Porogaram Ka Hnyipixe Ne La Asabele Ka Ketre Pengön Ka Caa Drain
Jëne la ixatua ne la uati hmitrötr, atraqatre la huliwa hna kuca hnene la itre pane keresiano matre troa cainöjëne la maca ka loi kowe la nöjei atr asë. (Ite hu. 1:8; Kol. 1:23) Tro la porogaram ne la asabele ka ketre pengön ka caa drain göi macatre ne huliwa 2007 hna hape, “Loi e Troa Catre Xome La Wesi Ula,” a xatua së troa xome la tulu ka lolo hna amë pe hnei angatr.—Ite hu. 18:5.
Ame la kola qejepengöne hnei Davita Joxu la wesi ula i Akötresie, öni angeic: “Eje kö la hna anyipicine hnei Iehova, ate ainamacanëne la ite wangadrapa.” (Sal. 19:7) Ame la asabele ka ketre pengön hna hnëkën hnyawa thatraqane la macatre 2007 tre, kola troa qaja atrune la enyipiewekëne la Itre Hna Cinyihan “nyine eamo,” nge tro eje a ithuecatre së troa xome la Wesi Ula i Akötresie matre troa cainöj me inine la itre atr cememine la mekun, laka easenyi catre hë la pun. (2 Tim. 3:16, 17) Tro la porogaram ka hnyipixe a amamane la aqane tro sa neëne la itre hnö, me itre eloine hne së hna kapa, hnene la hne së hna trongëne la itre trepene meköt ne la Tusi Hmitrötr ngöne la nöjei drai ne la mele së. Eje mina fe a xatua së troa xome la Wesi Ula i Akötresie matre troa xatuane la itre thöth me itre ka xötrei atre la nyipici, troa kökötre ngöne la ua.
Loi e nyiqaane pë hë la porogaram nge easë hë a ilapanyi me dreng. Fejane jë la itre xaa mekune nyine tro nyipunie a isa trongën. Amamane jë la hni ne ole i epuni kowe la ini memine la itre eamo hnei epuni hna kapa hmaca, nge mekune ju la aqane tro nyipunieti a thele troa trongëne la itre ewekë hna inin.
Tro la porogaram ne la asabele ka caa drain a akökötrene la aja the së troa inine la Wesi Ula i Akötresie, me amekunë së troa catre cainöjëne pala hi la maca ka loi ne la Baselaia, me amamane koi së la aqane troa xatuane la itre xan troa hane huliwa tun. Haawe, epi troa xecie the së laka thaa tro kö sa triane la ijine cili, ke, jëne aqane eatrongë së hi lai ngöne la ua hnei Iehova me ini së hnei Nyidrë!—Is. 30:20b, 21.