Köni Aqane Troa Amacane La Aqane Hamëne Nyipunie La Ini
1. Pine nemene matre easa thele troa amacane la aqane hamë ini së?
1 Itre ka hamë ini asë hi la itre Keresiano. Easë ju hë a xötrei traqa thene la ketre atr, maine iwai hmaca maine ini Tusi Hmitrötr pena me angeic, ngo ame pala hi la aja hne së hna thele troa eatrën, tre, ene la troa hamë ithuemacany. Ngo ka sisitria catre la itre ithuemacanyi cili, pine laka easa amamane la aliene la “ite hna cinyihane ka hmitöt,” itre ka troa “ainamacanë[n]” la itre atr. (2 Tim. 3:15) Drei la ketre manathithi ka tru! Hanawange la köni aqane troa amacane la aqane hamë ini së.
2. Troa hmaloi tune ka la aqane hamë ini së?
2 Loi e Troa Hmaloi: Maine hetrenyi la ketre topik hne së hna atre hnyawa, tre, ma troa nango jole kowe la ketre atr ka thatre hnyawa kö lai, troa trotrohnine la hne së hna qaja. Celë hi matre, ame la easa inine la Tusi Hmitrötre memine la ketre atr, tha tro pi kö sa hamëne menune pala ha la itre ithuemacanyi ka tha nyipi ewekë kö. Loi e tro pe sa wanga atrune la itre mekune ka sisitria. Tha hnene kö laka tru la hne së hna ithanata, ke, tro ha lolo la aqane hamë ini së. (Ite edomë 10:19) Nyipi ewekë tro sa e hmekuje hi la itre xötr ka sisitria troa ithanatan. Maine hne së hna e la ketre xötr, tro hi sa lapa hmekuje hi ngöne la itre mekune ka sisitria. Ame ngöne lo Cainöje Hune La Wetr, hna cinyihane ngöne Mataio mekene 5 koi 7, ngacama ka jui catre la itre nyipici hna qaja hnei Iesu, ngo hmaloi hnyawa la aqane qeje pengöne nyidrë la itre nyipici cili, nge ketre tha tru menu kö la hna ithanata.
3. Nemene la enyipiewekëne la itre ceitun, nge nemene la itre ceitune ka lolo?
3 Loi e Troa Hamë Ceitun: Kola xatuane la atr hnene la itre ceitune troa atreine wai mekun, nge troa ketre la hni angeic, me xatua angeice matre tha tro kö a thëthëhmine la itre ini ka sisitria. Tha tro kö sa mekune ka hape, pine laka tha ka edromë kö së hawe, thatreine jë kö tro sa hane hamë ceitune ka lolo. Hnei Iesu hna majemine xome la itre ceitune ka tha jol e troa trotrohnin. (Mat. 7:3-5; 18:2-4) Ame e itre xa ijin, maine jë ka lolo catre tro sa sija ngöne ipepa la itre xa iatr. Eje hi lai laka, maine tro sa canga hnëkë hnyawa, tha tro kö a jole koi së troa xome la itre xa ceitune ka lolo.
4. Nemene la aqane tro sa huliwane hnyawa la itre hnying?
4 Loi e Troa Hnying: Ka lolo la itre hnying, ke, kola upe la hnainine troa thele ewekë. Qa ngöne lai, e ase hë së hnying, treqene ju troa sa koi së. Maine tro sa canga sa la sipu hnyinge së, thatreine jë kö tro sa atre la hna trotrohnine hnene la hnainin. Nge maine tria kö la mekuna i angeic, tha tro pi kö sa canga wenë amekötine ju hi; loi pe troa xatua angeice jëne la itre xa hnying, matre tro kö angeice a ketre sipu öhne me qaja la mekune ka lolo. (Mat. 17:24-27) Eje hi, pë jë kö ketre e easë ka atreine troa hamëne hnyawa la ini. Celë hi kepine matre, kola ithuecatre koi së hnene la Tusi Hmitrötr troa wange hnyawa pala hi la aqane hamë ini së. Maine tro sa ujë tune lai hawe, tro hë së kapa la itre manathithi ka epine palua, tha easë hmekuje kö, ngo angatre mina fe itre ka drei së.—1 Tim. 4:16.