Porogaram Ne La Asabele Ka Ketre Pengön Ka Caa Drain Ne La Macatre 2010
1. (a) Nemene la itre taan mekun hna ithanatane hë ngöne lo itre asabele ka ketre pengön ka caa drai ne la itre macatre ka ase hë? (b) Hetrenyi kö la itre xaa mekun ka tru hnei epuni hna kapa qa ngöne lo itre asabele ka caa drain ka ase hë, nge ka xatua epun ngöne la hna cainöj?
1 “Tupathe Jë Nyipunie La Nöjei Ewekë Ka Nyipi Ewekë,” “Cile Huti Ju Ngöne La Hna Axö Mamoe Ka Caas,” “Catre Pi Troa Anyipicine La Nyipici,” nge “Easë La Dro Ka Fedr, Nge Iehova La Atre Xupi Inege.” (Fil. 1:9, 10, 27; Ioane 18:37; Is. 64:8) Celë hi la itre xaa taan mekun hna ithanatane hë ngöne lo itre asabele ka ketre pengön ka caa drain. Hapeu, hetre aja thei epuni troa hane sine la asabele ka ketre pengön ka caa drain ne la macatre ne huliwa 2010? Tro ej a ithanatane la taan mekun celë, “Xoxopate Pe Hi La Ijin,” hna xom qa ngöne 1 Korinito 7:29.
2. Troa mama tune kaa la madrine së kowe la asabele cili?
2 Maine ase hë sa la drai ne asabele ne la ekalesia i epun, haawe, nyiqaane ithanatane jë hë cememine la madrin lai porogarame ne ej. Hnene la itre xaa keme me thine hna xatuane la itre nekö i angatr troa ajane me treqene hnyawa lai asabele cili, ene laka hna cinyanyine la drai ne la asabele ngöne la idrai memine la itre ewekë nyine tro angatr a xom, me e wengëne la itre drai qëmekene troa traqa la drai ne la asabele. Ame ngöne la heji ne Ini Tus ne la hnepe lapa, maine jë tro epuni a wange hmaca la itre mekun hnei epun hna xome qa ngöne lo itre asabele ka caa drain ka ase hë. Ketre, ijije tro epuni a hnëkëne la itre hni epun thatraqane la ijine cili, hnene la hna wange hmaca la itre mekun ngöne la itus Tirez profit de l’École du ministère théocratique, götrane 13-16, matre xatua epun memine la hnepe lapa i epun troa “wange hnyawa la aqane denge.”—Luka 8:18.
3. Tune kaa la aqane tro epuni a kepe thangane hnyawa qa ngöne la itre ini hna hamën?
3 Trongëne Jë La Itre Ewekë Hnei Epuni Hna Inin: Thupene la ketre asabele, hne së pala hi hna drenge la hnëewekë cëlë, ka hape, “Lolo catre la porogaram!” Celë hi la ketre madrine ka eje pala hi nge ka xulu qa ngöne la nöjei ewekë hna hnëkëne hnei Iehova, tune la asabele celë. (Ite edomë 10:22) Maine epuni a ajane troa kepe thangane hnyawa la itre ini cili, nyipi ewekë troa sine thele me hnehene itre ej. (Luka 8:15) Loi e tro epuni a xomi ijin thupene la asabele troa ce ithanatane la porogaram memine la hnepe lapa i epun maine pena me itre atrene la loto i epun. Ce ithanatane jë la itre mekun me itre aja nyine eatrëne ka troa xatua epun ngöne la huliwa ne cainöj. Maine tro epuni a ujë tune lai, haawe, tro ha cile huti la itre ithuemacany e kuhu hni epun.—Iako. 1:25.
4. Pine nemene matre ka ketre pengöne la asabele celë koi së?
4 Atraqatre la madrine së la easa kapa la ketre ahnahna ka hetre thangane ka loi kowe la mele së. Hapeu, madrine fe kö së me lapa mekune la itre ewekë hnei Iehova hna hnëkëne koi së ngöne la asabele ka troa xulu. Ka xecie hnyawa koi së, laka, tro ej a xatua së ngöne la nöjei götrane la mele së. Thaa luelue kö së laka, tro sa kapa la ketre ahnahna ka lolo qaathei Iehova Tretretro së e koho hnengödrai ka ihmeku memine la aja së, jëne la itre ithuecatre me itre ini hnei Nyidrë hna hamën matre troa xatua së troa eatrëne hnyawa la huliwa hna ahnithe koi së.—2 Tim. 4:2; Iako. 1:17.