Hetre Nyine Tro Asë Hi Së a Hamën Koi Iehova
1 Atre fe hi epuni laka, ijije kowe la itre atr troa hamëne la ketre ewekë koi Akötresie? Hnei Abela hna huujëne koi Iehova la itre xaa si i angeic ka sisitria, nge ceitune mina fe la itre huuje hna kuca hnei Noa me Iobu. (Gen. 4:4; 8:20; Iobu 1:5) Nyipici laka, ame la itre huuje cili, tre, thaa nyine atrenamone kö la Atre Ixup, ke, Nyidrëti la atrekë ewekëne la nöjei ewekë asë. Ngo, itre huuje lai ka amamane pe la ejuine la ihnimi ne la itre trahmanyi celë ka nyipici koi Akötresie. Ame enehila, ijije tro sa nue la traeme së, me trenge catre së, me itre mo së matre troa hamëne koi Iehova “la huje ne atrunyi [Nyidrë].”—Heb. 13:15.
2 Traem: Drei la elolone e troa ‘xome’ la traeme qa ngöne la itre huliwa ka thaa nyipi ewekë menu kö matre troa akökötrene la huliwa ne cainöje së! (Efe. 5:15, 16) Maine jë, tro sa saze la porogarame së, matre aijijë së troa hane pionie ka ixatua, maine caas maine nyimu treu ngöne la macatre. Maine jë, ijije tro sa aqeane la traeme hne së hna majemine xome thatraqane la huliwa ne cainöj. Maine tro sa nyixane la hne së hna majemine kuca e nöjei wiik hnene la 30 lao menetr, tro ha elë la lue hawa ngöne la huliwa ne cainöje së ngöne la treu!
3 Trenge Catr: Nyipi ewekë tro sa neëne la itre nyine madrin, me ketre huliwa ka troa agenyi së, ene pe thaa hamëne hë së la ewekë ka sisitria the së koi Iehova. Ketre, nyipi ewekë tro sa thupën matre thaa tro kö sa hnehengazone menune pala ha la itre jol, ke, wanga tro pena “agenyi” së, me thapa qaathe së la trenge catre hna hnëkën göi troa nyihluei Akötresie. (Ite edomë12:25) Maine ka meköti ju hë la hne së hna hnehengazo fë, drei la esisitriane kö e troa ‘nue la ehnefe së koi Iehova’!—Sal. 55:22; Fil. 4:6, 7.
4 Itre Mo Së: Ketre ijije tro sa hamëne la itre mo së matre troa sajuëne la huliwa ne cainöj. Hnei Paulo hna xatuane la itre trejine me angeic Keresiano, tro pala hi angatre a “isa amë” la hnepe hna hetrenyi matre troa hetre ewekë nyine hamëne kowe la itre aja ixatua. (1 Kor. 16:1, 2) Ketre tune mina fe, ijije tro sa ami mani matre troa hane hamëne kowe la itre aja ne la ekalesia së me kowe la itre aja ne la huliwa ne cainöje e cailo fen. Atraqatre la madrine i Iehova kowe la hne së hna hamën qa kuhu hni së, ngacama ewekë ka co ju hë.—Luka 21:1-4.
5 Nyimutre la itre ewekë hnei Iehova hna hamë së. (Iako. 1:17) Easa amamane la hni ne ole së hnene la easa hamën atrune la traeme së, me trenge catre së, me itre xaa mo së matre troa nyihluei Nyidrë. Maine tro sa kuca tune lai, easë lai a amadrinë Iehova, “ke aja i Akötesie la ate hamëne madin.”—2 Kor. 9:7.