Loi e Tro Sa Maca Troa Xome La Tusi Hmitrötr
1. Pine nemen matre ka nyipi ewekë la Tusi Hmitrötr?
1 Maine ka maca së troa xome la Wesi Ula i Akötresie, tro lai a aijijë së troa cainöjëne me inine hnyawa la nyipici, me qaja amamane la itre ini ka thoi me itre hna majemine kuca hnene la itre atr.—2 Tim. 2:15; 1 Pet. 3:15.
2. Nemene la ka troa xatua së troa maca troa xome la itre xötr?
2 Thele Jë Troa Atrepengöne Hnyawa La Tusi Hmitrötr: Tro hë sa maca troa xome la ketre jia ne huliwa, e hne së hna atrepengöne hnyawa la ewekë cili. Maine tro sa e la Tusi Hmitrötr qa ngöne la qaane uti hë la pun, tro hë sa atrehmekune hnyawa la taan ka tru qa hnine ej. Ketre, tro hë sa hnehen la itre xötr, nge tro ha hmaloi koi së troa xome itre ej. Maine tro sa thele troa atrepengöne hnyawa la Tusi Hmitrötr, tro hë sa catr nge pëkö luelu the së ngöne la easa cainöj e cahu gojeny me ngöne la ketre teritoar.—1 Thes. 1:5.
3, 4. (a) Nemene la itre xaa aqane tro sa atrepengöne hnyawa la Tusi Hmitrötr? (b) Hetre itre xaa jëne kö hnei nyipunieti hna xome matre troa atrepengöne hnyawa la Tusi Hmitrötr?
3 Loi e tro sa majemine fe la Tusi Hmitrötre së me ce e la itre xötr ngöne la itre ijine icasikeu ne la ekalesia. Ame ngöne la easa sipu inine la Tusi Hmitrötr me hnëkë kowe la itre icasikeu së, tre, loi e tro sa goeëne la itre xötr hna hamën me sine thele la aqane troa trongëne itre ej. Nyimutre la itre ka qaja, ka hape, hna xatua angatr troa xome la itre xötr hnene la hna majemine e mekötine itre ej e hnine la Tusi Hmitrötr, ngo thaa hnene kö la hna fejane itre ej hnine ordinatöre maine ngöne ipepa pena.—Ioane 14:26.
4 Hnene la itre xaa fami hna eköthe amë la ketre ijin matre troa hnehen la itre xötr ne la Tusi Hmitrötr. Maine jë angatr a xome la itre neköi pepa, me cinyanyine la mekene tus ngöne la ketre götran, nge aliene la xötre cili ngöne la ketre götran. Thupene lai, angatr a ithöeëne la itre pepa matre wange maine, atre hnyawa kö angatr la aliene lai xötr, maine hnen eje pena e hnine la Tusi Hmitrötr. Maine easa ajane troa maca, loi e tro fe sa huliwane la itre aqane nyiqaane ithanata ngöne la hna cainöj, me xome pala hi la Tusi Hmitrötr matre troa sa kowe la ketre mekun ka icilekeu maine ketre hnyinge pena.
5. Pine nemen matre easa thele troa maca troa xome hnyawa la Tusi Hmitrötr?
5 Ka pë san la Tusi Hmitrötr. Eje hmekuje hi a qatrenge la itre hna cinyihan ka troa “ainamacanë [itre atr] kowe la mel.” (2 Tim. 3:15) Pine laka thatrepengöne kö la itre xaa atr la itre trenga mo ka tru alameken ka eje e hnine la Tusi Hmitrötr, haawe, nyipi ewekë tro sa thele troa maca ngöne la aqane troa amamai angatr la nyipici hna hamëne hnene la Tusi Hmitrötr.—Ite edomë 2:1-5.