The Cile Kö Troa Kuca La Itre Etid!
1. Ngöne nemene götrane la easa thupëne matre thaa tro kö sa ‘cipane troa kuca la loi’?
1 Maine tro sa catre cainöjëne la maca ka loi ne la Baselaia i Akötresie, haawe, easë hi lai a amamane ka hape, thaa easë kö a ‘cipane la loi’ kowe la itre atr ka mele ngöne la teritoare së. (Ite edomë 3:27) Ame la maca ka sisitria nyine tro sa ce thawa memine la itre atr, tre, ene la itre ijine ka sisitria easë a troa lapa elanyi fene la mus i Akötresie. Maine hnei epuni hna ce thawa memine la itre atr la mejiune i epun ngöne la nöjei ijin, maine tro fë pena la itre itus, ngo nyipi ewekë catre troa thele troa nyiqaane inine la Tusi Hmitrötr memine la itre atr?
2. Nemene la ka hnöthi së troa nyiqaane etid memine la itre atr?
2 Kola mama ngöne la itre xaa ijin, ka hape, ame la ketre ewekë ka sewe së troa nyiqaane etid, tre, hnene la aqane goeëne së la etid. Ame itre xan, tre, angatr a cile troa etid memine la itre atr, pine laka, angatr a nango lueluëne la hnei angatr hna atreine troa kuca, maine pena, hnene laka, tru catre hnei jole i angatr, matre pë hë ijine troa hane xomiujine la ketre etid. Hane cahu itre mekune nyine ixatua koi së matre thaa tro kö sa cipane me cile hnö troa inine la Tusi Hmitrötr memine la itre atr.—Mat. 28:19; Ite hu. 20:20.
3. Pine nemen matre hna aijijë së troa hamë ini ngöne la Tusi Hmitrötr?
3 Easa Lueluëne La Hne Së Hna Atrein: Maine jë thaa qa së kö hna hane kuca la itre ini ka tru, maine pena hetrenyi kö la itre xaa kepine matre easa luelue troa hane xomiujine la itre etid. Ame la itre hlue Keresiano ka maca ekö ngöne la hneijine i Iesu, tre, itre ka “tha ’te tus me tha hna inin.” Nemene la ka aijijë angatr troa hane inine kowe la itre xan la nyipici? Hnene hi laka, “luete qa thei Iesu” nyidro. (Ite hu. 4:13) Hna ini nyidroti hnene la Atre Ini Ka Tru, ene Iesu; hnei nyidrëti hna hamëne thatraqa së jëne la Tusi Hmitrötr, la itre ini me itre aqane troa hamëne itre ej. Ngacama thaa qa së kö hna hane kuca la itre ini ka tru, ngo ame pe, tre, easa kapa la ketre ini göi Akötresie memine la itre aja i Nyidrë, nge thatreine kö troa aceitunëne la ini cili memine la itre xaa ini.—Is. 50:4; 2 Kor. 3:5.
4. Nemene ini hne së hna xome qa ngöne la tulu i Amosa?
4 Iehova a upe la itre perofeta troa hajine la itre ka musi ka ngazo maine itre xane pena ka cilëne la itre götrane qa ka tru. Ame itre xan, tui Amosa, tre, thaa angatre kö a hane cilëne la itre götrane qa ka tru, ketre thaa nyine haine atrune pena kö la aqane mele i angatr. Hnei Amosa hna qaja ka hape: “Tha ate perofeta kö ni, nge tha nekö i perofeta kö ni ; ngo ate thupë öni kö ni, nge ate huliwa sukamore.” (Amosa 7:14) Ngo thaa hnei Amosa kö hna cipane la maca me hnöthe troa qaja la maca ne iameköti Iehova koi Amazia, lo atre huuj ka hmi kowe la kau gool. (Amosa 7:16, 17) Loi e tro pala hi sa mekune hmaca laka easa kuca la huliwa i Akötresie, nge Nyidrëti a ini së matre tro sa atreine xome la huliwa hnei Nyidrëti hna upi së troa kuca.—2 Tim. 3:17.
5. Pine nemen matre loi e tro sa catre troa nyiqaane etid memine la itre atr, ngacama tru catre hnei jole së?
5 Maine Troa Tru Hnei Jole Së: Maine tru catre hnei jole së, maine jë ase jë fe hë së ami ijine troa cainöjëne pala hi la maca ka loi. Ame la troa xomiujine la itre etid, tre, celë hi ketre götran ne la huliwa ne cainöj ka lolo catr. Ketre madrine ka tru la easa öhne la itre thangane la Wesi Ula i Iehova ngöne la mele ne la ketre atr. (Heb. 4:12) Atraqatr la madrine i Iehova ngöne la easa nue la mele së troa xatuane la ketre atr troa “wangate hmekune la nyipici.” (1 Tim. 2:4) Ketre kola madrine la itre angela ngöne la kola ietra la ketre atr qa ngöne lo aqane ujë i angeic ekö me kökötr matre troa ketre atre nyihlue i Akötresie ka macaj ngöne la götrane la ua.—Luka 15:10.
6. Nemene la hnëqa hna aijijë së troa hane xom, göi troa eatrëne la aja i Akötresie?
6 Ame la aja i Akötresieti, tre, tro “la nöjei ate asëjëihë a mele me wangate hmekune la nyipici.” (1 Tim. 2:4) Drei la ketre hnëqa hna aijijë së troa hane xom, ene la troa huliwa thenge la aja i Akötresie, laka thaa tro kö a cipane me cile hnö troa inine la Tusi Hmitrötr memine la itre atr!