Huliwa Ne Cainöj Ne La Keresiano—Hnëqa Ka Sisitria
1 Isa hetrenyi asë hi së la itre nyimu pengöne huliwa nyine troa kuca. Ketre hna amekötine fe hnei Akötresie la troa thupën la itre atren la lapa së. (1 Tim. 5:8) Ngo eje hi lai laka thaa tro kö la huliwa cili a nyipi ewekë catre pala ha hune la huliwa ne cainöjën la Baselaia memine la troa inine la itre atr.—Mat. 24:14; 28:19, 20.
2 Hnei Iesu hna hamën la tulu nyine tro sa xötrethenge, ene la troa “pane thele la baselaia.” (Mat. 6:33; 1 Pet. 2:21) Ngacama thaa tru fe kö hnei mo i nyidrë, ngo ka pexej la aqane kuca nyidrë la aja ne la Tretretro i nyidrë. (Luka 4:43; 9:58; Ioane 4:34) Hnei nyidrëti hna thele troa cainöj ngöne la nöjei ijine ka ijij. (Luka 23:43; 1 Tim. 6:13) Hnei nyidrëti hna ithuecatre kowe la itretre drei nyidrë troa hane catre xome fe la huliwa cili.—Mat. 9:37, 38.
3 Xome Jë La Tulu i Iesu Enehila: Ijije hi tro sa xome la tulu i Iesu, ene la troa ahmaloeën la mele së matre troa nyitrepene ej hnene la huliwa ne cainöje i Keresiano. Maine hetrenyi hi së la ka nyipiewekë kowe la mele së, loi e tro sa wangatrun la eamo ne la Tusi Hmitrötr, laka, thaa tro kö a thele troa hetrenyi menu pala ha la itre mo ne la fene celë. (Mat. 6:19, 20; 1 Tim. 6:8) Drei la elolon la tro sa thele troa akökötren la aqane xome së la huliwa ne cainöj! Maine easë a cile kowe la itre jole ka eje ngöne la mele së, maine jë tro sa thele troa xome la tulu i Iesu, ene la aqane ujë i Nyidrë, ngöne laka, thaa tro kö së a nue la itre ehacene la mel troa sewe së troa kuca la huliwa ka tru, ene la troa tro fë la maca ka loi ne la Baselaia.—Luka 8:14; 9:59-62.
4 Ame mina fe koi itre ka cilën la itre hnëqa ka nyimutre, loi e tro angatr a amë panën la la huliwa ne cainöje trootro. Hetrenyi la ketre trejine trahmany, nyimutre la ihaneköi angeic, kola cilëne fe la ketre huliwa ka tru, qatre thupe nyidrë hnine la ekalesia i Keresiano, nyidrëti a qaja ka hape: “Ame koi ni tre, huliwa ka sisitria la huliwa ne cainöj ngöne la meleng.” Kola qaja hnene la ketre trejine föe ka pionie, kola hape: “Lolo catre hmaca ju kö la troa pionie hune la troa xome la ketre huliwa ka tru thupen koi maseta.”
5 Ngacama tru la itre jol ngöne la mele së, ngo loi tro së a xötrethenge la tulu i Iesu. Troa xötrethenge tune kaa? Troa kuca matre ame la huliwa nyine tro sa pane wangatrune ngöne la mele së, tre ene la huliwa ne cainöje i Keresiano.