Porogaram Ka Hnyipixe Ne La Asabele Ka Ketre Pengön Ka Caa Drain

Ame la taane la porogaram ne la asabele ka ketre pengön ka caa drain göi macatre ne huliwa 2009, tre, “Wange Kö La Qâ i [Nyipunie] . . . , Mate Umutheju,” hna nyitrepene hune la Kolose 4:17. Loi e tro së itre Keresiano a wanga atrune catrëne la trenge ewekë celë. Ame la hnëqa së, tre, ene la troa eatrëne la huliwa së cememine la nyipici, tune lo hnei Iesu hna kuca. (Ioane 17:4) Paulo aposetolo la ketre tulu ka lolo catre ngöne la götrane celë. Ka xecie hnyawa e kuhu hni nyidrë troa nyitipune la mele i nyidrë ne Keresiano ngöne la huliwa ne cainöj.—Ite Hu. 20:24.

Ame la cainöje hna troa cile fë hnene la atre thupëne la sirkoskripsio, tre, tro eje a amamane la aqane elë hune hnene la itre xaa trejine la itre jol, hna qëmeke kowe ngöne la huliwa ne cainöj. Thupene lai, tro la cainöje hna hape “Eënyine Jë La Hnei Nyipunieti Hna Traan” a wanga atrune la aqane tro sa xatuane hnyawa la itre ka “hnëkë kowe la mele ka tha ase palua kö.” (Ite Hu. 13:48) Troa pane ithanatane wengëne hnene la atre iwai, la itre xötre ne la tusi 2 Korinito 6:1-10 ngöne la cainöj, hna hape “Tune Kaa La Aqane Tro Sa Amamane Laka Itretre Ka Cainöje Së.” Ame e hnaipajö, tre, tro nyidrëti a tro fë kowe la itre atrene la icasikeu la taan, hna hape “Wanga Atrune Jë La Huliwa Ne Cainöje i Nyipunie.” Eje hi laka, tro nyipunieti mina fe a kepe ithuecatre qa ngöne la itre cainöj, hna hape “Kola Madrine La Huliwa Ne Cainöj Hnene La Itre Thöthi Me Itre Qatr,” me “Itre Thöth Ka Eatrëne Hnyawa La Huliwa Ne Cainöj.” Loi e troa canga thuemacane la qatre thupe perezida hnene la itre ka mekune troa bapataiso ngöne la ijine asabele ne sirkoskripsio maine asabele ka ketre pengöne ka caa drain ka troa xulu. Loi e troa wanga atrune la ketre götrane ka sisitria ne la nöjei icasikeu me kovasio, ene la troa ce wange La Tour de Garde. The thëthëhmine kö troa traqa fë lai zonale i epun thatraqane la wiike ne la asabele ka ketre pengöne ka caa drain.

Ame ngöne la easa catre eatrëne hnyawa la huliwa ne cainöje së, tre, easë hi lai a thele matre xecie koi së laka, thaa tro kö la itre xaa aja me itre xaa huliwa a thapa pena qaathe së la traeme hna xome hë kowe la itre huliwa hnei Iehova hna upi së troa kuca. Jëne la porogaram ne la asabele ka ketre pengöne ka caa drain, tro la itre ithuecatr qa hnine la Tusi Hmitrötr a xatua së asë troa atrehmekune la nyine tro sa kuca matre troa hetrenyi la aqane waiewekë ka loi me wange hnyawa la huliwa ne cainöje së matre troa eatrëne eje hnyawa.