Itre Fami a Cengöne Nyihluei Iehova
1 Ame ngöne la itre hneijine i Tusi Hmitrötr, kola ce kuca la itre ewekë hnene la itre atrene la fami. Angatre a kuca la itre jole i angatre e nöjei drai, nge ame la ka sisitria, tre angatre a ce nyihluei Iehova memine la fami angatr. (Lev. 10:12-14; Deu. 31:12) Ame enehila, ngöne la itre götrane ka nyimutre, xalaithe hi la itre huliwa hna ce kuca hnene la itre atrene la fami. Ngo, kola öhne hnene la itre Keresiano la enyipiewekëne la troa ce kuca la itre huliwa hnene la itre atrene la fami, nge sisitria catre kö ngöne la kola ce nyihluei Iehova. Drei jë kö la madrine thene la Atre xupe la fami troa goeëne la itre fami e caas troa nyihluei Nyidrë!
2 Ce Cainöje Jë Memine La Fami: Maine tro la itre atrene la fami a ce cainöjëne la maca ka loi, eje hi lai laka, tro ha acatrene hnyawa la aqane imelekeu i angatr. Qa ngöne lai, tro fe la qatre thup ka ce cainöje memine la itre atrene la ekalesia a hane ce cainöje lapaa memine la föi angeice me itre kuku. (1 Tim. 3:4, 5) Ame mina fe la itretre thup ka iwai, ngacama tru ju hë la huliwa i angatr, ngo tro fe angatre a hane ami ijine troa ce cainöje memine la itre föi angatr.
3 Atreine hi tro la itre keme me thin ka ce cainöje memine la itre nekö i angatr, a xatua nyudreni troa kökötre ngöne la ua matre tro fe nyudreni a hane itretre cainöje elany. Thaa tro hmekuje kö la itre nekönatr a öhne la madrine ka eje thene la itre keme me thine i angatre ngöne la hna cainöje trootro, ngo tro fe nyudreni a öhne la kola qaja amamane hnene la itre keme me thine i angatre la sipu ihnimi angatre koi Iehova me kowe la itre atr. (Deu. 6:5-7) Thaa kolo kö lai a hape, thaa nyipi ewekë pë hë la hna kuca ngöne la hnalapa, ene la göhnë hnei angatre hna troa tru ngön. Hna catre ce cainöje lapaa hnene la lue trefëne memine la köni nekö i nyidro trahmanyi, ka 15 lao macatre la ka co, nge 21 lai haetra. Önine la kem: “Ngöne la nöjei ijin, hetre ini pala hi hnei nyiho hna hamë angatr. Nge thaa luelue kö nyiho laka, itre ijine lai ka lolo, nge ka ithuecatr.”
4 Troa Ce Hnëkë: Hna öhnyi eloine hnene la itre fami troa ce hnëkëne la aqane troa cainöj. Atraqatre la madrine thene la itre nekönatre troa tupathe la ketre aqane nyiqaane ithanata kowe la ketre atr, me anyimua amacane memine la itre atrene la fami, me ithöeën, maine tro angatr a cainöj maine nyi atre hna cainöje kow pena. Hnei itre xaa fami hna amë pe la hnepe menetre ngöne la kola nyipune la ini tusi ne la fami, matre troa kuca la itre iamacanyi cili.
5 Kola kökötre la madrine së la easa ce kuca memine la itre atr hne së hna hnim, la itre huliwa ka nyipi ewekë catr, nge ka ithuemadrine koi së. Drei jë kö la madrine ne la itre atrene la fami troa ce cainöje ngöne la itre hnalapa trootro, me iwai hmaca, me ce kuca la itre etid! Haawe, ame la epuni a ce nyihlue Iehova memine la fami epun, tre loi e tro epuni madrine troa ce qaja ka hape: “Ame ni me lapange, te, tro huni a nyi hlue i Iehova.”—Ios. 24:15.