Porogaram Ka Hnyipixe Ne La Asabele Ka Ketre Pengön Ka Caa Drain

Ame la taane la porogaram ne la asabele ka ketre pengön ka caa drain göi macatre ne huliwa 2008, tre, “Easë La Dro Ka Fedr—Iehova La Atre Xupe La Inege,” hna nyitrepene hune la Isaia 64:8. Tro la itre ithuemacanyi qa hnine la Tusi Hmitrötr hna hamëne jëne la porogarame celë, a akökötrene the së la atrehmekune me hni ne ole kowe la inamacane i Iehova, me meköt i Nyidrë, me mene i Nyidrë, me ihnim i Nyidrë, Atre xupi inege.

Tro la cainöje hna cile fë hnene la atre thupëne la sirkoskripsio hna hape, “Troa Huliwa Ceitu Me Itre Ge Nyine Loi Ngöne La Huliwa Ne Cainöj,” a amamane la aqane elë pala hi la etrune la itre atr ka kapa la manathith ka tru, ene la troa atre la nyipici me ce thawa eje me itre xaa atr. Tro la cainöje hna hape, “Tro La Aqane Mekune Thele a Hmekë Epun” a amamane la aqane troa thupë epuni hnene la aqane mekune thele hnei epuni la itre trepene meköt i Iehova. Ame la lue taane cainöje hna troa cile fë hnene la atre iwai, tre hna hape “ ‘The Ce Thiina Kö Memine La Fene Celë’ ” me “Nue Nyipunieti Pi Matre Xupe Hnene La Atre Xupi Inege.” Tro la itre keme me thin, me itre thöth a kepe ixatua qa ngöne la itre taane cainöje hna hape, “Itre Thöthi Hna Huliwane Hnei Iehova” me “Hnëqa Ka Tru Ne La Itre Keme Me Thin Matre Troa Eköthe La Thiina Ka Lolo Thene La Itre Kuku.” Jëne la itre iamacanyi me itre hnying, troa hetre madrine the së troa drenge me trongëne la hna kuca hnene la itre trejine trahmanyi me föe ngöne la huliwa ne cainöj. Loi e troa canga thuemacane la qatre thupe perezida hnene la itre ka mekune troa bapataiso. The thëthëhmine kö troa traqa fë la Tour de Garde i epuni thatraqane la wiike ne la asabele ka ketre pengöne ka caa drain.

Ame la hna ajane troa traqa kow hnene la Atre xupi inege, tre tro pala kö Nyidrëti a aeatrën. Ngo isa qanyi së isa ala caas troa iëne la aqane tro sa ujë thenge la aja i Nyidrë. Ame la itre ka drenge thenge la itre tulu ne meköti Iehova, me nue Nyidrë troa ahmadradrane la lapaune i angatr, kola aceitunë angatre me ge dro hune la lue nyine emoemone la atre xupi inege, hna huliwan, me alolone, me aketrepengönëne matre itre ge nyine huliwan. Ame la easa ce huliwa me Iehova, easë lai a atrune la musi Nyidrë me kapa mina fe la itre manathithi ka nyimutre.