Ewekë Hna Amë Panën Ngöne La Mele Së
1. Hnei Iesu hna amamane tune kaa laka, ka sisitria catre la huliwa ne cainöj koi nyidrë?
1 Ame la ewekë ka sisitria ngöne la mele i Iesu ekö, tre, ene la huliwa ne cainöj. Hnei nyidrëti hna catre huliwa, me trongëne la itre gojenyi gaa nanyi ne la Palestine, matre troa cainöj kowe la itre atr ka nyimutre. Hnei nyidrëti hna ahmaloeëne la mele i nyidrë, matre troa nue asë la traeme me mekuna i nyidrë thatraqane la huliwa ne cainöj. (Mat. 8:20) Ame ngöne la kola thele hnene la ka ala nyim troa xome cipa nyidrë, tre, öni nyidrëti ka hape: “Qânge troa cainöjëne la maca ka loi ne la baselaia i Akötesie kowe la ite xa lapa pena; ke hna upi ni thatraqane lai.”—Luka 4:43.
2. Pine nemene matre ka sisitria catre la huliwa ne cainöj koi Iesu?
2 Pine nemene matre ka sisitria catre la huliwa ne cainöj koi Iesu? Ame la pane ewekë hnei nyidrëti hna hnehengazon, tre, ene la troa ahmitrötrëne la atresiwa i Iehova. (Mat. 6:9) Pine laka Iesu a hnime la Tretretro i nyidrë e koho hnengödrai, ene pe atraqatre la hni ne ajane i nyidrë troa kuca la aja i Iehova me drengethenge la nöjei wathebo i Nyidrë. (Ioane 14:31) Ketre, hnei Iesu hna thupëne hnyawa me xatuane la nöjei atr asë.—Mat. 9:36, 37.
3. Tro sa amamane tune kaa, laka, easa amë panën la huliwa ne cainöj?
3 Loi e Tro Sa Nyitipu Iesu: Eje hi laka, tro ha jole koi së troa nyitipu Iesu me amë panëne la huliwa ne cainöj ngöne la mele së, ke, kola huli së hnene la fen, memine la itre nyine iamadrinë hnene ej hna sajuën. (Mat. 24:37-39; Luka 21:34) Qa ngöne lai, nyipi ewekë tro sa wange hnyawa la itre ewekë ka sisitria, me eköthe la ketre porogaram ka troa aijijë së troa hnëkë me catre xome pala hi la huliwa ne cainöj. (Fil. 1:10) Loi e tro sa catre troa ahmahloeëne la mele së, me neëne troa truune la mele ne fen.—1 Kor. 7:31.
4. Pine nemene matre nyipi ewekë tro sa amë panëne la ewekë ka meköt ngöne la mele së enehila?
4 Pine laka xoxopatre pe hi la ijin, haawe, ame la atr ka inamacan, tre, angeic a pane thele troa eatrëne la itre ewekë ka sisitria catr. Drei la ketre ceitun, maine angeic a atre, ka hape, kola troa traqa la ketre wene, eje hi lai laka, tro hë angeice a hnëkëne la itre ewekë thatraqane la mele ne la hnepe lapa i angeic, me hmekëne la itre atr ka lapa ezi angeic. Tro ha pane nue la itre ewekë ka thaa sisitria kö kowe la mel. Ketre, xoxopatre hi la ijin qëmekene troa traqa la wene, ene Amagedo. (Zef. 1:14-16; 1 Kor. 7:29) Haawe, maine easa ajane troa amele së memine la itre atr ka drei së, nyipi ewekë tro sa isa wai së kö memine la aqane ini së, easë ju hë e hnine la ekalesia maine e tröne pena. (1 Tim. 4:16) Nyipici, tro ha amele së e hne së hna amë panëne la huliwa ne cainöj ngöne la mele së!