“Xeni Ngöne La Nyipi Ijin”
1. Tune kaa la aqane troa xatua nyipunie memine la itre xan, hnene la porogarame ne la asabele ka ketre pengön ka caa drain?
1 Thupene la hne së hna sine la ketre asabele ka ketre pengön ka caa drain, ke, ame itre xaa ijin, easa qaja, ka hape, “Celë hi lo hnenge hna ajane hnyawa!” Hnene la ketre atre thupëne la sirkoskripsio hna qaja, ka hape, thupene la hna drenge lo porogarame ne lo asabele ka ase hë, tre, hetrenyi la itre xaa atr ka qaja amamane la aja i angatr troa akökötrene la huliwa ne cainöje i angatr. Hnene la ketre qatre thupe ka iwai trootro ngöne la itre nöj, hna qaja, ka hape: “Ej a xatua së troa trotrohnine hnyawa la pengöne hneijine hne së hna melëne enehila, me wange hmaca la itre ewekë hne së hna axeciëne ngöne la mel.” Kola qaja hnene la ketre, ka hape, “Ala nyimu la itretre cainöj ka qaja, ka hape, ketre ewekë lai nyine amekunë angatr, laka, angatre pala hi a wanga atrune la ewekë ka sisitria catr, ene la huliwa ne cainöj.” Hna xatua nyipunie tune kaa hnene la asabele ka ketre pengön ka caa drain?
2. Nemene la itre taane mekun hna troa ithanatane ngöne la porogarame ne la macatre ne huliwa ka troa xulu?
2 Ka ihmeku hnyawa la porogaram ne la macatre ne huliwa ka troa xulu memine la itre aja së. Ame la taan, tre, hna xome qa ngöne Salamo 118:8, 9, kola hape, “Lapa Qale Jë Së Koi Iehova.” Hanawange la itre xaa taane mekun hna troa ithanatan ngöne la ijine cili: “Tune Kaa La Aqane Tro Iehova a Nyi Trenge Catre Ne La Atr Ngöne La Ijine Akötr,” “Xatuane Jë La Itre Xaa Atr Troa Zae Fene La Lue Iape i Iehova,” “Nyitipu Iehova Jë Hnene La Hna Ithue Hnë Zae,” “Itre Thöthi Fe, Lapa Qale Jë Koi Iehova!” me “Paradraiso Ngöne La Götrane La Ua, Ketre Hna Amekötine Hnei Iehova Matre Tro Sa Zae Ngön.”
3. Tune kaa la aqane tro sa kepe thangane qa ngöne la hna sine la asabele?
3 Aqane Troa Kepe Thangane Qa Ngöne La Porogaram: Maine ase hë thuemacane la drai ne la asabele, haawe, loi e tro sa canga eköthe amë la itre ewekë matre troa sine lai asabele, me könëne la itre atr ka ini Tusi Hmitrötr me easë troa ce tro me easë. Maine easa ajane troa “wa” wene ka loi, haawe, nyipi ewekë tro sa drenge hnyawa. (Luka 8:15) Eje hi, loi e tro sa drenge hnyawa la porogaram me xome hnyawa la itre mekune ka tru me itre ini hne së hna troa trongëne ngöne la mele së, me ngöne la huliwa ne cainöj. Ame e thupene la asabele, loi e tro sa xomi ijin troa ce ithanatane la porogaram memine la hnepe lapa së, me ce wange me angatr la aqane troa trongëne la itre ithuemacanyi cili.
4. Pine nemene matre easa treqene hnyawa la ijine asabele së ka ketre pengön ka caa drain?
4 Tune la ketre göxeni ka hnyapa me nyine loi kowe la atr, ase hë hnëkëne thatraqane la macatre celë la asabele ka ketre pengön ka caa drain cememine la ihnim. Epi tro Iehova a amanathithine la trenge catr hnei nyipunieti hna kuca matre troa sine me hane kepe thangane qa ngöne la “xeni [ne la ua hna hnëkëne] ngöne la nyipi ijin” thatraqane la itre Keresiano.—Mat. 24:45.