Nemen La Ewekë Hne Së Hna Amë Panën?
1 Nyimutre la itre hmi ka thel troa kuca la itre huliwa ka loi thatraqane la itre atr, tune la itre iuma matre nyine troa inin la itre atr, maine göi thatraqan la itre ka wezipo. Ame Itretre Anyipici Iehova tre, maine nyipici laka, angatre fe a hane “kuca la loi me ihnim,” ngo ame la ewekë hnei angatr hna kuca panën, tre, ene la troa xatuan la itre atr ngöne la götrane la ua.—Heb. 13:16.
2 Tulu Hna Hamën Ngöne La Hneijine i Iesu: Hnei Iesu hna kuca la itre huliwa ka loi ka nyimutre ngöne lo nyidrëti e celë fen, ngo ame la pane huliwa hnei nyidrëti hna kuca, tre, ene la troa tro fë la nyipici. (Luka 4:43; Ioane 18:37; Ite Huliwa 10:38) Hnei nyidrë hna upe la itretre drei nyidrë troa “inine la nöjei nöj’ asëjëihë, . . . me ini angatr.” (Mat. 28:19, 20) Nge hnei nyidrëti hna amaman ka hape ame la itre ka lapaun koi nyidrë, tro angatr a kuca la huliwa cili a atraqatre kö hune la hnei nyidrë hna nyiqaane hë, me haöthe la fene hnengödrai asë hnene ej. (Ioane 14:12) Hnei Iesu hna amë panën la huliwa ne cainöj, pine laka, huliwa lai ka xatuan la itre atr troa atre la jëne iamele.—Ioane 17:3.
3 Hna xome fe hnei Paulo aposetolo la huliwa ne cainöj ceitune me ketre huliwa “hna musinë angeic” troa kuca ngöne la mele i angeic, nge ketre hna amekötin hna thatreine troa nuetrij. (1 Kor. 9:16, 17) Hnei angeic hna hujëne la mele i angeic, me xomihnin la itre itupathi, maine cile pena kowe la itre akötr ka tru; göi troa eatrën la huliwa ne cainöj. (Ite Huliwa 20:22-24) Ceitune hi la aqane ujë i Paulo me Peteru me itre sine ce huliwa i nyidro. Ketre, ame mina fe la kola akalabusi angatr, me lepi angatr, ngo “tha mano kö angate o drai troa ini, me cainöjë Iesu Keriso, ngöne la ēnē me nöjei hnalapa.”—Ite Huliwa 5:40-42.
4 Nge tune kaa fe së? Easë kö a hane amë panën la huliwa ne cainöj me hane inine fe la itre atr? Easë kö a hane tui Iesu, laka, hnei nyidrë hna hnime la itre atr ka “kucakuca me isa ije, tune la nöjei mamoe ka pa ate thupën”? (Mat. 9:36) Kola amaman hnyawa hnene la itre ewekë ka traqa enehila, memine la itre hna perofetan hnine la Tusi Hmitrötr, laka, easenyi catre hë matre nyipune pi la fene ka ngazo celë! Qa ngöne lai, loi e tro sa mekune hnyawa la enyipiewekën la troa xom la huliwa ne cainöj, matre tro fe së a hane catre tro fë la maca ka loi.
5 Loi e Tro Sa Tuluth La Aqane Mele Së: Pine laka, kola saze ngöne la itre xaa ijin la aqane mele së, loi e tro sa lapaa wang maine ijij tro sa saze la itre xaa aqane tro sa mel, matre troa tru la hne së hna hane cainöje trootro. Hnene la ketre trejine föe hna pionie lapa ngöne lo itre macatre 1950, 60, me 70, ngo hnei eahlo hna mekune troa nue la huliwa ne pionie, pine laka thaa egöcatre hë eahlo. Ene pe egöcatre hmaca ha eahlo. Haawe, hnei eahlo hmaca hna tuluth me wang la pengöne la mele i eahlo, me mekun hmaca troa xome la huliwa ne pionie. Drei la madrine ka tru koi eahlo troa hane sin la Ini Thatraqan La Itre Pionie, nge 90 lao macatre i eahlo! Nge tune kaa fe së? Easenyi hë tro së a reteret, maine pena hetre pepa së hë? Atreine kö tro së a hane saze la aqane mele së matre troa hane pionie?
6 Kola öhnyi Maretha hnei Iesu laka, nyiidro a “ngazo hnëhene la ite huliwa ka kösau,” ene pe nyidrëti a eamo nyidroti jë ka hape, maine thaa tro kö nyidroti a thele ejolene menu pala ha la itre ewekë, tro hë nyidroti a kapa la itre manathithi ka tru. (Luka 10:40-42) Hapeu, ijije kö tro së a hane ahmaloeën la aqane mele së? Hapeu, ijije hi tro la trahmanyi hmekuje a huliwa, hune la tro asë hi nyidro lue trefën a huliwa? Maine tro la itre hnepe lapa a saze la itre aqane mele i angatr, ijije hi tro la ala caas a huliwa matre troa nyi thupen la itre ka nyipi ewekë thatraqane la mel? Nyimutre la itre hnepe lapa ka kapa la itre manathith ngöne la götrane la ua, qa ngöne laka hnei angatr hna saze la itre xaa aqane mele i angatr, ene pe tru catre fe hë la hnei angatr hna hane cainöje trootro.
7 Epi tro asë hi së a xötrethenge la tulu hna amë pe hnei Iesu memine la itre aposetolo! Xecie hnyawa koi së laka, maine troa pexej la aqane xome së la huliwa ne iamele, ene la troa cainöjën la maca ka loi ne la Baselaia, eje hi lai laka, tro hë Iehova a amanathithi së.—Luka 9:57-62.