Loi e Tro Sa Iakeukawanyi Ngöne La Huliwa Ne Cainöj
1 Hetre madrine së asë troa kapa “la tenge ewekë hna qaja ngöne la ijin’ ej,” nge ka ixatua. (Ite edomë 25:11) Ame ngöne la easa ce cainöje me itre xaa trejin, tro sa atrehmekune tune kaa laka, ka troa ithuecatr la porotrike së?
2 Itre Porotrik Ka Iakeukawanyi: Drei kö la eloine e hna ithanatane la itre ewekë ngöne la ua, ngöne la kola cainöje trootro! (Sal. 37:30) Maine jë, tro sa ce ithanatane la aqane tro sa tro fë la maca ka loi, maine ifekeune pena la itre hne së hna hnyipi melëne ngöne la huliwa ne cainöj, nge ka thuecatre koi së. (Ite Hu. 15:3) Hne së kö hna öhne la ketre mekune ka lolo ngöne la easa e caasine la Tusi Hmitrötr, maine ngöne la itre zonale hna xötrei kapa, maine ngöne la icasikeu ne la ekalesia? Ijije fe tro sa ithanatane la itre mekune hne së hna hnyipi drenge ngöne la cainöje koi nöjei atr hnine la Uma Ne Baselaia.
3 Maine jë easa ngazohnine laka, hnene la atrene la hnalapa hna amejëne la ketre mekune ka ajolë së, nge thatreine kö sa elë hun. Loi e troa xome la itre menetre ka ala xalaithe hi thupene la hna nue la atr, matre troa ce wange memine la sine ce tro i easë la aqane troa elë hune la mekune celë elany, maine jë troa xome la itus Comment raisonner. Nge maine easa madrine la aqane tro fë la maca ka loi hnene la sine ce tro së ngöne la ketre hnalapa, loi e tro sa qaja aloinyi angeic qa kuhu hni së, ke tro lai a thuecatre koi angeic.
4 Thele Jë Troa Ixatua: Hapeu, hetre trejine kö thene la itre atrene la ini tusi së laka, ekö hë së thaa cainöje memin? Maine tro sa könën la itre xaa trejine troa ce cainöje me easë, haawe tro ha “ce akeukawanyi [së] me [angatr].” (Rom. 1:12) Atraqatre la madrine ne la itre pionie e troa ce cainöje me angatre hnene la itre trejin, lo hmahmakanyi maine heji lapa pena, ke, xalaithe hi la itre trejine ka cainöje ngöne la itre hawa cili. Ijije hi tro sa sajuëne la itre pionie, ene la troa ce cainöje me angatr. Hetre trejine kö ka wezipo, nge hna nyifegone hi la hnei angeice hna atreine troa kuca ngöne huliwa ne cainöj? Loi e tro sa wange matre troa ce cainöje me angeic, maine jë troa sine la ketre etid, tro lai a ithuecatrekeu, koi angeic, ngo koi së mina fe.—Ite edomë 27:17.
5 Ka ixatua pala hi la troa qaja aloine la itre xan, me hetre trenge ewekë hna qaja ka hetre hni ne ole ngön, ngacama itre ewekë ka co ju hë. Loi e troa lapa mekune lai ngöne la easa ce cainöje me itre trejine me easë, ke, aja i easë troa “akeukawane ipitön.”—1 Thes. 5:11.