne la maca ka loi?
3 Xalaithe hi la itre atr hna upe troa xome la hnëqa ka tru celë, ene la troa cainöjëne la maca ka loi. Maine hna ahnithe ju la hnëqa cili kowe la itre angela, eje hi lai laka, tro hë angatr a xome hnyawane ej, nge tro hë eje a hetre thangane ka lolo. (1 Pet. 1:12) Ngo hnei Iehova hna ahnithe la hnëqa ka sisitria! cili kowe la itre atr ka tha pexeje kö, ene lo “ite inege dro.”—2 Kor. 4:7.
4. Easa amamane tune ka laka, easa nyipine la huliwa ne cainöj?
4 Ketre Huliwa Nyine Troa Amë Panën: Pine laka easa nyipine la huliwa ne cainöj, hawe, ame koi së, ketre huliwa lai “ka nyipi ewekë catr,” ngöne la mele së. (Fil. 1:10, MN ) Qa ngöne lai, loi e tro sa xomi ijine troa catre cainöj e nöjei wiik. Kola nyipine hnene la atr ka elo miuzik la hnëqa i angeic, ene la troa elo ngöne la ketre gurup ne miuzik ka hlemu. Maine angeice a ajane troa maca troa elo, tre, nyipi ewekë tro angeic a hnëkë hnyawa. Ketre tune mina fe, loi e tro sa hnëkë qëmekene troa cainöj, matre atreine së troa ‘thawa hnyawa la wesi ula ka nyipici,’ me maca troa “ini.”—2 Tim. 2:15; 4:2.
5. Drei la ka wangatrune la huliwa ne cainöje së?
5 Tha tro kö sa kucakuca ngöne la kola xele ma drei së hnene la itre atr. Ketre, tha tro kö sa thëthëhmine laka nyimutre pala kö la itre atr ka troa drei së. Ame pe, tha easë kö a thele troa amadrinëne la itre atr. Nyipi ewekë catre kö la mekuna i Iehova, nge ka tru koi Nyidrë la trengecatre së.—Is. 52:7.