Tro Kö Epuni a Nyiqaane Inine La Tusi Hmitrötr Memine La Ketre Atr Ngöne La Treu Okotropa?
1. Nemene la nyine tro sa tro fë e treu Okotropa?
1 Ame la nyine tro sa tro fë e treu Okotropa, tre, kolo itre zonal La Tour de Garde me Réveillez-vous ! Maine easa ajane troa akökötrene la aja thene la ketre atr, haawe, kola ithuecatre koi së troa hamëne la tarak hna hape, Ajane Kö Nyipunieti Troa Atre La Nyipici? me thele troa nyiqaane inine la Tusi Hmitrötr me angeic. Tune kaa la aqane tro sa eatrëne lai ngöne la easa iwai hmaca?
2. Ame ngöne la epuni a wange hmaca la ketre atr ka kapa ha lo itre zonale së, tune kaa la aqane tro epuni a xome la tarak Ajane Kö Nyipunieti Troa Atre La Nyipici? matre troa nyiqaane inine la Tusi Hmitrötr me angeic?
2 Aqane Troa Huliwane La Tarak: Maine jë tro epuni a qaja, ka hape: “Ame lo itre zonal hnenge hna hamë nyipë, tre, itre ej a ithuecatre kowe la itre atr ka isa pengöne aqane mel me aqane hmi, troa inine la Tusi Hmitrötr. [Hamëne jë koi nyidrë la tarak Ajane Kö Nyipunieti Troa Atre La Nyipici?, nge wanga atrune jë la itre hnying ka eje ngöne la pane götran.] Hanawange la itre xaa hnying ka sisitria hna troa sa hnyawa hnene la Tusi Hmitrötr. Hapeu ase hë nyipëti hane qaja la ketre hnying hna e wengëne e celë?” Thupene la hna köjane la hnying hnene la atr, ce wange jë epon hnine la tarak la itre mekun ka sa la hnyinge i nyidrë, nge e jë la ketre xötr hna hamën. Thupene lai, qaja jë, ka hape, celë hi lai ketre ini hna xome qa hnine la Tusi Hmitrötr, nge e ase hë, amamane jë la itus Ini Tusi Hmitrötr. Maine hnei nyidrëti hna iën ngöne lo itre alien, la ketre mekene tus, haawe, ijije tro epon a ce ithanatane la itre pane paragaraf. Ijije mina fe tro epuni a xome mekötine la mekene tus ka ihmeku memine la itre mekun hnei epon hna ce ithanatan hnine la tarak. Hanawange la itre xaa aqane tro epuni a kuca tune lai:
● Hapeu, Akötresieti kö a hane kukehni së? (g. 9-11, par. 6-10)
● Hapeu, tro kö elanyi a paatre palua la isi me akötr? (g. 12, par. 12-13)
● Nemene la pengö së thupene la mec? (g. 59-60, par. 7-8)
● Hetre mejiune kö göi ange ka meci hë? (g. 71, par. 13-15)
● Tro ni a thithi tune kaa matre troa drei ni hnei Akötresie? (g. 166-167, par. 5-8)
● Tune kaa la aqane tro ni a hetrenyi la nyipi manathith? (g. 9, par. 4-5)
3. Thenge la aja ne lai atr, tro sa xome tune kaa la tarak?
3 Eje hi laka, maine thaa ijiji epuni kö troa nyiqaane ngöne la kola xötrei traqa, troa inine la Tusi Hmitrötr memine la ketre atr jëne la itus Ini Tusi Hmitrötr, ngo ijije tro epuni a ce wange me angeic la ketre drai matre troa sisedrëne la porotrik. Nge thenge la aja ka eje thei angeic, maine jë tro epuni a anyimua wange lai atr me ithanatane la itre xaa mekun e hnine la tarak ngöne la epuni a iwai hmaca, qëmekene troa hamëne koi angeic la itus. Epi tro pala hi sa xome hnyawa la tarake celë ngöne la treu Okotropa matre troa nyiqaane inine la Tusi Hmitrötr memine la itre atr ka hni ka meköt, me hane xatua angatre troa “ate la nyipici.”—Ioane 8:31, 32.