“Manathithi La Ate Xomi Hnine La Itupath”
1 Hna tupathe asë hi la itre Keresiano hnene la itre jol. (2 Tim. 3:12) Itre itupathi qa ngöne la itre sine mec, maine itre ejolene pena göi manie, me itre aqane iaö, me itre icilekeu pena maine itre xaa itupathi ju kö. Ame la itre itupathi Satana tre, nyine troa ananazijë së matre tro sa wanga acone la huliwa së itre Keresiano, uti fe hë la troa sewe së troa nyihlue i Akötresie. (Iobu 1:9-11) Tune kaa la aqane tro la itre itupath hne së hna xomihnin ahoean a ithue manathithi koi së?—2 Pet. 2:9.
2 Loi e Tro Sa Isa Hnëkë Kowe La Itre Itupath: Hnei Iehova hna hamëne koi së la nyipici e hnine la Wesi Ula i Nyidrë, tune lo itre hna edromën göne la mele i Iesu memine la itre ini qaathei nyidrë. Maine tro sa drenge la itre hnei Iesu hna qaja memine la itre hnei nyidrëti hna kuca, tro hë së a nyitrepene hnyawa la mele së me hnëkë së kowe la itre itupathi ka troa traqa koi së. (Luka 6:47-49) Loi e tro fe sa hane thele ixatua ngöne la itre xaa ewekë hna hnëkën, ene la itre trejine me easë itre Keresiano, me catre sine la itre icasikeu ne la ekalesia, me catre e la itre itus ka qeje pengöne la Tusi Hmitrötr hna hamëne hnene la hlue ka nyipici me ka inamacan. Loi e tro pala fe sa xome la ahnahna hna hamëne hnei Akötresie, ene la thith.—Mat. 6:13.
3 Hnei Iehova fe hna hamë së la ketre mejiun. Ame ngöne la easa eköthe la lapaune së kowe la itre hna thingehnaeane hnei Iehova, ame la mejiune së, tre, ej a ceitu memine la “iuhni ne la u, ka tha uke me cat.” (Heb. 6:19) Ame ngöne la itre hneijine ekö, ngacama haodrai ju hë, ngo thaa tro kö a tro la he ka tru e pëkö iuhni. Maine troa traqa la ketre wene, atreine hi tro sa kuiëne la iuhni matre tro ej a cilaxome la he wanga thaane jë ej ngöne la itre menij. Ketre mina fe, maine tro sa eköthe enehila la lapaune së hune la itre hna thingehnaeane hnei Akötresie, thaa tro jë kö a enijë së hnene la itre ethanyine la fen. Canga tro hi a traqa la itre jol. Ngacama hna kepe Paulo me Banaba ngöne la nyidroti a xötrei cainöj e Lusetara, ngo ame pe, hna canga saze la aqane ujë ne la itre atr ngöne la kola traqa la itretre Iudra ka icilekeu.—Ite hu. 14:8-19.
4 Madrin La Thangane La Hna Xomihni Ahoeany: Maine hne së pala hi hna catre cainöj ngöne la kola icilekeu me easë, haawe, tro ha tingeting me lapa hnyawa la itre mekuna së. Easa madrine ngöne la kola e së hnyawa fe thene la itre hna ahmahmane pine la ëje i Keriso. (Ite hu. 5:40, 41) Maine tro sa cile xomihnine ahoeane la itre itupath, haawe, tro ha xatua së troa eëne la itre thiina ka lolo, tune la tro ipië, me drengethenge, me xomihnine ahoeane pala pë hë la itre jol. (Deu. 8:16; Heb. 5:8; Iako. 1:2, 3) Kola ini së troa mejiune koi Iehova, me lapaune kowe la itre hnei Nyidrëti hna thingehnaean, me troa zae fei Nyidrë.—Ite edomë 18:10.
5 Atre hi së laka, thaa ka qea menu kö la itre itupath. (2 Kor. 4:17, 18) Kola aijijë së hnene la itre itupath troa amamane la ejuine la ihnimi së koi Iehova. Maine tro sa cile hnyawa kowe la itre itupath, easë hi lai a sa koi Satana lo atre sili trengathoi. Haawe, thaa tro pi kö sa thixötr! “Manathithi la ate xomi hnine la itupath, ke e ase hë tupath, tro angeic a hetenyi la korona ne mel.”—Iako. 1:12.