Cainöje Jë Tui Keriso
1 Hnei Iesu hna amamai tulu ngöne la aqane troa xome la huliwa ne cainöj. Nyimu ijin nge nyimu aqane amamane nyidrëti la etrune la ihnimi nyidrëti koi Akötresie me kowe la itre atr. Hnei nyidrëti hna inine la nyipici kowe la itre atr ka hni ka ajan, me amamane jëne la itre huliwa la ihnimi nyidrëti kowe la itre atr hna akötrëne me wajahuj.—Mat. 9:35.
2 Itre Ini Me Tulu i Iesu: Thaa hnei Iesu kö hna lö hnine la kuci politik maine ce memine lo itre organizasio ka xatuane la itre atr troa aloine la mele i angatr. Ketre thaa hnei nyidrëti pena kö hna nue la itre xaa huliwa troa ajojezi nyidrë maine troa amë pena itre ej qëmekene lo pane huliwa hnei nyidrëti hna troa kuca. (Luka 8:1) Hnei nyidrëti pe hna caa hna goeëne hnyawa pala hi, ene la troa cainöjën la maca ka loi ne la Baselaia i Akötresie, ceitune me ketre nyin ka cile hut kowe la itre jole ne la itre atr. Atraqatr la huliwa hnei Iesu hna kuca, nge co hi lo traeme ne troa eatrën la huliwa cili. Ame ngöne la kola ajane hnene la itre atr ne Kaperenauma tro Iesu a lapa thei angatr, öni nyidrëti kowe la itretre drei nyidrëti ka hape: “Tro shë kowe la ite xa lapa e koilo . . . mate tro ni a cainöjëne fe e cili, ke celë hi hnenge hna trongën.”—Mar. 1:38.
3 Thupene la hnei Iesu hna inine la itretre drei nyidrë, haawe, hnei nyidrëti hna ithuemacanyi tune lai koi angatr me upi angatr ka hape: “Troja cainöj, me hape, Eashenyi hë la baselaia ne hnengödrai.” (Mat. 10:7) Hnei nyidrëti hna inine la itretre drei nyidrëti ka hape, ame la itre aja ne la Baselaia, tre, loi e tro pala hi a amë panëne itre ej ngöne la mele i angatr. (Mat. 6:33) Kola mama hnyawa la ewekë hna troa kuca hnene la itretre dreng, jëne lo itre trenge ewekë tixenuë hnei Iesu hna qaja koi angatr qëmekene tro nyidrëti a elë hnengödrai eë. Öni nyidrë: “Qa ngöne lai, trojë nyipunie a inine la nöjei nöj’ asëjëihë.”—Mat. 28:19.
4 Enyipiewekëne La Baselaia: Ame la sipu topik hnei Iesu hna ithanatane hnyawa, tre, ene la Baselaia i Akötresie; nge hnei nyidrëti hna upe la itretre drei nyidrë troa xötrethenge la tulu i nyidrë. Thaa tro jë kö a hetre thangane ka loi la itre hna kuca hnene la itre atr matre troa nyinyin la itre jole ne la fen. (Iere. 10:23) Baselaia i Akötresie hmekuje hi la ka troa ahmitrötrëne la ëje i Akötresie, me axapon epine palua la akötre ne la itre atr. (Mat. 6:9, 10) Maine tro sa inine la nyipici kowe la itre atr ka “awe me teije latesi pine la ite ewekë ka sisi asë lo hna kuca nyipin’ ej,” haawe, tro ha xatua angatr troa madrine me mele ka loi enehila me canga xölehuje la nyipi mejiun thatraqane la itre drai elany.—Ezek. 9:4.
5 Iesu pala hi a cilaxome la huliwa ne cainöjëne la maca ka loi ne la Baselaia i Akötresie, nge nyidrëti a ahnithe xeciëne koi së laka tro nyidrëti a xatua së. (Mat. 28:20) Nemene la nyine tro sa kuca matre troa ihmeku la huliwa ne cainöje së memine la tulu hna hamëne hnei Iesu koi së? (1 Pet. 2:21) Catre pi së ngöne la itre drai tixenuë celë, nge epi tro sa kuca la hne së hna atrein troa qale me catre xome hnyawa la tulu hnei Iesu hna hamëne koi së ngöne la huliwa ne cainöj!