“Kuca [Jë] La Ewekë Celë Pine La Maca Ka Loi”
1. Nemene la aja ka eje thene la atre cainöj, nge pine nemen?
1 Ame koi Paulo aposetolo, tre, hnëqa i nyidrë la troa cainöjëne la maca ka loi kowe la itre xan. (1 Kor. 9:16, 19, 23) Ketre tu së mina fe, laka eje the së la ajan tro la itre atr a hane mele epine palua, ene pe kola upi së troa catre cainöjëne la maca ka loi koi angatr.
2. Ame la kola cainöj, nemene la itre ewekë nyine saze, nge pine nemen?
2 Cainöje Jë Ngöne La Itre Götrane Me Ngöne La Itre Ijine Troa Öhne La Itre Atr: Ame la atr ka atreine nyi ie, tre, thaa angeice kö a hna la itrathinyi angeic maine ifile pena ngöne la ketre götran me ketre ijine ka loi koi angeic, ngo ngöne pe la götrane me ijine kola hetre ie. Ketre tu së mina fe, pine laka itre “nyine axena at” së, haawe, nyipi ewekë tro sa eköthe hnyawa la porogarame së matre troa öhne la itre atr ngöne la teritoar, nge ketre, tro hë sa madrine troa kuca la huliwa, ene la troa icasikeune la “nöjei ie menu.” (Mat. 4:19; 13:47) Hapeu, ijije kö tro sa cainöj kowe la itre atr e heji lapa ngöne la itre hnalapa i angatr, maine e hmahmakanyi pena ngöne la kola cainöje e cahu gojeny? Aja i Paulo la troa “anyipicine la maca ka loi,” nge hnei nyidrëti hna kepe thangane ka loi qa ngöne la hna eatrëne lai ngöne la nöjei ijine ka ijij.—Ite Hu. 17:17; 20:20, 24.
3, 4. Ame la easa cainöj, tune kaa la aqane tro sa itrotrohni, nge nemene la itre thangane lai?
3 Loi e Troa Ihmeku La Aqane Nyiqaane Ithanata i Nyipunie Memine La Itre Aja Ka Eje Thene La Itre Atr Ne La Teritoar: Kolo pala hi a saze aqane troa nyi ie hnene la atr, matre troa ea pena la itre xaa pengöne ie. Tune kaa la aqane tro sa ketr la hni ne la itre atr ne la teritoare së, ngöne la easa tro fë la maca ka loi ne la Baselaia? Nyipi ewekë tro sa amexeje la ketre jole ka ketr la itre atr ngöne la teritoare së, nge thupene lai, loi e tro sa drenge hnyawa la itre mekuna i angatr. (Iako. 1:19) Maine jë tro sa hnyingë angatr la mekuna i angatr ngöne la götrane cili. (Ite edomë 20:5) Haawe, tro hë sa atreine tro fë la maca hmekune la itre aja ne la itre atr, matre troa ketr la hni i angatr. Hnei Paulo hna “xome la nöjei pengön’ asë thatraqane la nöjei ate asë.” (1 Kor. 9:22) Haawe, ka nyipi ewekë catre tro sa trotrohnine la aqane mele ne la itre atr, matre troa ketr la itre hni angatr.
4 Drei la ketre manathithi ka tru, ene la troa cainöjëne la “loi” kowe la nöjei atr”! (Is. 52:7) Epi tro pala hi sa “kuca la ewekë celë pine la maca ka loi,” matre troa ketr la itre asë.—1 Kor. 9:23.